RENUNGAN 26-31 MEI 2012

Sabtu, 26 Mei 2012

Sijahaon:

Manogot  4 Musa 15:1-31                                                                             Markus 14:21-31

1. Marende No. 248:1,4          SALELENG HO DI TANO ON 

Ø  Saleleng ho di tano on Patigor ma roham

Paingotingot ma tongtong Nidok ni Debatam

Ø  Bolongkon sian rohami Luhut na so ture

 Alai na sian Tuhan i Ramoti ma sude.

2. Daniel 9:7

Ho do, ale Tuhan, nampuna hatigoran, alai anggo di hami hailaon ni bohi do rasirasa sadarion, di angka baoa sian Juda dohot di pangisi ni Jerusalem dohot di sandok Israel, angka na jonok dohot angka na holang, di saluhut luat haambolongannasida binahenmi, ala ni hajahatonnasida, na manjahati i nasida dompak Ho.

PATIGOR MA ROHAM TU DEBATA NA TIGOR I

HATORANGAN

Tarida do hadirion (integritas) ni jolma sian roha parbagason. Buku Daniel I ma buku na marumanghon pangungkapon taringot tu angka namasa, dohot angka na nanaeng masa muse. Digurinthon do buku Daniel marhite ‘pengalaman ni ngolu ni bangso ni Debata”, jala marhite angka namasa I dipapatar Debata hasimoon ni Debata marhite parnidaan ni mata ni haporseaon tu naposo na si Daniel.  Tujuan ni buku Daniel I ma laho patoguhon haporseaon, pangkirimon ni angka na porsea asa togu jala manahan laho mangadopi angka parsorion dohot parungkilon. Sasintonga hasahatan ni buku Daniel di hatiha i ditujuhon do tu halak Jahudi na tongon mangadopi na porsuk di tingki harajaon ni raja Antiokhus (abad 2 sM), nangpe barita na digurithon di Buku Daniel, manggombarhon sitaonon ni bangso Israel di tingki habuangan Babel, dohot tujuan laho pabotohon hinajorbut ni panggomgomi di hatiha i na sarupa  dohot panggomgomi di tingki habuangan Babel.

            Marhite parsorion ni bangso I, di paandar do marhite turpuk on pangantusion nasintong taringot tu hadirion ni Debata na sintong, na tigor do Ibana, alai hadirion ni bangso I (Israel) gok dosa do. Hira di pangke Debata do “sitaonon” manang uhum I gabe sada dalan tu bangso I asa lam jonok tu Debata, jala dirajumi nasida angka hajahatonna di adopan ni Tuhan i. Na tigor do Debata, Jala Ibana manguhum sogot portibi on marhitehite hatigoran, pagostangonna ma uhum tu angka bangso (Psalmen 9:9). Ala ni diarahan turpuk on do hita asa mangolu dibagasan hatigoran, songon na nidok di Poda “Hatigoran ni na daulat roha patigor dalanna, alai tinggang do anggo parjahat i, binahen ni hajahatonna (Poda 11:5), Manang ise na marsihohot di hatigoran, sahat do tu hangoluan; alai manang ise na mangeahi hajahaton, patibu hamamatena (Poda 11:9). Ala ni,  manang aha pe angka ulaonta, sai taulahon mai dibagasan hatigoran, ai angka I do na hinalomohon ni Tuhan I, uang be taulahon angka hajahaton, dosa asa unang ro naumposi tu hita. Antong, Sai jumolo ma lului hamu harajaon ni Debata dohot hatigoranna, dung i tambahononna do sude angka ondeng tu hamuna (Mateus 6:33), AMEN.

3. Tangiang Pangondianon

4. Marende No 257:3   RAJA NA TUMIMBUL 

Ø  O ale Jahowa Hutundalhon hami Dosa dohot jeanami

  Tondi dohot daging Hupasahat hami Tu tanganmu Tuhanami

  Sada do i ma Ho Sioloannami Pasangaponnami.

5. TANGIANG ALE AMANAMI

Minggu, 27 Mei 2012

Sijahaon:

Ev: Rom 8:22-27                                           PENTAKOSTA I      Ep: Ulaon Ap 2:1-13

1. Marende  No. 462:1-2       Ale Tondi Parbadia.

1.      Ale Tondi Porbadia, sai songgopi hami on.

Rohanami ma paria lao mamuji Ho tongtong.

Ho tongtong, Ho tongtong, lao mamuji Ho tongtong.

2.      Debata ni hangoluan, lehon hangoluan i.

Sunggul sian partangisan saluhut na mate i. Saluhut, saluhut.

MARGOGO MA HITA BAHENON NI TONDI PORBADIA

HATORANGAN

1.      Tarida do hadirion ni jolma na sasingtongna molo lam balga masalah na ni adopanna. Dipaandar do diturpuk on ndang tarsirang “sitaonon” sian saluhut angka na tinompa ni Debata. Secara khusus dipaandar do boha do sikap ni angka naporsea mangadopi angka sitaonon di portibion. Rahasia ni hagogoon angka naporseai I ma huaso ni Tondi Parbadia na margogoihon angka naporsea margogo manaon, mangadopi sitaonon I,jala ingkon manaon do angka naporsea i (anak ni Debata). Didok do “ Alai molo anak hita, dohot ma panean; panean di Debata, dongan panean ni Kristus; molo tung donganna hita di sitaonon, gabe donganna hita sogot nang di hasangapon, hira so adong do sitaonon ni martimbanghon hasangapon di ari sogot i( Rom 8:17,18). Hataridaan ni hadirion ni anak ni Debata do molo rade angka naporsea i manaon naporsuk di portibion, ala ni haporseaon na di Tuhan I, jala dibagasan pangkirimon na mangolu do hita laho paimahon hasisinghop ni haluaonta, tung marhite Tondi Porbadia nungga gabe di patau hita gabe anak ni Debata.

2.      Somal na sumur na denggan I ma teruji di tingki kemarau (ndang ro udan mansai leleng). Hadirion na porsea I pe songon ni, teruji ditingki adong parungkilon.  Halak naung gabe anak ni Debata, ingkon adong pangkirimon na mangolu dibagasan ngoluna, pangkirimon ni do hataridaan ni angka naporsea. Ai molo so adong pangkirimonta, berari ndang adong haporseaon dibagasan dirinta. Ndang tarsirang habengeton I sian ngolu pangkrimon, ai marhite benget niroha i do patuduhon na adong haporseaon dohot pangkirimon di hita. Ingokon dibagasan pos niroha do hita, dipangkirimon I, ai Debata do na gabe jamiana dohot kepastian di haporseaon dohot pangkirimonta I, laho manjalo hasisinghop ni halauaonta sogot.

3.      Diondolhon do di Turpuk on, dipargogoi tondi I do angka naporseai, lapatanna, ndang sian hadirion manang sian gogo ni jolma I sandiri sasintongna asa boi ibana Manahan disiataonon i. Tondi ni Tuhan I do namangurupi hita, dihangaleonta,  namangodihon hita tu Ama I diangka pangidonta di tangiangta pe. Ala ni ma gabe botoonta ma molo mangido sipangidoon hita tu Tuhan I di tangiiangta, ingkon tapaserrep do rohanta asa Tondi I namanggohi rohanta, jala mangajari hita mangido angka na patut si pangidoonta.

4.      Ala ni marhite parningotan hasasaor ni Tondi Parbadia dijaouhon do tu hita asa mangolu hita dibagasan pangkirimon, benget ma hita manaon na porsuk, dungo ma hita paimahon haroro ni Tuhan I laho manomunomu angka na porsea i laho manjalo tohap hangoluan I, AMEN.

3. Tangiang Pangondianon

4. Marende B.E No. 105:1,5 DEBATA DO MANGGOMGOMI 

1.  Ro ma Tondi Parbadia Debatangku situtu

     Rohanami ma paria mangoloi hataM burju

     Sai sondangi ma tongtong Rohanami na holom.

5.  Molo marsitaonon hami Jala marniae disi

     Unang , Ale Tuhannami PadaoonMu bohiMi

     Lehon apulapulMi Tu bagasan rohangki

5. TANGIANG ALE AMANAMI

Senin, 28 Mei 2012

Ev: Ulaon Apostel 2:37-42                PENTAKOSTA II                            Ep: 1 Samuel 12:18-25

1. Marende No: 476:1                       NDADA AU GURU DI AU.

1.                  Ndada au guru di au be, Jesus do nampuna au. Las rohangku dung hubege, Jesus sipangol au. Ndang  be au guru di au. Jesus na humophop au, Nampuna au. Tung saleleng au mangolu, Jesus do nampuan au.

PAUBA MA ROHAM MANGASAHON HUASO NI TONDI PORBADIA

HATORANGAN

Diturpuk on idaonta ma barita pangulaon ni Tondi Parbadia marhite naposo ni Tuhan I, I ma si Petrus, dibohali Tondi Porbadia do ibana gabe margogo manjamitahon hata ni Tuhan I, torop angka na gabe porsea, jala paubahon roha. Diturpuk on dipaandar do pangkorhon ni Jamita ni si Petrus na manggurdak roha ni halak Jahudi hatiha i, gabe tubu ma panandaion ni diri dinasida, naung mardosa nasida tu Debata, ala ni Tuhan Jesus Kristus naung diparsilanghon i.

Mansai ringkot do mananda diri. Sada hadirion ni jolma na denggan I ma, olo ibana mangarsakhon rohana ditingki diboto ibana naung marsala ibana, manang mangulahon na so sintong (dosa). Molo tapestahon di ari nasalpu parningotan hamamate ni Tuhan Jesus, sasintongna ingkon marsak do hita marningot i, ai rajumanta ama ala ni dosanta do umbahen na diparsilanghon Tuhan Jesus pola sahat tu na mate manuhuk dosa ni portibion. Molo marsak rohanta ala marningot dosanta, I do mula ni halak na olo paubahon roha. Alai ndang holan dibagasan na mangarsakhon dosa I hita, ingkon adong tong panolsoion, perubahan pingkiran, dohot perubahan sikap dohot tindakan (pangalaho). Molo saleleng on holan na mangulahon dosa hita, unang be sai ta datdati mardosa, molo saleleng on sai tahosomi donganta, ta pauba ma i, molo saleleng on na sai holan  marpingkiran naroa hita tapauba ma i, marhite pingkiran na denggan. Molo saleleng on losok rohanta mangula ulaonta, tapauba ma i marhite komitmen jala konsisten, unang holan di roha, dohot pingkiran tadok muba, alai ingkon marudut do tu pangulaon tindakan (aksi).

Taingot ma, ingkon dibagasan pangurupion ni Tuhan I do hita boi paubahon rohana, alai ingkon  adong do tong haradeonta (respon), rade manangihon dohot manghangoluhon hata ni Debata na mangolu i.  Antong, marhite Pesta paningotan hasasaor ni Tondi Porbadia, na paduahon on, di paingot turpuk on hita, asa rade hita paubahon rohanta (bertobat), I do hataridaan (parbue) ni jolma naung manjalo hasesaan ni dosa, dohot tohap haluaon I marhite pandidion nabadia dibagasan haporseaon, AMEN.

3. Tangiang Pangondianon

4. Marende No 743:1            O TUHA TOGU-TOGU MA

1.                  O Tuhan togu-togu ma au, tu dalan lomo ni rohaMi,

Raphon Ho sonang mardalan au, nang rahis maol sidalananki,

TondiMi baen manggohi au on,Margogoihon au naposoMon,

Pasangap Ho dingolungkon,Paima sahat tu surgo au on.

5. TANGIANG ALE AMANAMI

Selasa, 29 Mei 2012

Sijahaon:

Manogot  Psalmen 69:22-29                                                                         Markus 14:43-52

1. Marende No: 268:1         DEBATANGKU DO DONGANKU

Ø  Debatangku do donganku Ganup ari ganup taon

            TumpahanNa do langkangku urupanNa  au manaon

Pos do rohangki disi Debata do donganki Salelenglel

2. Sakaria 8:23

Songon on do hata ni Jahowa Zebaot: I ma angka ari parsigaungan ni sampulu halak sian saluhut dila ni bangso parbegu, asa marsigantung nasida tu suhisuhi ni ulos ni sada halak Jahudi mandok: Rap hita sauduran, ai nunga hubege hami: Debata do donganmuna.

DEBATA DO DONGANTA

HATORANGAN

Disuriranghon panurirang Sakaria do taringot tu Haluaon ni bangso Juda sian parhatobanon ni Babel. Bagabaga ni Debata taringot tu haluaon ni bangsoNa patuduhon hasatiaon ni Debata di padanNa. Marpangulahi do roha ni Debata mida bangsoNa, atik pe mardosa nasida (1:16). Dipaimbaru Debata do bangsoNa I songon anak ni mata ni Jahowa (2:12), na mian ma antong Jahowa di tongatonga nasida (2:14). Ala ni ma di panurirangon si Sakaria di paandar do tu bangso i asa marhamubaon “sai mulak ma hamu tu ahu, ninna Jahowa Zebaot, asa mulak ahu tu hamu, ninna Jahowa Zebaot” (1:3). Bagabaga taringot tu hamumulak ni bangso I tu Yerusalem, namarlapatan doi paulihon dohot paulakhon hadirion ni bangso I di adopan ni Debata, dohot paulihon bagas Joro Ni Debata, songon hataridaan ni hapataron ni Debata di tongatonga nasida. Alai di turpuk on bagabaga haluaon ni ndanda holan bersifat ekslusif (bangso Yahudi sambing) alai haluaon tu bangso parbegu (bersifat inklusif). Pandohan sampulu halak sian bangso parbegu, martudutudu do I bilangan na singkop (sempurna),ala sian ragam ni bangso dohot parhataan naeng parsidohot “rap sauduran dohot bangso ni Debata” jala mangokui pangaramotiaon dohot pandonganion ni Debata.

            Dijouhon turpuk on tu hita, tongtong do satia Debata di padanNa, diganup partingkian dohot situasi. Marhite I ma boha do hita marposniroha di pandonganionNa. Dibagasan haroro ni Tuhan Parbadia na tapesatahon di ari na salpu, patar do pandonganion dohot pangurupion ni Debata tu angka na porsea. Ala ni, boha do peranan ni Huria, angka na porsea di Tuhan I patuduhon hadirion na sintong, ala nunggan tajalao haluaon sian Debata marhitehite Tuhan Jesus Kristus. Hahasasaor ni Tondi Parbadia I ma patuduhon na tongtong do Debata mandongani, mangaramoti angka na hinonghopNa, jala mangihut tusi tarjaou do angka naporseai marpanindangion taringot tu haluaoaon sian Debata tu bangso na so mananda Debata, asa saluhutna jolma naung marsaulihon pasupasu ni Debata gabe habaoran pasupasu tu angka humaliang. AMEN

4. Marende No 265:3

Ø  Urati ma huhut tutungi  Sude na jat  di rohangki 

            Marhite rante manang tali Tarihot au di dosa i

             Ndang dia imbar nii, o Tuhan Boi do malua au disi

            Hasian i rohaM ma ahu Pardosa na malua i.

5. TANGIANG ALE AMANAMI

Rabu, 30 Mei 2012

Sijahaon:

Manogot  Psalmen 69:30-36                                                                         Markus 14:53-65

1. Marende No:  121:1-2                   JESUS RAJA NI HURIA  

Ø  Jesus, Raja ni huria. Na porsea, Na badia Pasupasu ma au on

            Sai sungguli ma rohangku Mangihuthon Ho, Rajangku

             Pargogoi ma au tongtong Pargogoi ma au tongtong

Ø  Lehon Tondi Parbadia Saor tu roha ni huria Di sandok portibi on

            Asa tong sada rohaNa Nang marserak  pe ruasNa

            Pasangaphon Ho tongtong Pasangaphon Ho tongtong

2. 1 Timoteus 3:15

Alai molo tung gumele ahu, naeng botoonmu, na patut parangehononmu di bagas ni Debata, i ma huria ni Debata na mangolu i

HURIA NI DEBATA NA MANGOLU

HATORANGAN

Dibagasan haporseaon dohot posniroha do Apostel Paulus pasahathon huria ni Debata tu si Timotius asa diramoti saluhut angka na pinasahat tu Ibana. Alani ma ingkon tangkas, jala jamot si Timotius marmahani huria I asa unang manimbil sian lomo ni roha ni Tuhan i. Dipaingot si Paulus do si Timotius boha do parange na sintong songon huria ni Debata. Songon naposo ni Debata si Timotius di pasahat Apostel Paulus do tu ibana tanggungjawab asa bertanggungjawab ibana manjamothon huria I asa mangolu jala marparange huria dibagasan hasintongan. Huria na mangolu I ma Huria na polin manghangoluhon Hata ni Debata. Manghaporseai dohot manghangoluhon hata ni Debata I do ojahan asa margogo huria I mangalao poda na lipe (1 Tim 4:1-2). Laho manjamothon habadiaon ni huria di paingot Paulus si Timotius asa dipamanat angka na naeng gabe parhobas (syarat), I ma angka na hipas pamatang, nang partondionna, unang si surahan pangalahona.

            Nuaeng sahat ma panjouon ni tu hita, boha do hita bertanggungjawab, baik songon Parhalado, nang ruas pe, laho manjamothon hadirionta songon pamatang ni Kristus hita. Hataridaan ni Huria na mangolu I ma molo marparange ruas ni huria dibagasan hasintongan, tau tiruan di hata, di pangalaho, di holong ni roha dohot di haporseaon. Angka I do parbue ni halak na manghangoluhon hata ni Debata. Antong marojahana tu hata ni Debata na mangolu I ma ngolunta, AMEN.

3. Tangiang Pangondianon

4. Marende No 651:1            Huria na huhaholongi hami

Ø  Huria na huhaholongi hami na pinajongjong ni Tuhanta i.

           Tung na so lupa sian rohanami Huria I. Dohot ruasna I, dinasa hasusaan

           Tongtong do I manahan. Manggogo pe angka galumbang I,

           Tuhanta do pademakhon I,Martua do na not di Tuhan i.

5. TANGIANG ALE AMANAMI

Kamis, 31  Mei 2012

Sijahaon:

Manogot  Psalmen 70:1-6                                                                                         Markus  14:66-72

1. Marende No: 122:1+10                 IDA HINADENGGAN NI BL. 13

Ø  Ida hinadenggan ni Angka na  saroha i.Parpambaenan na burju Nang hatana pe  tutu

Ø  Ale Tuhan, togu ma  Hami on tu Debata. Na marholong roha i Salelenglelengna i..

2.1 Petrus 5:14

Masitabian ma hamu huhut masiummaan di bagasan holong ni roha. Dame ma di saluhut hamu, angka na di bagasan Kristus

MASITABIAN DIBAGASAN HOLONG

HATORANGAN

Ditujuhon do surat 1 Petrus tu halak Kristen Jahudi na di tano parserahan (Asia Kecil) na tongon uju i mangadopi parungkilon hinorhon ni tekanan politik dohot hajongjongan ni halak Kristen na minoritas di tonga ni bangso parbegu na mayoritas. Marhite parungkilon ni mansai ringkot do halak Kristen patuduhon hasadaon na ni rahut dibagasan holong ni roha. Maradat situtu do holong ni roha I. Marhite turpuk on disosoi do hita asa manghangoluhon parange ni halak Kristen manang etika ngolu ni halak Kristen I ma marhite, prinsip: Parjolo, masitabian (Berilah salam), pandohan I mangodolhon parange/sikap (tindakan yang harus dilakukan) sipatuduhonon tu saluhut halak marhite pangkuling na denggan, pantun, unang tois. Paduahon, Masiummaan dibagasan holong ni roha, (cium yang kudus/kasih), pandohan ni ndang mangasahon hagiot ni daging (nafsu), alai hata “umma” na nidok na dison dasorna I ma holong (agave), ndanda holong marpambuat. Lapatanna saluhut pangalaho (adat, etika, hasomalan) ni halak Kristen ingkon marojahan tu holong ni roha na sian Tuhanta I do. Patoluhon, mian dibagasan dame, I ma parbue ni halak na manghangoluhon parange na parjolo dohot napaduahon I. Molo didok di turpuk on “dame ma disaluhut hamu..” Sekaligus do  pandohan I laho patoguhon haporseaonta molo taadopi angka parungkilon, alai marhite angka parungkilon ingkon margogo tong hita “mambahen dame”, ai molo mian hita dibagasan dame gabe margogo ma hita mangadopi angka parungkilon. Antong taingot ma hata ni Tuhan Jesus “Apala sian on ma tandaon ni halak saluhutna, hamu siseanku: Molo masihaholongan hamu” (Yoh 13:35). AMEN.

3. Tangiang Pangondianon

4. Marende No 123:3,4    ALE DONGAN NA SAROHA 

Ø  Sai pasada ale Tuhan Angka na porsea i

         Asa masihaholongan Songon na pinatikMi

         Dibagasan hasintongan I do pinangidoMi

         Sai padomu angka dongan Na tutu sinondangMi

Ø  Sai pasada rohanami Doshon Ho tu Ama i

      Asa unang sian hami Nanggo sada lilu be

      Ho tongtong hutiru hami Di ulaon i sude

      I ma patandahaon hami Gabe siseanMu  be

5. TANGIANG ALE AMANAMI