RENUNGAN

Senin, 26 Maret i 2012

Sijahaon:

Manogot  2 Musa 30:17-31:11                                                                                                             Mateus 26:31-35

1. Marende No: 458:1                           BARITA NA UMULI

1.                    Barita na umuli, I na sian Tuhana Jesus, Sai I do na margogoihon au, nang arsak pe hubolus On mangapuli rohangki, Sai Tuhanki, na basa I, do donganki.

2. Ulaon Apostel 18:9

 Alai borngin i diida si Paulus di bagasan tondina ma Tuhan i na mandok tu Ibana: Unang ma ho mabiar; hatahon ma, unang ma ho mauhom!

MBIAR MIDA DEBATA, ALAI UNANG HO MABIAR  TU PORTIBION

HATORANGAN

Hal na biasa do molo adong roha “mabiar”/takut, kuatir di hita jolma, ai molo so adong I, nungga marsahit be jolma i. Tubu do roha namabiar di hita molo mangadopi hamaolon manang parmaraan, mabiar mate, dna. Alai boha do unang sampe roha biar i manaluhon hita gabe so margogo be hita. i I do didok Tuhan Jesus tu siseanna “unang hamu mabiar” (Lukas 5:10; 12:4; Yohanes 6:20).  Lapatanna ingkon marusaha do jolma manaluhon roha biar I sian dirina, jala unang ala ni hatahuton I, gabe dalanta laho manjua aha na hinalomohon ni Tuhan I sian hita. Manghaporseai Debata I do dalan laho mangalo roha namabiar (Psalm 56:12). Saisntongna ndang hea dipasombu Debata angka naposoNa (Heb 13:5). Tubu do roha mbiar di si Paulus ditingki di huta Korint ibana hatiha I, siala mansai jorbut do pangalaho ni jolma di huta Korint, angka na mangula hajahaton, korupsi, dna. Dihilala Paulus do inganan ni ndang parmianan ni angka na porsea, lumobi dipanjouonna laho marbarita nauli, boi do gabe parmaraan na ro tu ibana molo jorbut pangalaho ni jolma i. Alai diboto Debata do pangkilaan ni si Paulus hatiha i, marhite parnidaanna (vision) ro ma Debata mamangkulingi ibana na mandok “Unang ma ho mabiar; hatahon ma, unang ma ho mauhom”, jala di ayat na mangihut dipapos do roha ni si Paulus ai dongannan ni tuhan ni do ibana (ay 10). Ndang dipasombu Debata ibana, ala ni ma ndang pola lomos roha ni si Paulus, ai donganan ni Tuhan ni do Ibana dohot angka naporsea i.

Marhite turpuk on, naeng bohalanna hita, atik tung marungkil hita, molo pe mian hita diinganan na mansai gok angka pangalaho na jorbut, jala maralo tu haporseaonta, alai sada na boi paposhon rohanta I ma sai di dongani tuhan I do angka na porsea I di ngoluna. Songon halak Kristen hita naeng ma hita patuduhon roha na masiurupan, masihaholongan asa jumpang hasadaon, jala margogo hita laho patuduhon harajaon ni Debata di ngolunta, gabe panondang ma  hita jala gabe sira di portibion. Margogo do hita manaluhon roha mbiar I, molo taboto jonok do Tuhan I sian hita. Molo adong hagaleonta, pasti do Debata pe tong mangalehon hagogoon laho mangurupi hita. Tabahen ma roha namabiar I gabe dalanta lam jonok tu Debata. Molo mabiar hita ndang dapotan parkerejoan, ndang dapotan rongkap, ndang berhasil ulaonta, ndang jumpang na jinalan manang na niluluan, dna. Antong lam tapajonok ma tu Debata. Amen

3. Tangiang Pangondianon

4. Marende No 140:2,4                          GIRGIR MA HAMU   

Ø  Ndang jadi hamu Mabiar ale  Sai pangke burju GogoM sasude

                Nang hehe sibolis Mamolgak hamu  Sai tatap ma Jesus pargogo tutu

Ø  Asi ma rohaM Ale Debata Pasaut ma hataM Tumpahi  nama

                Sude na niula Ni naposoM Sai baen ma martua Sude jolma pe.

5. TANGIANG ALE AMANAMI

Selasa, 27 Maret i 2012

Sijahaon:

Manogot  2 Musa 31:12-32:35                                                                                             Mateus 26:36-46

1. Marende 10:       HUPUJI, HUPASANGAP HO                                 

Hupuji, hupasangap Ho, Amang pardenggan basa. Ai jadijadianMu do sude, angka na masa.Ditompa Ho do sasude, dagingku ro di tondi pe, pinuji ma goarMu.

2.Pangungkapon 4:11

 Ale Tuhan Debatanami, na tama do Ho manjalo hasangapon dohot hamuliaon dohot hagogoon, ai ditompa Ho do saluhutna; hinorhon ni lomo ni roham do, umbahen manjadi angka i jala tartompa!

SAI PUJI MA DEBATA MANANG DIDIA HO MANGOLU

HATORANGAN

Molo tapahusorhusor saluhut angka na tinompa ni Debata, namansai uli, jala maratur do luhutna. Marhite saluhutna i, nungga patut longang rohanta jala dohononta mauliate tu Debata pardengganbasa i. Idaonta ma hagogoon dohot huaso ni Debata marhite angka na tinompana i. Dibagasan Kristus lam patar ma holong dohot hagogoon ni Debata na patubuhon hita paduahalihon, ditompa hita gabe jolma naimbaru, taruli dihaluon i. Molo songon I naeng tubu ma panindangion sian hita songon panindangion ni par Psalemn I “Ai anggo ahu tangkas do huboto, tung natimbul do Jahowa, jala Tuhanta i mangatasi sude angka Debata sileban” (Psalmen 135:5). Jala marhite saluhut pambahenan ni Debata, tung tama ma hita pasahathon pujipujian songon turpuk on “Ale Tuhan Debatanami, na tama do Ho manjalo hasangapon dohot hamuliaon dohot hagogoon, ai ditompa Ho do saluhutna; hinorhon ni lomo ni roham do, umbahen manjadi angka i jala tartompa!” Ai dipangke Debata do hagogoonNa laho paulihon dohot paluahon ndanda laho mangaripashon angka na tinompaa na i, jala dipengke Debata do haburjuonNa I, ndanda laho manjua hita, alai ditogu do hita asa jonok tu Ibana. Diragam ni angka hamaolon na taadopi di panggolmiton di ngolunta, taingot ma tongtong pasahathon dirinta tu Debata, jala tapuji ma Ibana, nampuna hasangapon dohot hamuliaon dohot hagogoon. Halak na mamuji Debata, tontu ndang sai dipangasahon be hadirionna (egosentri), alai theosentris. Gombaran ni pujipujian (doxology) ni naporsea I di portibion, ai I do gombaran pujipujian angka panean surgo hasonangan I di ari sogot di harajaon ni Debata. Jala taingot ma, “Marhagoon do pujipujian na tapasahat tu Debata, ai boi do I palumbanghon hita sian ragam ni parungkilonta”. Tapuji ma Tuhan Debata manang didia pe hita mangolu, ai marhite asiniroha na I, sai donganan na, jala toguonNa do hita sogot  tu hasangaponNa i. AMEN

3. Tangiang Pangondianon

4. Marende No 569:1                             O DEBATA TUNG LONGANG DO ROHANGKU

1.                    O Debata tung longang do rohangku, Molo hubereng na tinompaMi,

Saluhut bintang, hilap dohot ronggur, manghatindanghon hasangaponMi,Marende au Tuhan mamuji Ho,O, Debata, sangap do Ho.Marende au Tuhan mamuji HoO, Debata, sangap do Ho.

5. TANGIANG ALE AMANAM

Rabu, 28 Maret i 2012

Sijahaon:

2Musa 32:30-33:23                                                                                                                Mateus 26:47-58

1. Marende No: 476:1                           NDADA AU GURU DI AU.

2.                    Ndada au guru di au be, Jesus do nampuna au. Las rohangku dung hubege, Jesus sipangol au. Ndang  be au guru di au. Jesus na humophop au, Nampuna au. Tung saleleng au mangolu, Jesus do nampuan au.

2. Jesaya 30:21

 Jala apala pinggolmu umbege hata ni na mandok sian pudim: On do dalan i, i ma dalan i! * Unang manimbil hamu tu siamun manang tu hambirang

UNANG MARDUA ROHA, BEGE JALA IHUTHON MA DALAN NI TUHAN I

HATORANGAN

Di tingki Raja Josia bangkit gabe panggomgomi Israel (Juda), sada gagasan naimbaru na dipatupa ibana I ma patupa haimbaruon (Reformasi Josia), lumobi di rumang ni parugamoon/parsombaon tu Debata, naung sanga bangso I madabu tu parsombaon tu debata ganaganaan, gabe “mardua roha nasida”. Marpanghorhon do pangalaho I tu ngolu ni sosial, moral, ekonomi, politik, dna na lam jorbut di hatihai. Marbalik do roha ni bangso I, gabe  tu Raja Mesir do bangso I mangido pangurupion laho mandopang ancaman sian Asyur, ndanda tu Debata, jala laos I do na dipinsang panurirang Jesaya tu Raja Ahas dohot Hiskia di hatiha i. Alai marhite turpuk on, idaonta ma asiniroha ni Debata na rade patuduhon dalan haluaon tu bangso i. Jala patar do tutu I dipatuduhon Debata di ombas ni Raja Josia manggomgomi Juda hatiha I, na manosoi asa mulak bangsoi marsomba tu Debata, marhaposan tu Debata. Marhite turpuk on naeng diondolhon tu hita, molo tung pe taadopi parungkilon, ancaman, tantangan di ngolunta, naeng dohononta ma tu Debata “Sai * ajarhon ma tu ahu, ale Jahowa, dalanmu, asa * marpangalaho ahu di bagasan hasintonganmi; sai pasada ma rohangku mangkabiari goarmu” (Psalemen 86:11). Holan tu Debata ma hita marhaporusan, unang mardua roha, ai halak na mardua roha, I ma halak na parohon parungkilon tu bagasan ngoluna sandiri. Alai halak na manangihon suara ni Debata dohot sintong, I do na mamboan ibana tu dalan na sintong. AMEN

3. Tangiang Pangondianon

4. Marende No 743:1             O TUHA TOGU-TOGU MA

1.                    O Tuhan togu-togu ma au, tu dalan lomo ni rohaMi,

Raphon Ho sonang mardalan au, nang rahis maol sidalananki,

TondiMi baen manggohi au on,Margogoihon au naposoMon,

Pasangap Ho dingolungkon,Paima sahat tu surgo au on.

5. TANGIANG ALE AMANAMI

 

Kamis, 29 Maret i 2012

Sijahaon:

Manogot  2 Musa 34:1-35                                                                                                                    Mateus 26:59-75

1. Marende No:25   HATAMI, ALE TUHANKU   

Ø  HataMi, ale Tuhanku, arta na ummarga i, sai paian di rohangku,  unang so hutiop i. Molo so be sitiopan hata na badia i, aha nama haojahan ni haporseaon i ?

Ø  Ale Jesus sai matahon, sai ramoti ma au on, asa hot haporseaon  di bagasana rohangkon.  Sai paringas ma rohangku mangoloi di hataMi, asa mauas di podaMu songon si Maria i.

2. 2 Timotius 3:14

Alai anggo ho, sai mian ma di bagasan angka na ginuruhon jala naung hinaporseaanmi, ai diboto ho do na mangajarhonsa tu ho

HANGOLUHON MA HATA NA GINURUHONMU AI I DO HANGOLUANMU

HATORANGAN

“Hangoluhon ma hata na ginuruhonmu ai I do hangoluanmu”, I do sada hata naummarga dipasahat Amanta Pandita ditingki manghatindanghon haporseaon sasahalak di Huria. Mansai arga situtu do pandohan I molo tutu situtu dihangoluhon. Ai marhite pandohan ni nungga tangkas disi panjouon asa marpangoloion, asa satia tu Debata, jala mian dibagasan Ibana. Ditonahon si Paulus do tu si Timotius asa mian ibana dibagasan pangajarion naung jinalona hian. Molo didok mian, namarlapatan do i “asa diradoti, manongtong, hot, togu, manahan, ndang muba ndang mose,  mangolu di hata I, konsisten jala konsekwen”. Ai hata ni Tuhani do dalan hangoluan, jala hasea mamodai, maminsang, pauliulihon, manogunogu di bagasan hatigoran (2 Tim 3:14). Laos I do na dihatindanghon par Psalmen “Hatami do sulusulu ni pathu jala hatiuron di dalanku” (Psalmen 119:105). Nang Tuhan Jesus pe I do di tonahon tu angka sisieanNa “Na tutu situtu do na hudok on tu hamu: Molo adong na mangaradoti hatangki, ndang idaon ni i hamatean salelenglelengna (Yoh 8:51) Sian I do botoonta, naung tutu ma gok haholongon ni roha ni Debata di bagasan ibana. Sian i ma taboto, hita di bagasan ibana. (I Yohanes  2). Marhite turpuk on, disungguli do rohanta, asa mian hita dibagasan pangajarion ni hata ni Debata, jala hata ni Debata ma tapangke “sinjatanta” laho mangadopi ragam ni angka poda na lipe na boi manggugai haporseaonta. Mansai ribur do anggo suara ni portibion na boi mangela rohanta,losok marminggu, losok mangguruhon hata ni Tuhan I. Nungga lam girigir jolmai manangihon hata ni ‘gosip” sian poda na sintong, ai ndakdanak pe molo dipasingot natorasna nungga bangkol manangihon, ndang pantun be,  marroha tois nama. Alai tu angka natoras pe naeng ma tongtong dipatuduhon situruon dingoluna, unang holan na mamodai, pasingothon di boto, asa ringgas iananghonna marminggu, mangguruhon hata ni Tuhan I, hape ibana sandiri ndang hea marminggu, ndang hea rap mangan, rap martangiang dohot keluargana. Sasintongna mansai godang dope siguruhononta taringot tu hata ni Tuhan I. Antong tangi jala tinggil ma hita di hata ni Debata. AMEN.

4. Marende No 481:1             GODANG DOPE

Godang dope siguruhononMi, Asa tu dos ho dohot Tuhanmi

Sai tong na hurang hatigoranmi. So tuk do pe haporseaonmi.

Dirim sambing dihaholongi ho. Donganmu laos dihalupahon.

5. TANGIANG ALE AMANAMI

Jumat, 30 Maret i 2012

Sijahaon:

Manogot  2 Musa 35:1-55                                                                                                                    Mateus 27:1-10

1. Marende No: 669:1                           Ringgas au paboahon

1.                    Ringgas au paboahon, Barita na uli. Barita haholongan ni Jesus Tuhanki,

Ringgas au paboahon ai na sintong do I. Mambuat nasa holso soada tudos nii

Ringgas au paboahon, barita na ummuli. Barita haholongon ni Jesus Tuhanki.

2. Markus 16:20

 Alai laho do anggo nasida manjamitahon barita na uli tu ganup luat; jala diurupi Tuhan i ma nasida, dipahot ma jamita nasida marhitehite tanda angka na mangihut i

JAMITAHON HATA I, HAJONGJONGHON I DIGANUP TINGKI

HATORANGAN

Ndung Hehe Jesus sian na mate, mansai bangkol do siseanNa i manghaporseai naung hehe Tuhan Jesus. Ndung dipatuduhon Tuhan Jesus diriNa manang pigapiga hali, tong dope ganggu haporseaon ni siseanNa i.  Dungi muse uju marpungu nasida rap mangan, dipataridahon ma dirina tu na sampulusada I, dipinsang ma ganggu dohot jogal ni rohanasida, ala so porsea nasida di angka naung marnida Jesus, nanung hehe sian na mate (ay 14). Laos marhite I ma ditonahon Tuhan Jesus tu siseanNa i “Laho ma hamu tu liat portibion; jamitahon hamu ma barita na uli tu nasa na tinompa (ay 15). Turpuk on I ma pangulaon ni sisean ni mangoloi parsuruon ni Jesus, laho marbarita nau uli. Mangasahon hagogon jala pangurupion ni Tuhan ni  do nasida manghatahon hata ni Tuhan I, godang do tanda halongangan na pinatupa ni Tuhan ni marhite angka pangkobasion ni siseanNa i. Dipartingkian nuaeng pe godang do mambahen hita ndang porsea di tuhan i. Boi do pingkiranta, pamangta mandok “Ale Debata pargogonasohatudosan” alai di pangulaonta siganup ari sai gogonta do tapangasahon. Sai tadok do “Ale Debata na umboto saluhut” alai diparngoluan siganup ari jojtjot do hita mangulahon angka na so patut, jala sai tarimpu do I ndang adong naumbotosa. Diboto Debata do saluhutna I, manang aha pe tapingkiri, manang ganggu ni rohanta. Dipapatara Jesus do dirina tu angka siseanNa I, jala dipaposroha nasida. Laos I do nueng pos ni rohanta, dijou do hita gabe sitindangi, gabe sira dohot panondang di portibion. Alai taingot ma ndang margogo hita mangulahon hata ni Tuhan I, molo so mardonganhon Ibana.

Nuaeng pe tarjou jala disuru Tuhan ni do Hita gabe sitindangi di hata ni Tuhan i. Molo lam holong rohanta di Tuhan i, lam ringgas do hita mambaritahon taringot  Ibana, marhite parange, pambahenan, panghataion na hombar tu lomo ni roha ni Tuhan i.  AMEN

3. Tangiang Pangondianon

4. Marende No 729:1             Laho ma hamu

1.                    Laho ma hamu tu liat portibion, Ninna Jesus Kristus Tuhan I,Ninna Jesus Kristus Tuhan I

Asa marlas ni roha ma langit,nang dohot hajang hajang I marolop olop angka ladang I  ro dihau na diharangan i.

Baritahon ma Barita na uli I,Tu saluhut na tinompa I,tu saluhut na tinompa i. Martopaptopap sunge I

Marhasakhasak tao nang laut I,Marolop olop ma portibion nang,Sudena pangisina i. Amen.

5. TANGIANG ALE AMANAMI

 

Sabtu, 31  Maret i 2012

Sijahaon:

Manogot  2 Musa 36:1-38                                                                                                                    Mateus 27:11-31

1. Marende No: 476:1                           NDADA AU GURU DI AU.

3.                    Ndada au guru di au be, Jesus do nampuna au. Las rohangku dung hubege, Jesus sipangolu au. Ndang  be au guru di au. Jesus na humophop au, Nampuna au. Tung saleleng au mangolu, Jesus do nampuan au.

2.2 Korintus 1:10

Saut do hami dipalua, laos paluaonna do sian hamatean na sai jorbut i. Tu Ibana do mangkirim rohanami, paluaonna do nang tu joloan on

HALUON NA SIAN TUHAN I DO APULAPUL DI NGOLUNTA

HATORANGAN

Disada tingki hona tangkup jala ditawan saleleng 13 ari sahalak wartawan di Selandia Baru, I ma si Olaf Wiig. Dungi dipalua ma ibana muse, marhite I gabe lasmarohana, huhut mengkel ibana jala didok ma,”Nuaeng pe huhilala lapatan ni na mangolu ahu, marimbanghon ngolunghu di ari na salpu”. Boi tarjalo rohanta i, molo “malua/bebas” jolma sian “sitaonon” sasintongna disi ma dihilala hinaarga ni ngolu “na dipalua”(Dibebaskan ternyata lebih menggembirakan daripada hidup bebas). On do lasniroha si Paulus, ai dirajumi do ibana jolma na pinalua ni Debata sian parhatobanon ni  dosa. Alai parasiroha do Tuhan I na mangalehon haluaon tu angka jolma pardosa, ai I do dihamauliatehon dohot dihaporseai si Paulus di ngoluna. Dihatindanghon si Paulus do marhite suratna tu Efesus, doshon naung “mate” hian do jolma I ala ni dosana di adopan ni Tuhan I (Ef 2:1). Didok do “Ai upa tinuhor ni dosa do hamatean; alai  ni Debata do hangoluan salelenglelengna marhitehite Kristus Jesus Tuhanta I (Rom 6:23).Jadi, marhite hamatean dohot haheon ni Jesus gabe ditaluhon do hamatean na jorbut I gabe taruli hita dihaluon na pinatupa ni Tuhan i. Silehonlehon ni Debata do haluaon i marhite asinirohaNa, ndanda ala ni hadirionta dohot pangulaonta. Alai na diigil Tuhan ni sian hita  I ma “ manghaporseai pambahenan ni Kristus I dingolunta”. Manghirim ma hita di Tuhan ni, jala tabahen ma “haluoan “ na sian tuhan I, gabe apulapul dibagasan ngolunta, molo pe adopanta angka sitaonon, haporsuhon ala haporseonta di Tuhan i.  Taolophon ma haluoan dibagasan Kristus marhite roha mauliate, jala mangolu ma hita  dibagasan Tuhan I, ai I do manghorhon haluaon na manontong. AMEN.

3. Tangiang Pangondianon

4. Marende No 296:1-2  HOLSO ROHANGKU DITATAP HO 

Ø  Holso rohangku ditatap Ho  Tahutan ahu pangapul Ho

Naung tu tanganMu do sahat au Jesus Tuhanku ramoti au.

Ø  Pos do rohangku di Ho antong Huhaholongi do Ho tongtong

Ho do hinirim ni rohangkon Ho do pangiring di langkangkon.

5. TANGIANG ALE AMANAMI