Sabtu, 14 Juli 2012

RENUNGAN BIK 26-31 AGUSTUS 2012

Minggu, 26 Agustus 2012
Sijahaon:
Ev: Psalmen 34:15-22                                                                                                           Ep:Epesus 6:10-20
XII Dung Trinitatis
1. Marende No: BE. No. 14:2+3     PUJI HAMU JAHOWA TUTU        
Ø  Ingot tongtong, ale tondingkon, Sude na denggan na dipasonggop Debata tu ho.
Denggan basaNa do na pangoluhon ho.
Ø  Nda tung adong, pargogo tongon, Na martudosan, tu Tuhan Debata di surgo i.
Sun hinagogo, sun hinagogo i.

DIPALUA DEBATA DO HITA SIAN HAGOGOTAN MOLO TAJOU GOARNA
HATORANGAN
1.Dihatindanghon par Psalmen  do ia Debata tongtong marpanatap,lapatanna jonok do Debata, diboto Ibana do saluhutna angka na masa, sai hot do pangaramotion ni Debata di angka na porsea i. Jala molo ditatap Debata angka partigor, I ma patuduhon keberpihakan ni Debata, jala sebalikna mardalan do uhum ni Debata tu angka parjahat ala ni hajahatonna. Ditangihon Ibana do anggukangguk ni angka partigor, lapatanna dipalua Debata do nasida sian hagogotan (Psalmen 50:15). Didok di Jakobus”margogo situtu do tangiang ni angka partigor molo dihaburjuhon (Jak 5:16b), ala memang donok do Debata di angka na porsea, ndang hea Debata mandao sian jolma, ai nungga tangkas dipajonok Debata dirina marhite Tuhan Jesus ala ni ma ringkot hita pajonokhon diri tu Ibana marhite ngoluna na denggan jala tigor (Jak 4:8).  Sai manatap do mata ni Jahowa tu angka partigor, pandohan ni mangondolhon taringot tu pangaramotion ni Debata. Dihatindanghon par Psalmen do diturpuk on jumpang do ngolu hasonangan di halak na mangulahon na denggan, atik pe jumpang angka hamaolon, sitaonon di angka na mangulahon na denggan I, alai marhite I ma gabe diuji, jala naeng ma marsihohot manghaposi Tuhan I, jala holan tu Ibana do hita mangalualu, ala ditangihon Debata do angukangguk ni partigor, donok do jahowa di angka na bojok roha, Ibana do paluahon, jala Ibana do mangaramoti.  Haporseaon dohot pangkirimon si songon I ma naeng tangkas ta hangoluhon.
2. Ndang hea dihalomohon Debata hajahaton dohot hageduhon, jala marbiasbias do roha ni Debata tu angka siula hageduhon (5 Musa 25:16; Poda 3:23; 15:8,9,26,dna), jala hona uhum ni Debata do angka siula hajahaton dohot hageduhon (=ido pengalaman ni bangso Israel). Sasintongna ndang adong laba ni na mangulahon hageduhon dohot hajahaton, ai tu hamteaan do jambar ni I (Rom  6:23). Ndang jumpang hasonangan ni roha di angka siula hajahaton, jala laos boi do ta hilala pangontakna di ngolunta, molo taulahon na so denggan sai humasusa do ngolunta, sai busisaon do hita. Ala ni disungguli turpuk on do ngolunta asa taulahon ma ulaon na denggan, molo marungkil pe hita ala ni ulaon na denggan I, tapasahat ma saluhutna I tu Debata, asa margogo hita, asa benget rohanta mangadopi parungkilon i. Ai si Paulus sandiri dihatindanghon do ndang tarsirang ngoluna sian ragam ni parungkilon (Ef 6:20), ala ni tapangke ma lombulombu ni haporseaon I, molo Debata donganta ise ma alonta? (Rom 8:31). Amen
3. Tangiang Pangondianon
4. Marende No 363:3+8 HAMU SALUHUT HARAJAON
Ø  Ai uju au di hagogotan Joujou do au tu Debata
                Tang iangki do ditangihon  Dibaen do hosangki  arga
                Jahowa do tongtong donganku Beasa ma mabiar au ?
                Tung aha baenon ni alongku Nang manang ise dompak au ?
Ø  Timbul do tangan ni  Jahowa Sibahen hamonangan i
                Na tunduk do na jungkat roha Hot jongjong do partigor i
                Ndang mate au, sai na mangolu Do au marhite Tuhanki
                Pajojoronku, o Pangolu Ma saluhut pambaenanMi.

5. TANGIANG ALE AMANAMI
Senin 27 Agustus 2012
Sijahaon:
Manogot  Panguhum 9:1-33                                                                                               Lukas 20:20-26
1. Marende 10: 1    HUPUJI, HUPASANGAP HO                                 
Ø  Hupuji, hupasangap Ho, Amang pardenggan basa.
Ai jadijadianMu do sude, angka na masa.
Ditompa Ho do sasude, dagingku ro di tondi pe, pinuji ma goarMu.
2.Jakobus 1:17
Saluhutna silehonlehon na denggan, nasa ulibasa na mauliutus, i ma na ro sian ginjang, sian Ama ni na tiur, na so olo muba, na so umboto agia halinu ni hamimimbar.
SIAN DEBATA DO NASA ULIBASA NA MAULIUTUS

Saurdot do hadirion dohot pambahenan ni Debata, ndang hea ro sian Debata angka na roa, alai holan na denggan do. Jotjot do sala hita mangalapati angka na masa di ngolunta. Isarana molo madabu jolma tubagasan pangunjunan ndang sian Debata ro pangunjunan I (ay 18), alai sian roha ni jolma I do na mangoloi hisap ni rohana gabe madabu ibana tu pangunjunan. Sian si bolis jala ibana do na patupahon pangunjunan tu jolma, atik pe diboto jala “diloas” Debata jolma I unjunan ni si bolis. Marhite turpuk on dipaandar do tu hita ia Debata tongtong do “konsisten” na so olo muba do hadirionNa, Debata parholong niroha do Ibana, sian Ibana do saluhut angka na denggan, nasa ulibasa na mauliutus. Godang angka na denggan, nasa ulibasa na maulitus na dipasahat Debata tu hita, jala saluhutna angka na denggan I patubuhon lasnirohanta na so boi dilehon portibion, lumobi ma nasa ulibasa na mauliutus, ima silehonlehon ni Debata na so tama, jala naso talup hita manjalo alai diloas Debata hita manjalo. Di ngoluon ndang habilangan hita na denggan na tajalo sian Debata, ndang na ala ni hagogoonta umbahen di lehon Debata tu hita nasa uli basa namauliutus alai holan ala ni asi ni rohaNa sambing do. Dilehon do tu hita ngolu, gogo, roha, tingki parasian dohot ragam ni angka pasupasu pardagingon dohot partondion. Marhite pambahenan ni Debata, gabe tarsunggulma tu rohanta jotjot do hita marhahurangan di ngolunta, isarana molo tapatupa angka ulaon na denggan, hape ndang tulus hita mangulahon I, ai sipata gumodang do manuntut hita sian na tapasahat i, martingki do hita mangulahon na denggan, jotjot do hita ndang konsisten di hata dohot pambahenan. Boi do muba hatanta nang pambahenanta saonari dohot  tu ari marsogot. Alai marhite turpuk on dipaingot do hita asa unang muba unang mose, molo taboto jala tahatahon na denggan, laos na denggan I ma taulahon. AMEN
3. Tangiang Pangondianon
4. Marende No BE.522:3                      SURGO I SAMBULONTA DO I.
Ø  Na mangkirim rohangku dison, paima sahat tusi nang au on.
Taiti au, ale Tuhan tusi, asa rap dohot Ho au disi.
Surgo i, surgo i……..

5. TANGIANG ALE AMANAMI










Selasa, 28 Agustus i 2012
Sijahaon:
Panguhum 9:34-10:18                                                                                                          Lukas 20:27-40
1. Marende BE No 363:14 Hamu Saluhut Harajaon
Ø  Ho, Debatangku, pujionku Patimbulonku  sai tongtong
Mauliate ma rohangku Di Ho dibaen basaM inon
Hamu sude pe, ale dongan Dok ma mauliate i
Ai ndang he marpansohotan Do denggan ni basaNa i.

2. Daniel 4:37
Dibahen i ahu, Nebukadnesar, mamujimuji, patimbulhon dohot mangalehon hamuliaon tu raja na di surgo i; ai saluhut pambahenanna hasintongan do, jala angka lapangna hatigoran, jala tarbahensa do pajepolhon manang ise na marpangalahohon hajungkaton.
PUJI JALA PATIMBUL MA DEBATA
HATORANGAN
Didok do “pengalaman adalah guru yang terbaik”. Pandohan ni marlapatan, ingkon bahenonta do saluhut panggulmiton ni ngolunta gabe sada parsiajaran laho mangeahi na dumenggan. Hombar tusi ma mansai ampit pandohan “mata guru, roha sisean”, gabe sada prinsip dingolunta. Arsak dohot lasniroha nungga bagian sian ngolunta I, ingkon adopanta do ragam ni angka parungkilon dohot sitaonon di portibion. Tarlumobi mangadopi sitaonon hita ala ni haporseaonta di Tuhan i. Marhite turpuk on dipaandar do tu hita sada jamita na mangolu sian pengalaman ni Raja Nebukadnesar na paubahon rohana, ala dirajumi ibana do huaso dohot asiniroha ni Debata na pamalumhon ibana sian parsahitonna. Sian pengalaman na ni adopan ni Raja I, gabe tubu ma panindangion na arga dipuji, dipatimbul ibana do Debata, jala dirajumi do saluhutna pambahenan ni Debata hasintongan dohot hatigoran. Marhite panindangion ni Raja Nebukadnesar di turpuk on, naeng mangarahon hita asa tongtong marpangkirimon tu Debata, asa tongtong margogo mamuji Debata songon si Job atik pe mangadopi parungkilon ibana. Apala I do tujuan ni Buku Daniel hatiha i laho mangalehon apulapul dohot posniroha tu angka na marungkil ala ni haporseaonna tu Debata. Gabe dohononta ma maragam do hape cara ni Debata laho patuduhon sangkap dohot lomo nirohana di portibion, dipajepol do manang ise na marpangalaho hajungkaton. Ala ni unang tapangsahon hagogoonta, unang tapangasahon jabatanta, unang ginjang rohanta, unang tabahen na adong di hita I gabe mamusa halak, alai tapangke ma na adong di hita I gabe lam marsitutu hita mamuji Tuhan Debata. Molo pe taadopi angka parungkilon, naeng ma unang lupa hita mamuji Debata, alai tongtong ma hita marpangkirimon tu Debata, ai martingki do saluhut na adong di portibion, alai manongtong do anggo silehonlehon ni Debata. Molo songon I naeng tubu ma panindangion sian hita songon panindangion ni par Psalemn I “Ai anggo ahu tangkas do huboto, tung natimbul do Jahowa, jala Tuhanta i mangatasi sude angka Debata sileban” (Psalmen 135:5). Jala taingot ma, “Marhagoon do pujipujian na tapasahat tu Debata, ai boi do I palumbanghon hita sian ragam ni parungkilonta”.
3. Tangiang Pangondinon
4. Marende No BE.565:1       Las rohangku lao mamuji
Ø  Las rohangku lao mamuji Debata Parholong I,
                Songon bunga na mangerbang di na binsar ari i.
                Arsak, dosa, haporsuhon mago dibaen asiMi.
                Las ni roha na manongtong lehon di au Tuhanki.

5. TANGIANG ALE AMA NAMI



Rabu, 29 Agustus i 2012
Sijahaon:
Manogot  Panguhum 11:1-27                                                                                             Lukas 20:41-21:13
1. Marende No: B.E No. 117  JAHOWA DEBATANTA DO  
Ø  Gogonta ndang haposan i, Tibu do mago hita;
Pinillit ni Jahowa i, Na tuk pamonang hita
Ai ise goar ni ? I ma AnakNa i Tuhanta Jesus i 
Sigomgom sasude Na so tarbahen so monang

2. 1 Korint 1:27
Alai na oto di roha ni portibi on dipillit Debata, laho pailahon angka na bisuk; jala na gale di portibi on dipillit Debata, laho pailahon na gogo.
DIPILLIT JALA DIPATAU DEBATA
HATORANGAN
Asing do pamilliton ni Debata sian pamilliton ni jolma. Anggo jolma mamillit sian aspek parduru do dibereng alai anggo Debata sian roha parbagason do. Dipillit Debata do si Daud gabe raja atik pe sian mulana ndang masuk perhitungan ibana, jala boi do ditaluhon si Daud si Goliat parangan ni palistin na gogo i.  Maragam do dalan ni Debata laho mamillit angka naposona, molo tajaha di barita ni sejarah ni pamilliton ni angka naposo ni Debata godang do sian latarbelakang na gok hahurangan ngoluna. Boi do suhar lomo ni roha ni jolma sian lomo ni roha ni Debata. Molo didok di turpuk on na oto, na marlapatan do pandohan ni, I ma halak na so adong parbinotoanna, angka na so porsea tu Debata na so manjanghon Debata (Ef 4:18), angka na dibagasan haholomon (2 Kor 4:4), alai angka I do dipillit jala dipangke Debata laho papatarhon harajaonna tu angka na bisuk na diportibion, I ma angka na mangasahon pingkiranna, na managasahon gogona, jala na so mangjanghon Tuhan I. Dijamothon turpuk on hita asa unang hita marnida bohi, asa unang tapangsahon hagooonta, hamaloonta, asa unang leas rohanta marnida angka na na metmet, angka na pogos, angka na gale ala so adong sipangasahononna. Mansai ringkot do sikap di ngoluon molo mamereng jolma unang ala “ada apanya, alai naeng ma apa adanya”. Lapatanna unang mamereng status sosial, status ekonomi, dohot lan na asing. Unang ma ala mamora ibana, ala marjabatan ibana gabe olo hita marsaor, alai molo angka na pogos, na metmet, naso mardihadiha songon na bangkol rohanta marparsaoran dohot ibana. Umpama Batak mandok “Mate hau na bolon, dibahen hau na rodop”, na marlapatan mate halak na sangap dibahen angka jolma na metmet. Umpama I patuduhon asa unang leas rohanta mardina angka na metmet(na pogos), unang ginjang rohanta, ai ndang dihalomohon Tuhan I angka si ginjang rohan. AMEN


4. Marende No 481:1             GODANG DOPE
Ø  Godang dope siguruhononMi, Asa tu dos ho dohot Tuhanmi
               Sai tong na hurang hatigoranmi. So tuk do pe haporseaonmi.
               Dirim sambing dihaholongi ho. Donganmu laos dihalupahon.


5. TANGIANG ALE AMANAMI






Kamis, 30 Agustus i 2012
Sijahaon:
Manogot  Panguhum 11:28-12:15                                                                                                      Lukas 21:29-28
1. Marende No: 476:1                           NDADA AU GURU DI AU
Ø  Ndada au guru di au be, Jesus do nampuna au.
Las rohangku dung hubege, Jesus sipangol au.
Ndang  be au guru di au. Jesus na humophop au,
Nampuna au. Tung saleleng au mangolu, Jesus do nampuan au.

2. 2Korint 5:15
Jala songon on do hujujur hami: Anggo naung mate Nasada i humongkop sude, naung mate do nasida saluhutna. Jala humongkop saluhut do Ibana mate, asa unang be mangolu di dirina angka na mangolu i, asa mangolu nasida di Ibana, naung mate jala mulak

MANGOLU DIBAGASAN TUHAN I
HATORANGAN
Mangolu dibagasan Tuhan I, ima parbue ni jolma naung manjanghon panghophopon ni Tuhan ni. Pangantusion mangolu dibagasan Tuhan I tudos doi songon sada “tuan” na manobus sahalak “hatoban”. Molo tradisi di halak Jahudi, molo adong jolma na di tobus, ingkon mangolu do jolma naditobus tu na manobus I, lapatanna gabe sude ngoluna bergantung tu halak na manobus I, jala jolma na tinobus I pe ingkon rade ibana “mengabdi” tu na manobus ibana i. Pangalaho I somal do masa tu angka hatoban. Sonon ni do gombaran ni ngolunta diadopan ni Tuhan I, ai nungga ditobus hita marhite hamamate ni Tuhan Jesus, Ibana gabe singkat ni hita. Di ayat 14 didok “ditiop holong ni Kristus do hita”. Molo didok hata “ditiop” di hata Yunani didok Sunecho, lapatanna dipasada, mempersatukan, mendorong, memaksa asa marsada. Lapatanna marhite jala ala ni holong ni Kristus I do na pasadahon Ibana dohot hita, holong ni Kritus I do na “mendorong, na memaksa” asa marsada hita dohot Ibana, jala ndang adong huaso na asing na  mangambati, songon “magnet” do holong ni Tuhan ni na menarik, “memaksa” hita asa marsada dohot Ibana. Alani holan asiniroha ni Tuhan I sambing do na manghophop hita, ndang ala ni hagogoonta. Antong molo nungga ditiop holong ni Kristus hita, na marlapatan ma i ndang mangolu be hita holan di dirinta sambing, ndada roha diri be sipangahononhon, alai lomo ni roha ni Tuhan ni do. Halak na mangolu dibagasan Tuhan I, ndang mangasahon roha diri be (egosentris), alai sandok ngoluna marsorminan tu lomo ni roha ni Tuhan i. Amen
3. Tangiang Pangondianon
4. Marende No BE. 432:1+3                  SIAN HURUNGAN NI DOSANGKI.
Ø  Sian hurungan ni dosangki ro au tu Ho,
Ro au tu Ho. Tu haluaon di mudarMi Jesus au ro tu Ho
Nasa rohangku malum, hipas,
Gabe mamora, nang pe pogos, Sian jeangku ro au tu Ho, Jesus au ro tu Ho.
Ø  Ganggu ni roha, tading mai, :,: Jesus au ro :,:
Sai haposanku ma hataMi, Jesus au ro tu Ho.
Ndang pandelean ni rohangki, Sude huauphon tu holongMi,
Gabe martua, las rohangki, Jesus au ro tu Ho.

5. TANGIANG ALE AMANAMI






Jumat, 31  Agustus i 2012
Sijahaon:
Manogot  Panguhum 13:1-25                                                                                             Lukas 21:29-38
1. Marende No: BE. 404:1     UNANG HO SAI DI NA HOLOM.     BL. 268.                         
1.        Unang ho sai di na holom, tu na tiur ho antong, Sulusulu I
Ma golom, ai holom portibion. Naeng ma pasesa hononmu
Dosa tu Tuhan Jesus I, Ipe asa hangolu hononmu na nio mohon na i.
Ø      
Epesus 5:8
  Ai na holom do hamu najolo; alai tiur do anggo nuaeng di bagasan Tuhan i: Marparange ma hamu, songon angka anak hatiuron!
SIAN NA HOLOM TU NA TIUR
HATORANGAN
Dipatudos manang digombarhon do Huria Efesus, songon halak na mangolu dibagasan na holom andorang mananda barita nauli.  Molo na “holom” digombarhon do I ngolu na dibagasan hajahaton dohot dosa (Psalmen 143:3). Ndang boi mardomu na holom dohot na tiur, na jahat dohot na denggan, marasing do rumang ni i. Digombarhon turpuk on do hadirion dohot hajongjongan ni halak Kristen mian dibagasan na “tiur” lapatanna status na gabe anak-anak ni Debata, na mangolu dibagasan holong, ndanda be mian di bagasan haholomon, songon na ni dok na di ayat 3-4  “parmainanon dohot ragam ni harorangon ro di pangahution, unang ma targoar di hamu; ai songon i do tama di angka na badia. Songon i nasa sihailahononhon, hata barangsi dohot pargaitgaiton na so patut. Dipaandar turpuk on, ia ngolu ni halak na porsea, naeng mangolu dibagasan Tuhan I, mangolu dibagasan hatigoran dohot hasintongan. Somalna molo mardalan jolma di naholom, pasti do ndang sonang rohana, jala molo so adong sulu pasti do tartuktuk, jala boi sahat tu na marmara. Ndang adong manang aha boi diida, jala diula jolma molo mian ibana dibagasan na holom. Songon ni do gombaran ni jolma na mangolu dibagasan dosa. Alai molo mardalan hita  dibagasan na tiur, tung tangkas ma tutu taida saluhutna. Laos songon ni do gombaran ni ngolunta. Jesus do dalan tu hatiuron, dalan tu hasintongan dohot haluaon, marhite Ibana do tatanda Ama i. Dipaingot turpuk on do hita asa manjamothon ngolunta dibagasan ngolu na marhabadiaon, manang didia pe hita mangolu, manang aha pe angka ulaonta, manang pejabat hita, manang pangula di kantor, manang martani, martigatiga, manang di parsingkolaan,dohot lan angka na asing, ingkon saluhut panggulmiton ni ngolunta tangkas ma mian dibagasan lomo niroha ni Tuhan i. Amen
3. Tangiang Pangondianon
4. Marende No BE.720:1       NAENG MARSINONDANG NGOLUNGKU.
Ø  Naeng marsinondang ngolungku di igil Jesus I,
        Manang didia pe ahu tongtong huingot i.
        Tiur marsinondang ido ni igil ni Jesus tongtong
        Marsinondang panondang do au tutu.

5. TANGIANG ALE AMANAMI