Selasa, 28 Agustus 2012

JAMITA TU MINGGU, 26 AGUSTUS 2012,Psalmen 34:15-22


JAMITA TU MINGGU, 26 AGUSTUS 2012
DIPALUA DEBATA DO HITA SIAN HAGOGOTAN MOLO TAJOU GOARNA

 Psalmen 34:15-22
1.        Sumurut sian hajahaton marlapatan do I asa mulak jolma I tu hadirionna, padaohon dirina sian na maralo tu lomoniroha ni Tuhan I, dohot na maralo tu ruhutruhut ni ngolu hajolmaon (nilai-nilai kemanusiaan). Disosohon do marhite turpuk asa mangolu jolma I marhite na mangulahon ulaon na denggan[1] maradophon dongan jolma. Mangulahon na denggan I do hataridaan ni angka na porsea Tu Debata, I do respons (sikap) naung manjalo asiniroha ni Debata, I do parbue ni jolma naung paubahon rohana, jala maninggalhon angka  dosa. Aha do ulaoan na denggan? Tontu angka ulaon na dihalomohon ni Debata (Mar 10:18), mangulahon patikNa, manghaholongi dongan jolma (Gal 6:9), solider (Ul Ap 2:44-45), ai angka I do na patubuhon hasonangan (perdamaian), jala I do sipareahan. Holan I tutu laho mangulahon saluhutna I ndanda ulaon na mura, ai pasti do godang tantangan lumobi sian angka jolma na jat.
2.      Dihatindanghon par Psalmen  do ia Debata tongtong marpanatap,lapatanna jonok do Debata, diboto Ibana do saluhutna angka na masa, sai hot do pangaramotion ni Debata di angka na porsea i. Jala molo ditatap Debata angka partigor, I ma patuduhon keberpihakan ni Debata, jala sebalikna mardalan do uhum ni Debata tu angka parjahat ala ni hajahatonna. Sada pos ni roha laho mangulahon saluhut na I, I ma sai manatap do mata ni Jahowa tu angka partigor, lapatanna saluhut jolma na burju, na benget manaon ala ni hatigoran sai tontong do digoluna di ramoti Debata, on ma pos niroha ni angka na porsea, ndang pola ganggurohana jala mabiar laho mangulahon na denggan i. Disosohon par Psalmen do diturpuk asa tangkas dihangoluhon angka naporsea I pandonganion dohot pangaramotion ni Debata, jala ingkon pos rohana sai na dilinggomi Debata do angka na porsea I marhite huasoNa. Dibagasan posniroha tu Debata I ma angka naporsea I naeng tongtong pasahathon tangiangana tu Debata, ai tongtong do Ibana manangihon angukangguk ni jolma partigor.
3.      Diramoti jala ditangihon Debata do tangiang ni partigor. Ditangihon Ibana do anggukangguk ni angka partigor, lapatanna dipalua Debata do nasida sian hagogotan (Psalmen 50:15). Didok di Jakobus”margogo situtu do tangiang ni angka partigor molo dihaburjuhon (Jak 5:16b), ala memang donok do Debata di angka na porsea, ndang hea Debata mandao sian jolma, ai nungga tangkas dipajonok Debata dirina marhite Tuhan Jesus ala ni ma ringkot hita pajonokhon diri tu Ibana marhite ngoluna na denggan jala tigor (Jak 4:8).  Sai manatap do mata ni Jahowa tu angka partigor, pandohan ni mangondolhon taringot tu pangaramotion ni Debata. Dihatindanghon par Psalmen do diturpuk on jumpang do ngolu hasonangan di halak na mangulahon na denggan, atik pe jumpang angka hamaolon, sitaonon di angka na mangulahon na denggan I, alai marhite I ma gabe diuji, jala naeng ma marsihohot manghaposi Tuhan I, jala holan tu Ibana do hita mangalualu, ala ditangihon Debata do angukangguk ni partigor, donok do jahowa di angka na bojok roha, Ibana do paluahon, jala Ibana do mangaramoti.  Haporseaon dohot pangkirimon si songon I ma naeng tangkas ta hangoluhon.
4.      Ndang hea dihalomohon Debata hajahaton dohot hageduhon, jala marbiasbias do roha ni Debata tu angka siula hageduhon (5 Musa 25:16; Poda 3:23; 15:8,9,26,dna), jala hona uhum ni Debata do angka siula hajahaton dohot hageduhon (=ido pengalaman ni bangso Israel). Sasintongna ndang adong laba ni na mangulahon hageduhon dohot hajahaton, ai tu hamteaan do jambar ni I (Rom  6:23). Ndang jumpang hasonangan ni roha di angka siula hajahaton, jala laos boi do ta hilala pangontakna di ngolunta, molo taulahon na so denggan sai humasusa do ngolunta, sai busisaon do hita. Ala ni disungguli turpuk on do ngolunta asa taulahon ma ulaon na denggan, molo marungkil pe hita ala ni ulaon na denggan I, tapasahat ma saluhutna I tu Debata, asa margogo hita, asa benget rohanta mangadopi parungkilon i. Ai si Paulus sandiri dihatindanghon do ndang tarsirang ngoluna sian ragam ni parungkilon (Ef 6:20), ala ni tapangke ma lombulombu ni haporseaon I, molo Debata donganta ise ma alonta? (Rom 8:31).
5.      Antong Lului hamu ma na denggan asa mangolu hamu (Amos 5:14), jala pos ma rohanta diramoti Debata do hita jala ditangihon do tangiangta. 

BAHAN SERMON JAMITA PARTANGIANGAN
EPESUS 6:10-20
PANGKE MA LOMBULOMBU HAPORSEAON I
1.       Dipaandar do marhite turpuk on ia ngolu on I ma PERJUANGAN, ngolu na gok angka tantangan, parungkilon, alai disaluhutna ditogihon do ngolunta tu sada posniroha tu Tuhan I na sai tongtong mangaramoti angka na porsea i. Laho mangadopi angka hamaolon I dilumbahon do asa tapangke ma lombulombu haporseaon i:
-         Marsipatu mangharinggashon barita na uli, lapatanna tarjou do saluhut halak na porsea di Tuhan Jesus ditangungjawab laho pararathon barita nauli (Marturia)
-         Manjalo lombulombu haporseaon, ndang mungkin margogo jolma marbarita nauli molo so adong haporseaonna tu Debata, ai haporseaon I do dasorta laho manghatahon hata ni Debata, haporseaon ni do mambahen hita marhiras ni roha, mambahen hita mangolu jala margogo. Boha ma hita porsea tu Debata molo so rade hita manangihon hata ni Debata, I do umbahe didok si Paulus “Asa sian na tumangihon do ro haporseaon; ia panangihon i, sian hata ni Kristus do” (Rom 10:17)
-         Tahuluk haluaon, Molo maporang na jolo tentara Romawi ingkon dipangke do tahuluk na ditopa sian bosi manang tobi baja (helm) pertahanan, laos songon ni ma gombaran ni ngolunta, nungga dilehon Debata tu hita tahuluk haluaon I,  i ma Jesus Tuhantai, I do dasor lasnirohanta, I do dasor ni barita nauli, halak naung manjalo haluaon na sian Tuhan I tarjou laho paboahon ni tu saluhut na tinompa ni Debata.
-         Podang ni tondi, na marporang do hita di portibion mangalaho hagogon ni si bolis, ala ni ma ringkot pangkeonta podang ni tondi; I ma hata ni Debata, ai Hata ni Debata do SULUSULU, dohot TUNGKOT (Psalmen 119:105), hata ni Debata do gabe sinjata laho manjamothon ngolunta asa unang manimbil sian lomo ni roha ni Debata, I do umbahen didok di BE 25:1 “ Hatami ale Tuhanku, arta na umarga I, sai paian di rohangku unang so hutiop i. Molo so be sitiopan Hata na badia I, Aha nama haojahan ni haporseaon i.
-         Martangiang; mangido tu Tuhan I berarti membangun komunikasi tu Ibana, (Mat 7:7), jaminanna pasti di tangihon Tuhan i. Tarida do lapatan ni tangiang i patuduhon Ngolunta marsigantung tu Debata. Sikap laho martangiang tu Debata ingkon mardongan elekelek di bagasan tondi, lapatanna mangido dibagasan toruk ni roha, ndang mangasahon hadirion dohot hatauonta alai mangasahon asi ni roha ni Tuhan I do, prinsip na martangiang I ndang martingk(ala ni ringkotna), alai manontong (dungo jala jugul), I do umbahen  didok “Doa adalah napas kehidupan” (Hosa hangoluan), saurdot tusi do lapatan ni “ora et labora (Martangiang huhut mangula). Molo martangiang hita ndang hola na ringkot di dirinta sipangidoon, alai dohot do manangiangkon angka dongan sahaporseaon, dison idaonta ma fungsi  manang lapatan ni tangiang I laho pangoluhon hubungan secara Vertikal (relasi spiritual) dohot horizontal (relasi social), lao I do parbue ni holong i




[1] Ibr, tov:menyenangkan, menggembirakan, memberi kebahagiaan atau kepuasan yg mendampakkan kepuasan estetika atau moral. moral. Dalam kata Yunani disebut agathos, biasa untuk menerangkan gagasan yg ‘baik’ sebagai kualitas jasmani atau moral.