JAMITA : Roma 5:1-5

ASA DUNG DIPINTORI MARDAME MA HITA TU DEBATA DOHOT DONGAN JOLMA

1.       Sai tubu do sipata dibagasan rohanta mangarajumi dumenggan hita sian donganta,ummalo hita,dna  ujungna maol do hita mananda hahuranganta, maol hita mandanda dirinta, sai holan mamintori dirinta ma hita, sai tarajumi sumurung hita sian na asing, siang angka donganta, pangalaho si songon ni maol do tubu ngolu na masijanghonan, ngolu na mardame, ai ndang tubu ngolu na mardame molo sai holan mamintori dirina sandiri, alai manguhumi donganna. Songon ni do gombaran ni huria di Rom ujui I, na marsual nasida taringot tu dalan haluaon. Halak Jahudi mandok marhite na mangualhon patik do malua jolma i sian dosa. Alai marhite turpuk on dipaandar si Paulus ma ndanda ala ni hadirion manang pangulaon ni jolma dalan ibana gabe pintor di jolo ni Debata alai holan ala ni Asi ni roha ni Debata sambing do gabe malua jolma I sian dosana.

2.       Aha do dalanna gabe boi hita pintor diadopan ni DEBATA, alusna ima marhitehite dalan haporseaon.= Hidup berdasarkan iman:  (ay.1). Ganup jolma naung mangolu di bagasan haporseaon tu Debata, huhut tau ibana mangulahon godang angka na denggan hombar tu na hinaporseaanna, nunga dipintori Debata ibana sian dosana.

Ø  Ndang be jujuron ni Debata angka dosa dohot hahuranganna. I do na ginoaran ni poda pangajarion ni DR. Marthin Luther na mandok: “Sola fide”, lapatanna, dipintori Debata do hita holan ala ni haporseaonta di Ibana (ay.1).

Ø  Haporseaon,  i do dalan na ummarga di hita mangido sipangidoonta tu Debata. Molo mangido hita tu natorasta, manang tu donganta, nda na porsea do hita lehononna na itapangido i. Songon i do hita tu Debata. Asa mansai na ringkot do patuduhononta ngolu na marsihohot marhapor-seaon ala naung di pintori, manang di bela Debata hita.

Ø  Marhite Jesus Kristus do dapotan asi ni roha hita, i ma hajongjonganta nuaeng dalan haporseaon i, jala taparhatua do dirinta marningot hasangapon ni Debata na itahirim i. Gabe ungkap ma di hita pardamean naung pinatupaNa marhite Jesus Kristus Tuhanta i. I ma pardamean na tutu dohot Debata.

1.       Boha do hataridaan ni jolma naung dipintori Debata, Manaon diHaporsuhon manang kesengsaraan (ay.3). Asa boi hita sahat manjalo hamona-ngan di bagasan Kristus, ingkon rade do hita mamolus haporsuhon manang kesengsaraan. Nang pe paet jala parir do i nian, alai songon ubat na paet na manghorhon hamalumon do i di ngolunta, ingkon bolusonta do haporsuhon i asa lam tang jala matoras hita marhaporseaon di Tuhan Jesus.

Ø  Haporsuhon na nidokna dison, i ma haporsuhon ala ni Kristus manang ala ni Hata ni Debata, manang ala ni hasintongan i naung tartanom di ngolunta. Gabe menderita hita ala Goar ni Kristus disi do hita tutu dapotan asi ni roha sian Ibana.  Ai ndang sadia sitaonon na dihasiangan on martibanghon hasangapon sipapataron tu hita sogot (Rom 8:18).

Ø  Alani ni goar ni Kristus do umbahen na mangadopi haporsuhon, kesengsaraan hita di portibi on, pola gabe maol mangalului ulaon, humasusa tahilala ngolunta. Alai nuaeng roma Hata ni Debata na pasonanghon rohanta namandok: “Ai itahalashon do nang angka haporsuhon” (ay.3).

Ø  Nang di ngolu na di portibi on pe, ndang dapot pangomoan hita ia so olo loja dohot marharugian. Ndang dapot hamonangan hita ia soadong perjuangan manang paraloan. Ndang dapot hita  hasonangan ia so hea tabolus penderitaan.

Ø  Laos songon i do nang di ngolu Ha-Kristenonta, ndang dapot hasonangan hita ia so olo hita mamolus haporsu-hon, i ma bagian ni sitaonon ni Kristus i.

Ø  Tutu ma tapatuduhon ngolunta ganup tingki halak naung siap mangadopi haporsuhon i, ai disima hita dapotan pamintorion sian Debata.

2.       Tahapan na paduhaon, marHabengeton  = Ketekunan: ketabahan, ketahanan menghadapi serangan dan bahaya(ay.3). Manang ise naung lulus mamolus haporsuhon, jaloonna ma habengeton, gabe halak na tekun ma ibana di ngoluna. Halak na tekun di ngoluna, i ma halak na mempunyai kemampuan manaon haporsuhon. Ndang pola hansit be panghilalaanna nang pe ditaon ibana haporsuhon I ala porsea do ibana tu Debata na margogihon ibana. Ai nunga gabe halak na marhabengeton ibana. Sude do jolma di portibi on, ingkon mandapot bagian di sitaonon dohot hamaolon i. Alai kenyataanna, ndang sude jolma mampu boi manahan di sitaonon i ala ndang adong haporseaon dohot habengeton ni roha di ngoluna. Hape di horhon haporseaon i do habengeton ni roha. Manang ise na so benget ala ndang adong haporseaonna, talu ma ibana di parungkilon i.

3.       Tahapan na patoluhon, i ma: marHatauon (ay. 4). Lao mangantusi Hatauon on, dumenggan molo tapangke istilah: “Tahan Uji”. Songon mas naung tahan uji, nang pe matutung hot do kwalitasna ndang gabe pudar. Manang ibarat ni parsingkola naung tahan uji, molo jumpang pe ujian lulus do ibana. Manang songon dakdanak naung immun tu sahit, nang pe ro sahit i, ndang pola pintor mahua be ibana, ai nunga margogo mangadopi sahit i.

Ø  Songon i do halak Kristen na porsea di Tuhan Jesus, nang pe ro pangunjunan, manang sitaonon ndang pola mahua ibana, ala haporseaon i manghorhon habengeton jala habengeton i manghorhon haporseaon na tahan uji, i ma kemampuan mangadopi sude angka na masa di ngolunta siganup ari. Gabe halak na siap pakai ma hita mangadopi angka na masa di ngolunta on.

4.       Tahapan na paopathon, i ma: marPanghirimon manang pengharapan yang tidak mengecewakan: Angka halak na porsea di Debata ingkon tangkas ma mangolu di bagasan panghirimon di hamonangan na pinatupa ni Tuhan Jesus. Nang pe sipata masa sitaonon ndang luntur be panghirimonta ala nunga di ramoti Debata pardalanan ni ngolunta.

Ø  Songon sada halak partani na manghirim di hasil ni naniulana, nang pe ingkon loja, maheu jala hodohan ibana mangulahon ulaonna, alai ala marpanghirimon ibana di hasil ni naniulana, i do mambahen margogo ibana mangula.

Ø  Songon i do halak Kristen na porsea di Debata na manghirim tu hangoluan sogot i, i ma mambahen ibana margogo mangulahon na dumenggan di tingkinta saonari. Nang pe masa hamaolon, krisis ekonomi, moral dohot ketidak-percayaan maradophon dongan, hot do ibana marsitutu mangulahon na denggan ala ni haporseaonna tu Tuhan i. Diparbuehon i ma sada parbue na denggan na tau hangoluanta, i ma tumpal hangoluan naung pinarade ni Debata di angka na porsea di Ibana.