Jumat, 12 Juli 2013

BIK AGUSTUS 2013

Selasa, 06 Agustus 2013
Sijahaon:
Manogot  1 Kronika 11:10-19              Bodari Galatia 6:1-10
1. Marende BE. No. 15:4  Aut Na Saribu Hali Ganda 
Ø  Mauliate ma rohangku di Ho o Debata tongtong
dibaen sude denggan basamu naung nilehonmu di au on
ai dipatongon ho tongtong sude na ringkot di au on    
2. II Tess 3:5 Sai ditogutogu Tuhan i ma rohamuna tu holong ni roha ni Debata dohot tu habengeton ni kristus i

HATORANGAN
Tangiang di Paulus do turpuk on tu Tuhan Jesus Kristus anggiat di patogu Tuhan ni roha ni huria na di Tessalonik margogo nasida manjanghon dohot manghaporseai barita nauli napinasahat ni Apostel Paulus, laos boi tong huria I mangalehon dungkungan marhite tangiang  anggiat dipargogoi Tuhan I si Paulus laho marbarita nauli. Didok di turpuk on “sai ditogutogu Tuhan I ma rohamuna” na marlapatan sai gogo ni Tuhan I ma marhite Tondina na mambutbut sude angka hamaolon, parungkilon sian bagasan ni roha ni jolma ala ni parungkilonna manghaporseai Tuhan I, jala holan marhite Tuhan I angka naporseai ditotogu laho mananda holong ni roha ni Debata na sai tongtong margogoihon, mangaramoti angka na porseai (aya 3-4) sian angka tahitahi ni parjahat. Molo marungkil, manang mangadopi hamaolon hita, mansai ringkot do ngolu na marhabengeton (Kesabaran), habengeton dibagasan Kristus, lapatanna marningot dohot maniru ngolu ni Jesus na mampu mangadopi parungkilon, jala monang sian parungkilon I, ala ni ma didok si Paualus do “Marlas ni roha ma hamau mangkirim, marbenget ni roha di haporsuhon, jugulhon hamu martangianga (Rom 12:12), prinsip di ngolu ni na porsea, I ma :tetap mangolu pangkirimonna, unang mandele, alai tongtong manaontong ibana martangiang. Marhite ngolu na songon ni do hita mampu manghatindanghon hagogoon ni Tuhan i, jala saluhutna do boi tartuhuk hita angka parungkilon I molo sai marpangusandean hita tu Tuhan Debata na margogoihon hita. Nuaeng pe taadopi do ragam ni angka sipingkiran, gok angka kebutuhan hidup na manosak ngolunta lumobi biaya laho pasingkolahon dakdanak, masuk singkola sahat tu tingkat masuk perguruan tingggi. Marpangontak do sian sudut ekonomi ala dibahen pamarenta nuaeng kebijakan marhite menaikkan harga BBM (bahan bakar Minyak), mangorui subsidi tu BBM I gabe dipangke mangupuri angka na pogos melalui sistim BALSEM (Bantuan Langsung Sementara). Songon halak Kristen hita, sitangianghononta do anggita ture ni mardalan kebijakan I, ndanda holan kepentingan polilis sambaing, anggoat boi nian BALSEM I boi mangurupi angka na pogos dihamaolon ekonomi na niadopan nasida. Sada do siingotonna anggo pangurupion ni jolma ndang boi manongtong I” sementara” do, ala ni marpos ni roha ma hita tu Tuhan I, ai ndang holan bantuan langsung sementara anggo sian Tuhan I bantuan langsung manongtong do.
3. Tangiang Pangondianon
4. Marende  BE No 273 : 1, 3                JESUS TUHANKU RAJAI MA AU    BL.240a
1.  Jesus Tuhanku rajai ma au on Asa mangihut tu Ho au tongtong
Topot rohangku ingani ma i Unang be masuk na asing tusi
Jesus pasonang rohangku tongtong Asa marguru tu Ho au tongtong
3.  Nang pe mangonggop sibolis di au Jala magigi musungku di au
Ndada mabiar au pos rohangki Pangodinganku sai Jesus do i
Asal diida Immanuel i Ingkon sumurut sude musu i.

5. TANGIANG ALE AMANAMI

                                                                       


                                                                        Senin; 12  Agustus 2013
Sijahaon:
Manogot : 1 Kronika 14 :1-17                                                              Bodari Efesus 1:11-14
1. Marende  No. B.E . 467:1    Asi ni rohaM hupuji.
                                                                              
Ø  Asi ni rohaM hupu ji ala Ho manobus au. Di paIas Ho rohangku, ga-be soranganMu
Au. IngananMu rohanami. TondiMi manggohi i. Pangke dohot ngolunami gabe ulaulaMi.
2. Jakobus 4 :6  Alai lam gumodang do asi ni roha dilehon; ala ni i do didok: "Dialo Debata do angka na ginjang roha, alai dilehon do asi ni roha tu angka na serep marroha!                                                     
UNANG GINJANG ROHAM ALAI PASEREP MA ROHAM
HATORANGAN
Disada tingki manghahatai ma Ama ni Ogol dohot Ama ni Agul, dihatahon ama ni Ogol  ma taringot tu denggan basa ni Tuhan I na rade Ibana manghophop jolma sian pardosaonna, alai mintor tompu ma di alusi ama ni Agul mandok “anggo ahu ndang adong mardosa au bah ninna”. Dungi marhusari ma diroha ni ama ni Ogol gabe didok ama ni Ogol ma, boha I, ndang mungkin ndang adong dosam? Dungi disungkun ma, jadi ndang hea huroha ho margabus, manang marsala dompak donganmu? dungi ro ma alus ni ama ni Agul, ndang hea, laos didok muse huala sian sietektehonku torus do dengan parande dohot pangalahongku, ai burju do tong au marnatoras, ndang hela hubaeh hansit rohana. Alai disungkun ama ni Ogol ma, jadi molo sea ha dihalalo marsala manang mardosa ho, boha “bangga do ho ala soadong dirajumi ho hahurangan manang dosam? Jadi ro ma alus ni ama ni Agul mandok “ I do dah bangga do ibana ala soadong hea binahen na humoring tu dongan ninna mangalusi”. Dungi ro ma ama ni Ogol mandok “ ima dosam” ai gabe ginjang do roham hape. Didok marhite turpuk on, halak naporssea i ma halak rade paserephon rohana, diadopan ni Tuhan ni, jala mangolu marhite lomo ni roha ni Tuhan ni i ma dame dohot hasintongan (Yak 3:18), ndanda mangoloi hisaphisap ni daging (Yak 4:1-2). Haunduhon tu Debata marhite haserepon ni roha i do patuduhon ngolu namarhaimbaruon.Halak na unduk tu Debata tontu ndang dipangsahon be hadirionna, gogona, dohot hisaphisap ni dagingna. Jotjot do halak kristen maol mardame, maol mangidoo maaf tu donganna ujungna sai mian ma dibagasan Hosom, Teal, Elat, Late (Hotel), na mamboan parsalisihan. Molo disulingkiri aha do mambahen ni? Alusna i ma ala so olo hita patutoru diri, sai tarajumi do moru haraga dirinta molo sai jumolo hita mangido maaf tu dongannta, pangalaho i sasintongna boi do patuduhon ginjang ni roha. Marhite turpuk on dipangingot do hita asa padaohon ginjang ni roha, ai didok do di Yesaya 2:11 Angka * mata ni haginjangon ni jolma patutoruonna, jala tarjimput bahenonna hatimboon ni baoa, jadi sasada Jahowa timbul di ari na sasada i, jala di Poda 3:34 didok  “Ibana marengkelengkelihon halak pangelesi, alai dilehon do asi ni roha anggo tu halak na unduk marroha“. Antong tapaserep ma rohanta laho patuduhon naung tajalo asi ni roha ni Tuhan ni.
3. Tangiang Pangondianon
4. Marende B.E. No. 753:1,                                  Dipardalanan Jesus di jolongku
1.                    Dipardalanan Jesus dijolongku
Holong ni tanganMi manogu au
Nang di ngoluku Ho do sombaongku
Tung sonang mardalan raphon au.
Huboto do tangkas pangouonMu
Diiringiring Ho do langkangki
Sahat ro di ujung ni pardalanku
Togu ma au jonok tu lambungMi,

5. TANGIANG ALE AMANAMI




                                                                   
                                                                    Minggu, 18 Agustus 2013
Ev: Johannes 8:30-36                          Ep: Galatia 5:1-15
1. Marende  B.E. No. No. 9  HUPUJI HOLONG NI                               
1.   Hupuji holong ni rohaMu, o Tuhan Jesus, Rajangki.
      tu Ho hulehon ma tondingku, ai i do  pinangidoMi.
     Huhalupahon ma diringku, mamingkir holong ni rohaMu.
Topik: Molo Dipalua Ana I Hamu Na Malua situtu ma hamu
HATORANGAN
3. Tangiang Pangondianon
4. Marende B.E. No. 232   JESUS URUPI    BL. 116
1.  Sian sude parulian na arga Sada huboto hutiop tongtong
Jesus Tuhanku Ho arta na arga Na mangatasi sudena antong
Tangkup Tuhanmu tung tiop hataNa Sai pangasahon ma bagabagaNa.
2.  Naeng ho pistar ? Sai dapothon Tuhanmu Nasa na hurang   sai boan tusi
Tu pamodaiNa paunduk rohaMu Asa tiur sasude bogasMi
Tangkup Tuhanmu tung tiop hataNa Sai pangasahon ma bagabagaNa.

5. TANGIANG ALE AMANAMI





Sabtu, 24 Agustus 2013
Sijahaon:
Manogot: 1 Kronika 21:1-17                                Bodari, Efesus 4:11-16
1. Marende  B.E. No. No. 9  HUPUJI HOLONG NI                               
1.   Hupuji holong ni rohaMu, o Tuhan Jesus, Rajangki.
      tu Ho hulehon ma tondingku, ai i do  pinangidoMi.
     Huhalupahon ma diringku, mamingkir holong ni rohaMu.
2. Johannes 8:36 Molo dipalua Anak i hamu, na malua situtu ma hamu           
Las ma rohanta ala Nungga ditobus Tuhan I hita
HATORANGAN
Di taon 1880 di huta New Orleanas (California) marpungu ma torop jolma laho marnida na dipatudo  “lelang manuhor hatoban/budak halak Negro” atik pe nungga diorai pamarenta pangalaho i. Di acara lelang torop do jolma digadis, alai adong ma sada boruboru Negro na mansai uli rupana na di lelang jala godang do angka panuhor na menawar boruboru, jala adong do dua halak na marsiadu mambahen arga na timbo naeng manuhor boruboru, jala sahat ma tu arga na tumimbo,  dungi didok panggadis I ma: ise dope na barani mambahen arga natumimbo..?Dungi dialusi sahalak dolidoli (sahalak buruh tambang emas naung gabe mamora ibana), didok ma ahu manuhor, hugarar dua hali lipat ninna ibana. Dungi gabe diparengkeli jolma na torop I ma ibana, ai dirimpu na margaigait ibana. Alai dijonohi dolidoli I ma boruboru I, huhut didok ahu manuhor ho ninna. Dungi ditijuri boboru I ma ibana, alai diapus dolidoli ma tijur ni boruboru i sian bohina, huhut didok ‘beta ma ihuthon ma ahu’ ninna. Hape sian so panagaman di tonga dalan dipalua dolidoli I ma boruboru Negro I, jala dileon tu ibana sada harotas na patoranghon “surat pembebasan” tu boruboru I, marnida surat I gabe didok boruboru I ma tu baoi, “unang parmeampeam ahu’ ai nangkin nungga di tuhor ho ahu jala ho nama nampuna ahu ninna, dungi dialusi bao I ma ibana, “tutu doi, alai hutuhor pe asa boi do ho paluahonku” laho ma ho nungga bebas be ho ninna. Alai mambege I gabe tangis ma boruboru huhut marsinggang ibana di jolo ni bao I huhut dibereng boi di bao I jala didok “ai nungga ditobus ho ahu, jala nuaeng pe rade do ahu manghobasi aha na ringkot di ho, jala ndang olo ahu manadinghonhon. Hamu angka dongan las do roha ni boruboru ala nungga ditobus jala dipalua ibana. Songon ni hita nungga dipalua, jala di tobus Tuhan Jesus sian parhatobanon ni dosa, ala ni mandok mauliate ma hita tu Debata, naung marsuru Anakna Tuhan Jesus asa dapotan haluaon hita. Antong tahaporsea ma Ibana dalan tu hangoluan ni, asa sahat hita tu ngolu na manongtong i. Amen
4. Marende No B.E. No. 150:1-2 NDANG AU NAMPUNA AHU
1.     Ndang au nampuna ahu Hulehon diringkon
   Tu Tuhan i Rajangku Sigomgom tano on
   Ai dibagasan Jesus au Diida  Debatangki Na pasonangkon au.
2.   Ndang au nampuna ahu Dung mate Jesus i
   Dihophop do tondingku Disesa dosangki
   Tongtong ma hupasahat au Mangunduk tu Tuhanku Na lambok roha i.

5. TANGIANG ALE AMANAMI


                                                                     


                                                                        Jumat, 30  Agustus 2013
Sijahaon:
Manogot: 1 Kronika  24:1-19                                               Bodari Efesus 4:30-32
1. Marende  No. B.E . 467:1    Asi ni rohaM hupuji.
Asi ni rohaM hupu ji ala Ho manobus au. Di paIas Ho rohangku, ga-be soranganMu
Au. IngananMu rohanami. TondiMi manggohi i. Pangke dohot ngolunami gabe ulaulaMi.
2.Jesaya 40 :31 Alai angka na marhaposan tu Jahowa maruli hagogoon mardapotdapot, gabe marhabong ni * lali laho manaek. Marlojongi nasida ndang olo loja, mardalani nasida ndang olo mandate
                                                                    MARHAPOSAN TU JAHOWA MA HO
HATORANGAN
Jotjot do hita marduaroha tu Debata, dihata tadok hita marhaposan tu Debata, alai di roha tapangasahon do hagoon na asing. Sasintongna halak na mardua roha tu Debata, ido patuduhon ndang porsea ibana tu Debata. Jotjot do ala ni mammon na diportibion gabe mambahen hita ndang manghilalahon pandonganion ni Debata, sai tapangasahon do hagogoonta, hamaloonta, hamoraonta jala hinorhon ni i mamabahen hita holang sian Debata. Molo songgop angka parungkilon, hamaolon olo do lao rohanta mangido pangurupion sian hagogoon na asing, manungkun datu, manguhumi dongan, dohot angka na asing. Marhite turpuk on, dipaingot do hita asa tongtong MARHAPOSAN tu Debata, halak na marhaposan tu Debata dipatudos do songon pidong rajawali na maruli hagogoon mardapodapot. Mangihuthon pande bisuk ia pidong rajawali molo nungga matua gabe martungkar do muse habongna, gabe tubu habong na imbaru, jala hinorhon ni gabe margogo naiimbaru muse laho rajawali i laho manaek. Songon ni ma dipatudus ngolu na porsea i, molo lam matua pe dangingta, lam godang angka pengalamanta, lam margogo do hita mandalani ariari ni ngolunta. Dipaingot turpk on do hita asa unang hita mapangunsandean tu pingkiran, tu gogonta sandiri, alai marhaposan tu Debata hita sian nasa rohanta, asa Ibana pature dalannta. Tahaporsean ma Debata nampuna hagogoon ro di salelenglelengna! (1 Pet 5:11), di lehon Debata do tu hita Tondi Hagoon, antong togu ma rohanta dibagasan Tuhan ni dohot dibagasan hagogoon na togu I, tapangasahon ma hagogoon ni Tuhan I uju ro parungkilon di ngolunta. Amen
               
3. Tangiang Pangondianon
4. Marende B.E No. 180:1,2                                 RO TU JESUS HO NA LOJA  
1. Ro tu Jesus ho na loja Na maheu i
    Lam lumbang do di lambungNa Rohami
2. Bereng di hau pinarsilang Daon ni sahitmi
    Tuhanmi na hona uhum Singkatmi.

5. TANGIANG ALE AMANAMI




                                                                   
                                                                    Sabtu; 31 Agustus 2013
Manogot 1 Kronika 24:20-31                               Bodari : Efesus 5:1-4
1. Marende No: B.E. No.17:1     RAJA NA TUMIMBUL 
1.   Raja na tumimbul Sigomgomi hami Jalo ma pujiannami
      Denggan ni basaM do Pangoluhon hami Atik pe mardosa hami
      Sai apoi pargogoi hami mangendehon SangapMi o Tuhan
2.Jeremia 30:8 Dung i di ari na sasada i, ninna Jahowa Zebaot, ponggolhononku ma * augana sian tangkuhukmu, jala rapuanku angka tali pangihot na di ho, jala ndang be halak ruar marhatobanhon ibana

ASI NI ROHA  DOHOT UHUM
HATORANGAN         
Isara ni sahit, nungga borat (kronis) sahit na diboanboan ni halak Yuda ala ni dosa dohot pangalaosio
nasida tu Debata. Ala ni Dosa i do gabe tarimas Debata laho manguhum bangsoNa.  Molo nungga marsahit posa jolma ndang mungkin be ibana sandiri pamalumho sahitna, ingkon dokter spesialis nama, asa boi selamat. Diturpuk holan Debata sambaing nama na boi pamalumhon manang paluahon bansoNa. Sitaonon manang uhum na dituhuk ni bangsoNai gabe sada dalan I asa mananda bangsona di dosaNa, jala anggiat dipauba rohana. Debata sandiri do patubahon haimbaruon (transformasi) tu bangsoNa ,asa mulak muse  mangoloi Jahowa, unang marduaroha, unang gabe manomba Debata sileban. Memang bangko ni hajolmaon olo do molo songgop angka pangunjunan dohot parungkilon gabe so torang pe pangkilalaan, marsak, muruh, marungutungut, manihasi, manguhumi, ujungna gabe manimbil sian lomo ni roha ni Debata. Tarunjun do bangsona gabe madabu tubagasan dosa, jala manadinghon Debata, jala mangido pangurupion sian hagogoon ni portibion, jala ujungna gabe diparhatoban do bangso i. Songon ni do ngolunta, molo mandao hita sian Tuhan I, gabe olo hita diparhatoban hagoon ni portibion, ujung na gabe saluhutna parulaonta holan marojahan sangkapsangkap ni pardangingon. Lumobi di partingkian nuaeng on, lam maol jumpang hita ngolu na masiurupan, masihaholongan, alai nungga gumodang sangkapsangkap ni roha dohot pingkiranta mangarajai parngoluonta. Maol do laho manghatindanghon hasintongan, maol do jumpang hita uhum na tingkos, keadilan, alai nungga sai halak na gumogo mangasahon hagogoonna, mangasahon hamoraonna, mangasahon habisuhonna, ala ni ma gabe lam tartogu do roha ni jolma nuaeng mangasahon hadirionna. Marhite turpuk on diajouhon do tu hita asa martangiang hita tu Tuhan I anggiat marhite asi ni rohaNa dilehon haimbaruon tu ganub jolma. Tatangianghon ma anggiat bangkit angka panggomgomi na marsahala, asa boi mangalehon ngolu na marhadumaon tu  masyarakat, uhum nasintong, keadilan, keamanan, kesejahteraan, dohot lan angka na asing. Haimbaruon na dipatuba Debata dibagasan Kristus, ido na gabe ojahan di ngolu ni angka na porsea, ala ni olo ma hita dipaimbaru, asa boi hita mamboan haimbaruon tu tongatonga ni keluarganta, tu masyarakat, diulaonta, dohot di sude  pangulaonta sai tongtong ma Tuhan ni tahaposi, jala unang be sai tahalomohon mangulahon dosa i.
3. Tangiang Pangondianon
4. Marende BE No 183:1,3 NA JUMPANG AU  
1.   Na jumpang  na asi roha  Di au naung mago i hian
 Tuhan Jesus parasi roha Di au na lilu na hinan
 Nuaeng hutanda Tuhanki  Parasi roha bolon i . Parasi roha bolon i
3. On pe holan asi ni roha Dipangasahononhon i
 Sipujionku do Jahowa Dung ro na pamanathon i
     Unduk huhut las rohangki Mamuji asiroha i. Mamuji asiroha i.

5. TANGIANG ALE AMANAMI