Minggu, 09 Februari 2014

BIK MARET 2014




Selasa; 26 Maret 2013
Sijahaon:
Manogot  1 Rajaraja 22:1-12                                                                Bodari; Ulaon 26:24-32
1. Marende BE. 467: 1                           Asi ni rohaM hupuji.
Ø  Asi ni rohaM hupu ji ala Ho manobus au. Di paIas Ho rohangku, ga-be soranganMu Au. IngananMu rohanami. TondiMi manggohi i. Pangke dohot ngolunami gabe ulaulaMi.

2.Poda 18:14 Baoa partondi na pir manaon, i ma paneang parsahitonna, alai anggo partondi na gondok, tung ise ma manganjusa

PARTONDI NA PIR PANEANG PARSAHITON
Hatorangan
Mangihuthon pande bisuk, gumodang do tubu angka sahit sian ‘pingkiran, sian roha ni jolma, lapatanna godang pengaruh ni sikap ni ngolunta tu parngoluonta. Sada na arga di ngoluon i ma, hidup ini harus memiliki “KEMAUAN”, SEMANGAT HIDUP. - Abraham Lincoln  mandok “Sukses berjalan dari satu kegagalan ke kegagalan yang lain, tanpa kita kehilangan semangat”. Didok di pepatah Indonesia “Dimana ada kemauan disitu ada jalan”. Pandohan ni mangondolhon hinaringkot ni “semangat hidup” unang mura mandale, mandate, ai boi do molo sae holan torus marsak, mandele, mandate gabe patibuhon hatop mate. Boi do mate pangkillaan, mate semangat, pesimis, ujungna gabe tubu ma angka sahit. Hombar tu turpuk rahasia ni ngoluon ditontuhon songon dia do sikapta (roha parbagason). Molo marsahit hape hita, ndang apala OBAT PIL sambing na manontuhon hamamalum ni sahitta, alai rohanta do, i do umbahen didok di Poda 17:22 “Roha na hilas manumpak hahisaron, alai anggo tondi na gondok pamalas holiholi”. Lapatnna godang do pangkorhon roha parbagason manumpahi hamamalum ni sahitta, jala mambahen sumuang gogonta.  Lumobi di zaman teknologi informasi nuaeng di jamothon do hita asa marbisuk hita manjaga roha dohot pingkiranta asa unang tarela ngolunta tu tondi ni zaman on, mangulahon angka na so dihalomohon Debata, issara ni parmabuhon, parjujion, pangalangkupon, dohot lan na asing, jala saluhutna i patubuhon angka sahit, dosa di ngolunta. Halak na marbisuk i ma halak na managehai angka na uli na denggan, didok di Pilipi 4:8 “Angkup ni i, ale angka dongan, pingkiri hamu ma nasa parange na sintong, na daulat, na tigor, na bontor, na uli, na denggan begeon ro di sude na targoar haburjuon, na tau pujipujian”. Antong ditogu, jala dipaingot turpuk on do hita asa tongtong hita “semangat”(spirit), marlasroha, positif thigking, optimis di ngolunta, dungi margogo ma hita laho mangadopi angka hamaolon di ngolunta on.
3. Tangiang Pangondianon
4. Marende B.E. No.140:4   GIRGIR MA HAMU 
Ø  Asi ma rohaM Ale Debata Pasaut ma hataM Tumpahi  nama
     Sude na niula Ni naposoM Sai baen ma martua Sude jolma pe.

5. TANGIANG ALE AMANAMI











Rabu; 27 Maret i 2013
Sijahaon:
Manogot: 1 Rajaraja 22:13-18                                                                                             Bodari:   Ulaon 27:14-20
1. Marende BE No B.E No.36 PASU PASU HAMI 
1.   Pasu pasu hami O Debata nami
      Sai sondangkon bohiMi Tu na pungu on sude
2.   Lehon ma di hami Dame ganup ari
      Sai pasaor ma  TondiMi Tu na pungu on sude

2. Psalmen 118:26 Pinasupasu ma na ro marhitehite goar ni Jahowa, hupasupasu hami ma hamu, angka na sian bagas ni Jahowa
DIPASUPASU TUHAN NI DO HITA
HATORANGAN
Pasupasu (berkat) i do padan jala janji ni Debata tu si Abraham, dipasupasu Debata Ibana jala gabe pasupasu nang ngoluna (1 Musa 22:2-3). Sasintongna martudutudu tu Tuhan Jesus do pandohan i, ai ibana do pasingkonhon padan ni Jahowa, laso marhite jala IBANA do dalan ni pasupasi ni Debata tu saluhut na tinompaNa. Mamboan pasupasu do misi (ulaon) ni Jesus rot u portibion, IBANA do na sasintongna na ro marhitehite goar ni Jahowa jala na mamboan pasupasu i. Angggo pasupasu na sumurung jala na umarga di ngolunta i ma pasupasu partondion, HALUAON ni Tondita sian gomgoman ni hamatean i. Haluaon ni ndang boi marhite gogonta sandiri, ndang boi mangasahaon hapintoranta, dohot hatauonta, ndang adong sian hadirionta na tapangasahon, alai holan marhite asi ni rohana sambing do. Marhite IBANA, jala sian IBANA sambing do pasupasu di ngoluntaon, isara ni pasupasu pardangingon (hamoraon, hagabeaon, hasangapon), dohot pasupasu partondion. Molo tarajumi do holan sian Debata do saluhutna pasupasu na tajalo i, tarjou ma hita manghangoluhon ngolu: Parjolo, Tongtong mandok mauliate, mamuji jala pasangaphon Debata, ndanda holan marhite hata alai tarida marhite parange dohot pambahenan. Paduahon, marpangkirimon ma hita tu Debata, na mora do Tuhan i, na tuk mangusehon ragam ni pasupasu di hita. Godang do pasupasu na tajalo manipat taon 2013, jala sahat di ombas on. Ndang holan sinamot (hepeng, arta) rumang ni pasupasu, molo mangolu pe hita nungga ndang habilangan hita be pasupasu ni Debata di ngolunta on, isara ni hipas do hita, boi do tapasingkolahon ianakkonta, tamba do pandaraman, gabe na niula, sinur na pinahan, dna. Ala ni mangolu ma hita dibagasan TUHAN ai nungga ro Ibana mandapothon hita, antong tadapothon ma Tuhan ni marhite parsaoranta mamuji IBANA di bagas jorona na badia i, AMEN.
3. Tangiang Pangondinon
4. Marende B.E No.792:1,2 Pasu-pasu hami O Tuhan
1.                    Pasu-pasu sai usehon dameMi,
Sai ampehon tanganMi Tuhan,
Lehon tu au gogoMi di portibion
Baen ma au Tuhan habaoran ni las ni roha
Tu na marsak I tu na dangol I gabe pangapuli i.
2.                    Diportibion, baen ma au Tuhan,
Monang maralohon dosa dibahen gogoMi,
Talu musu I sibolis pangago i.
Pasu-pasu hami O Tuhan ………

5. TANGIANG ALE AMA NAMI


Kamis, 28 Maret 2013
Sijahaon:
Manogot: 1 Rajaraja 22:19-28                                                             Bodari: Ulaon 27:21-32
1. Marende No: BE. No. 14:2+3     PUJI HAMU JAHOWA TUTU        
Ø  Ingot tongtong, ale tondingkon, Sude na denggan na dipasonggop Debata tu ho.
Denggan basaNa do na pangoluhon ho.
Ø  Nda tung adong, pargogo tongon, Na martudosan, tu Tuhan Debata di surgo i.
Sun hinagogo, sun hinagogo i.
2. Mateus 26:37-38. Dung i ditogihon ma si Petrus dohot anak ni si Sebedeus na dua i, dung i gabe marsak situtu ma Ibana jala bobonosan.Jala didok ma tu nasida: Mansai marsak situtu do rohangku, hira na mate do. Dison ma hamu, dungo rap dohot Ahu
DUNGO JALA MARTANGIANG
HATORANGAN
Songon jolma na gale hita, marsak jala bobonosan do rohanta mangadopi sitaonon dohot parungkilon. Jotjot do taadopi ragam ni krisis di ngolunta. Aha sipatupaonta jala beha do hita mangadopi krisis dipardalanan ni ngolunta na boi mambahen marsak, biahaton huhut bobonosan rohanta? Dipaanda do di turpuk on arsak ni Tuhan Jesus di Getsemane i, mansai marsak situtu do Jesus jala bobonosan, hira na mate panghilalaanNa (ayat 36 – 38, bd. Mark 14:33). Di na marsak jala bobonosan ima, laho ma sahalakNa martangiang. Sahalak ni Jesus do mangadopi krisis i. Dibagasan bahasa Gorik, ia "marsak" marharoroan sian hata EKTHAMBEOMAI (marlapatan ‘be greatly alarmed’ : sangat takut). Jesus manghilalahon ingkon Ibana nama na mangadopi angka sitaonon na naeng masa i. Nang pe rap Jesus dohot angka siseanNa i alai marsak jala biahaton rohaNa. Nadihilalahon Jesus i, jotjot do ra tahilalahon. Diragam ni angka na masa di ngolunta on boi ro arsak ni roha jala bobonosan. Di sitaonon dohot parungkilon na mambahen marsak jala bobosan arop rohanta adong dongan na mandongani jala mangalehon pangapulion di hita. Ima nadipataridahon hajolmaon ni Jesus songgop namasa on di Ibana.
Dipangido Jesus di Getsemane i asa rap angka sisean i dohot Ibana huhut dungo raphon Jesus. Nanihilala ni Jesus di Getsemane i ra boi do tahilalahon. Diparngoluonta on olo jala boi do marsak, bobonosan huhut manghilalahon ndang adong donganta mangadopi parungkilon dohot sitaonon na ro di parngoluonta. Apalagi molo taboto naeng masa na buruk di ngolunta. Disituasi na songoni tontu sahali marsak jala lungun rohanta, biahaton huhut bobonosan hita. Alani ringkot di hita dongan na mangalehon gogo huhut pangapulon mangadopi parungkilon manang sitaonon i. John White mandok, "kita sangat memerlukan dukungan manusia karena kita tak pernah betul-betul belajar untuk bersandar kepada Allah’. Diparngoluonta manontong do pangelaelaon ni sibolis i asa madabu hita tu pangunjunan, ragam ni angka sitaonon dohot parungkilon na ro di ngolunta na naeng mangalononghon hita tu arsak ni roha, biahaton jala mambahen rohanta bobonosan, dihatiha i ma hita pajumpa dohot Tuhan Jesus Sipalua jala Siparmonang – molo tahangoluhon songon haporseaon sahalak dakdanak na marpos niroha huhut manghaposi Debata Amanta i di sangkap dohot lomo ni rohaNa, Songon tangiang ni Tuhan Jesus ma tangiangta, "Ale Amang, ndang guru di rohangku alai di rohaM do". Ditangiang na songoni ma gabe margogo hita mangadopi ragam ni parungkilon dohot sitaonon nang pangunjunan. Kepasrahan dan ketaatan, itulah kunci dari segala yang harus dilakukan pada saat kita mengalami penderitaan dan persoalan hidup. Boi do hita martangiang sian roha na tulus dohot ikhlas tu Debata songon tangiang ni Jesus, "Ale Amang, ndang guru di rohangku alai di rohaM do" ? Ra, gumodangan do hita mandate jala frustasi huhut manungkun boasa dipaloas Debata parungkilon dohot sitaonon i songgop di ngolunta. Jotjot do ra hita mandok, na so dihaholongi Debata be hita molo ro parungkilon dohot sitaonon i. Di roha na marpangoloion dohot marhaporusan tu Debata disima boi taida pandonganion dohot pangaramotion ni Debata di ngolunta. Marhite sitaonon dohot parungkilon na masa dingolunta dipapatar Debata do huaso dohot holong ni rohaNa i. Marhite parsorion dohot parniahapan i dipangido Debata tu hita asa lam pajonokhon diri tu Ibana huhut asa lam marpangunsandean tu Ibana. Molo tajalo parsorion nang parungkilon i sian roha na ias dohot na bulus tu Debata disi ma boi idaonta angka nauli dohot na denggan dibalik ni angka parniahapan i. Songon sitaonon dohot parungkilon na masa di Jesus, hinorhon ias, roha na bulus tu Debata dohot roha na marpangoloion manjalo huhut mandalani angka sitaonon i gabe taruli di haluaon dohot hasesaan ni dosa jolma i sian Debata (bd. Fil 2:8). Marhite roha na marpangoloion di sangkap ni Debata, ditaluhon Ibana do ihot ni dosa dohot hamatean i (bd. Roma 6:23;8:10; Gal 1:4; Kol 1:14). Amen.


3. Tangiang Pangondianon
4. Marende No 124:1,2
5. TANGIANG ALE AMANAMI



JUMAT AGUNG, 29 Maret i 2013
Pesta Parningotan Hamamate ni Tuhan Jesus
Ev: Mateus 23:33-39                                                                             Ep: Jesaya 53:1-9
1. Marende No: B.E No. 117  JAHOWA DEBATANTA DO  
Ø  Gogonta ndang haposan i, Tibu do mago hita;
Pinillit ni Jahowa i, Na tuk pamonang hita
Ai ise goar ni ? I ma AnakNa i Tuhanta Jesus i 
Sigomgom sasude Na so tarbahen so monang

SILANG NI KRISTUS DOHOT HASESAAN NI DOSA

HATORANGAN
1.      Ganup sahat hita tu parningotan di hamamate ni Tuhan Jesus, sai dipasunggulhon do tu hita angka dosanta na taulahon ganup ari. Napaadop-adop do hita nuaeng rap dohot Jesus na tarsilang i, tapahusor-husor jala taauhon ma tu rohanta sitaonon ni Jesus Tuhanta i asa anggiat marhite i gabe partohap hita di SilangNa i.
2.      Dipaandar do diturpuk on hinajorbut pangalaho ni halak Parise, na munafik, na mangajumi dirina sintong, alai sasintongna tong do ndang marimbar pangalaho nasida sian angka pangalohi ni ompu nasida. Ndang na buni di adopan ni Tuhan i, pata do sude angka pangalahonta. Laos i do sipata gombaran ni ngolunta, ai jotjot do hita mangarajumi dirinta nungga sintong jala nungga jolma na denggan hitam hape anggo dibagasan rohanta gok dosa do. Marhite turpuk on dipaingot do hita taringot tu uhum ni Debata tu angka siula hajahaton, alai laos di jou do hita asa olo bongot manjanghon asi ni roha ni Tuhan i, laos i do na taingot di parningotan ni hamamate ni Tuhan Jesus. Alai halak na so manjanghon asi ni roha  ni Tuhan ni berarti tagamomna ma uhum na jorbut sian Tuhan i (38-39).
3.      Marhite turpuk on disungguli do rohanta: Parjolo, Ingotma asi ni roha ni Tuhan Jesus naung mate humonghop hita, ala ni tapaholang ma dirinta sian ragam ni dosa, na mamboan hita tu hamatean na salelenglengna. Paduahon, Janghon ma Jesus di ngolum, naung mate tarsilang humonghop hita marhite na olo hita paubahonrohanta. Patoluhon, Ingot ma na ro do Tuhan ni paduahalihon laho pasinghophon haluaonNa tu angka na porsea di Ibana, jala mangaalehon Uhum tu na so olo manghaporseai Ibana. Molo marungkil jala marsitaonon pe hita di portibi on, taingot ma nunga mate Tuhan Jesus manghophop hita jolma pardosa. Ndang sadia dope na tinaonmu martimbanghon na tinaon ni Tuhan Jesus. Tahangoluhon ma SilangNa i ganup ari, ala rade do Ibana manghophop hita asa di hita hangoluan sisaleleng ni lelengna i. Amen.

4. Marende B.E No. 28:4   HATA NI JAHOWA 
Ø  Hata hangoluan do nuaeng diboan  Parjamita i.
                Na lambok begeon i nuaeng dilehon  tu rohanta i.
                Hita on dijamita i,  ai didokkon be do hita paubahon roha.

5. TANGIANG ALE AMANAMI






Sabtu, 30 Maret i 2013
Sijahaon:
Manogot  1 Rajaraja 22:29-40                                                                                              Bodari : Ulaon 27 :33-44
1. Marende No: 476:1                           NDADA AU GURU DI AU
Ø  Ndada au guru di au be, Jesus do nampuna au.
Las rohangku dung hubege, Jesus sipangol au.
Ndang  be au guru di au. Jesus na humophop au,
Nampuna au. Tung saleleng au mangolu, Jesus do nampuan au.

2. Rom 8:18 Ai hurajumi angka sitaonon di hasiangan on, hira na so adong do martimbangkon hasangapon sipapataron tu hita sogot
Sitaonon dohot siteanon
HATORANGAN
1.               Ndang tarsirang “sitaonon” dohot “siteanon” di ari sogot (Rom 8: 14 – 30), molo marungkil, jala marsitaonon  hita ala ni haporseaonta di Tuhan i, sasintongna i do bagian ni konsekwensi laho mangihuthon Ibana. Rais jala maol dalan sidalananta molo mangihuthon TUHAN i,ala i rajumanta do angka sitaonon na dihasiangan on, hira so adong do i martimbanhon hasangapon sipapataron na tu hita sogot. Pangkirimon dohot  ‘setaonon’ sogot, i do na mangonjar hita margogo patupahon angka ulaon na denggan. Parsatongkinon do ngolu na di portibion, parsatongkinon do parungkilon na di hasiangan on. Molo Marungkil do hita sian segi ekonomi, politik, parkarejoan, dna, sasintonnga ndang sukunonta boasa ingkon marungkil hita, alai dohononta ma aha do lapatanna ni parungkilon i di ngolunta. Setiap masalah pasti adong do ‘hikmat ‘ na di ngolunta. Boi do sian MASALAH i gabe taruli ‘eMas hita, boi do sian ‘air mata’ gabe parohon ‘mata air” Pepata ni halak Yunani mandok “Emas yang murni diperoleh melalui proses pembakaran dengan api dan penyaringan”, laos songon ni gombaran di proses ni ngolunta. Pepatah Cina mengtakan “Permata  tidak  dapat  menjadi   berkilau  tanpa  gesekan, demikian  juga  manusia  tidak dapat  menjadi  sempurna   tanpa pencobaan”.
2.               Alan ni marhite turpuk on disungguli jala diapuli do hita asa unang mura mandele. Unang fokus holan mamingkiri paringkilon i hita, alai ingkon adong do pangkirimon dibagasan parungkilon i, ai ndang ro di saleleng ni leleng hita marungkil.

4. Marende   BE.No 426:1,2

5. TANGIANG ALE AMANAMI






MINGGU, 31  Maret i 2013
PASKAH I
Ev: Mateus 28:1-10                                                                                               Ep: Ulaon 3:11-16
1. Marende B. E No. 247:3-4                  SAI HEHE MA HAMUNA, HAMU, 
Ø  Ndang jadi haposanmu Gogom sandiri, da
                Ai tung na so hasea Do i di Debata
                Sai naeng basahononNa Di ho sinjatami
                Ai ndang tarbaen so talu Musuna baenon ni.
Ø  Manaon ma ho satongkin Di paraloan i
                Tibu do i marujung Dibaen Tuhanta i
                Dung i partumpalanna Ma ho di surgo
                Donganna ho manggomgom HarajaonNa i.

UNANG MABIAR, NUNGGA HEHE JESUS I
HATORANGAN
Haheheon ni Jesus sian na mate i do bagian na sangat sentral dipangulaonna laho manghamonanghon hamatean sian dosa. HaheheonNa patuduhon ndang mansohot dibagasan hamatean ngolu na porsea jala manjanghon IBANA. Debata na tatanda dibagasan Kristus ndanda Debata na “mate” alai Debata na “mangolu” do. Marhite haheheon ni Kristus dapot hita ma dia do lapatan ni haheon ni di ngolu ni haporseaonta:
Parjolo: marhite haheheon ni gabe sintong ma hata ni Debata. Nungga tangkas hian nian dihatahon Jesus taringot tu hamamateNa dohot haheheonNa. Sian Padan na robi pe nungga dipatuduhon tanda na martudutudu tu haheheon ni Jesus i ma marhite pengalaman ni si Jonas na dibutuhan di ihan saleleng 3 ari, na manggombarhon Jesus mate saleleng toru ari.
Paduahon:Haheheon ni Jesus i ma sada peristiwa na luar biasa (halongagan, jala hahomion). Ndang boi tanoman i maniopi huaso dohot hagogon ni Debata. Lapatanna ndang boi ditaluhon jala dipatunduk sorop ni hamatean ni huaso ni Debata, alai sebalikna ditaluhon Debata do dibagasan kristus hamatean i.
Patoluhon : Marhite haheheon ni Jesus gabe patar ma pandonganion dohot jaminan ni ngolu na porseai di adopan ni Debata. Ngolu na marhamonangan do jambar ni joma na porsea tu IBANA.  I do pos ni rohanta molo marungkil jala mangadopi sitaonon pe hita di portibion. Alani ni ditogu do ngolunta asa marpos ni roha jala marpangkirimon tu Debata. Unang mabiar hita di ngolu on atik pe marragam do mambahen hita asa gabe tahutan jala mabiar. Alai tapangke ma roha biar i gabe dalanta laho pajonokhon diri tu Debata, asa margogo jala hehe hita sian na dibagasan haholomon tu hatiuron, hehe sian halosohon tu ngolu na marharinggason, hehe sian hapogoson tu ngolu na marhadumaon, hehe sian haotoon tu ngolu na marbisuk, hehe sian ngolu na tarpodom tu ngolu na sai dungo haporseaonta. Antong haposi ma Jesus naung monang i asa monang hita maralohon elalea ni si bolis di parngoluonta. Amen               
3. Tangiang Pangondianon
4. Marende No B.E No. 91  HATUAON DO  
1.   Hatuaon do Las ni roha do Hangongot ni Tuhanta i
      Mago do hita Ngot ma Tuhanta Las be, las be ma rohanta i.
      Mago do hita Ngot ma Tuhanta Las be, las be ma rohanta i.
2.   Hatuaon do Las ni roha do Hangongot ni Tuhanta i
      Monang  do Jesus Talu sibolis Las be, las be ma rohanta i.
      Monang  do Jesus Talu sibolis Las be, las be ma rohanta
5. TANGIANG ALE AMANAMI