Matius 21:23-32

Bahan Sermon Jamita tu  Minggu 01 Oktober 2017

Ev: Matius 21:23-32                                            Ep: Psalmen 25:1-9

Topik: MANANDA DOHOT MANGHANGOLUHON LOMO NI ROHA NI  I DEBATA

Mananda dohot manghangoluhon lomo ni roha ni Debata ido hataridaan ni halak naung manghaporseai huaso dohot pambahenan ni Debata. Ndang tuk pingkiranta (logika) laho mananda Tuhani, holan marhite huaso ni Tuhan i do hita dipatau manada Ibana, marhite na rade hita manjanghon hataNa. Ala ni do didok: Marhaposan tu Jahowa ma ho sian nasa roham, jala unang marpangunsandean ho tu pingkiranmu sandiri..Sai Ibana ma tanda di nasa dalanmu, asa Ibana patigor angka dalanmu (Poda 3:5-6).

1.Unang ho marpangunsandeon tu pingkiranmu sandiri, tanda jala haporseaima huaso ni Debata dingolum (23-27). Diturpuk on diunjuni, disungkun sintua ni malim dohot sintua ni bangsoYahudi do Tuhan Jesus taringot tu Huaso dia do dipangasahon Tuhan Jesus laho mangulahon ulaonna. Sasintongna sungkunsungkun i ma sada dalan laho mangalului hasalaan ni Tuhan Jesus. Alai marhite sugkunsugkun nasida, laos dialusi Jesus do muse mangalusi marhite sungkunsungkun taringot tu huaso sian do muse molo pandidion ni Johannes Pandidi? Metode sungukunsungkun dialuasi muse marhite sungkunsungkun i ma sada habisuhon na dipatuduhon Tuhan Jesus sian  “jorat” na binahen ni sintua ni malim. Sungkun sungkun ni Jesus i mambahen sintua ni malim dohot sintua ni halak Jahudi gabe marungkil mambahen alus. Tangkas do nian di boto jala ditada nasida ise do Johannes pandidi, sahalak panurirang na diakui do ibana di tonga ni halak Jahudi, alai bankol do nasida laho mangalehon alus na sintong i, umbiran do nasida mamereng jolma sian Debata, dungi dihatahon nasida ma alus na paluahon dirina marhite na mandok “ndang diboto nasida”. Torop do jolma mabiar mandok na sintong ala ni manjaga “kepentinganna” mambahen “Ilmu selamat” on hadirion jolma na marpangnsi (munafik), asing di duru asing dibagasan rohana. Hadirion ni jolma si songon ni dang di halomohon Tuhan i, ido umbahen ndang dialusi Jesus sungkunsungkun di malim dohot sintua ni halak jahudi i, ai tangkas do diboto Jesus roha parbagason nasida holan mangalului sangap, mabiar tu panggomgomi jala mabiar tu jolma sian tu Debata. Halak na meragukan huaso ni Debata ndang dapotna alus na sintong, ala so sintong ibana manada dohot manghangoluhon hata ni Debata.

2.Unang marpangansi ho mangundukhon dohot mangulahon hata ni Tuhan i(28-32). Marhite umpama on di patudos Tuhan Jesus do ngolu ni jolma songon dua anak na marasing hadirionna. Adong ma dua anak di na sahalak; jadi ditopot ma sihahaan, didok ma tu ibana: Laho ma ho, anaha, sadari on mangula tu porlakta!Alai ro ma alusna: Ndang olo ahu! Hape disolsoli do rohana muse, gabe saut ma ibana laho.Ia amaama i ditopot ma sianggian i, laos songon i do hatana, gabe didok i ma mangalusi: Olo, tuan! Hape, ndang saut laho. Dua hadirion i manggombahon halak siboto surat na merasa dirina sintong, jala halak sijalo beo (dirajumi halak pardosa, pemberontak), alai diujung olo nasida paubahon rohana nang pe dimulainai manjua nasida alai diujung disolsoli do dosana jala rade nasida mangihuthon dalan nasintong i. Hadirion halak na porsea ndang holan uli begeon hatana sian duru alai ndang adong parbuena.

Sipahusorhusoron:

a.     Jotjot do hita songon pangalaho ni malim dohot sintua ni Jahudi,sai holan na mangalului hasalaan(menjatuhkan) jala manjehehon dongan. Tapadao ma pangalaho na sai mangintipi hasalaan ni dongan, tapadao ma ngolu na marpangansi.

b.     Songon alus ni Tuhan Jesus tu angka sintua ni malim, asa margogo ma hita laho mangalusi sungkunsungkun angka naso manghalomohon angka naporsea. Diajari do hita asa   marbisuk songon ulok marroha songon darapati.

c.     Mansai ringkot ngolunta na mananda diri, ngolu na olo paubahon roha, na rade manolsoli dosana jala rade mangihuthon dalan na sintong i.