Psalmen 145:1-8

Bahan Sermon Jmita tu Minggu, 24 September 2017

Ev: Psalmen 145:1-8                               Ep: Pilipi 1:21-30

Topik: TUNG SO TARDODO DO HATIMBULON NI JAHOWA

I.       Patujolo.

Mazmur ima: Pujipujian tu Debata marhitehite tangiang; dohot sebalikna, tangiang tu Debata marhite ende pujipujian. Hombar tu pangantusion i, secara umum Psalm on dogoari do:Parbue ni pergumulan ni ngolu ni angka na porsea tu Debata, di tingki las ni roha manang arsak ni roha. (Pat. Psalm 50: 12+19; 103: 1-2). Ima patuduhon sada realitas na mangolu di roha ni sasahalak tu Debata. Parbue ni pergumulan ( ungkapan perasaan i ), gabe sada apulapul manang gabe dorongan laho mananda, manghamauliatehon dohot manghirim dihaimbaruona marhite pambahenan ni Debata ( Pat. Psalm 90:12: “Sai parrohai ma hami mamilangi angka ari-arnami, asa dapotan roha nanbisuk hami! ). Sian pangantusion i ma naeng dohononta tung so tardodo do hatimbulon ni Debata, ala ni:

II.    Hatorangan.

1.      Manontong ma hita mamuji Debata ala ni PambahennNa (1-3).Mamuji Debata dang holan satongkin manang sangombas alai manongtong. Ibana do Raja, tung na timbul do Ibana, jalatung na so hadodoan do hatimbulonna i. Pamujion tu Debata ingkon ingkon kontinuitas jala totalitas di sude aktifitas dijolma. Molo sadar do hita di sandok panggulmit ni ngolunta dohot di angka na masa di portibi on, lumobi di angka ulaon, huaso, hatimbulon dohot jadijadian ni Debata, nungnga tung ingkon tangas hita mamuji Debata huhut mandok mauliate. Inghon tangkas do sian kesadaran ni panandaon di asi ni roha ni Debata, ima memotivasi hita laho pasangaphon goarNa. Apostel Paulus mandok: Haburjuhon asa marroha na ias ahu tongtong mamuji Debata… (Ulaon 24: 16) Arga do hamu di tobus, di bahen i pasangap hamu ma Debata… ( I Kor 6: 20 ).

2.      Manontong ma hita mamuji Debata ala ni jadijadianNa(4-7). Denggan basa ni Jahowa inghon do siparatarataonta, sibaritahononta tu angka sundut, tu sandok angka jadijadianNa, asa sude taruli olopolop dohot las ni roha jala sude parsidohot mamuji goar ni Debata. Sasintongna jolma pardosa ndang boi hita manada Debata, alai boi hita mananda Debata, ala Debata patandahon diriNa marhite angka jadijadian ni tanganNa, angka halongangan na binahenNa. Langit mamaritahon hamulianNa ( Psalm 19:2 ). Ai dapot (gabe) tarida do pangalaho ni Debata na buni hian… ( Rom 1:20). Lapatanna ta tanda do Debata di bagasan angka na masa di portibni on, marhite HataNa dohot di bagasan Jesus Kristus.

3.      Manonmgtong ma hita mamuji Debata ala ni hasatiaonNa(8). Sada na ringkot siingotonna, ima; Partalup jala parasiroha do Jahowa, lambat tarrimas jala parasiroha bolon. Nang pe jotjot hita lupa mamiji Debata, alai anggo asi ni roha ni Debata ndang na be lupa sian hita,  nang pe jotjot hita manimbil sian lomo ni Debata, alai ndang pintor rimasan ni Debata hita. Alai sai togutoguon ni Debata do hita tongtong di angka parmaraan, sian musu dohot di angka sipingkiran, jala lam patandahononNa do tu hita huaso hasangapon dohot asi ni rohaNa, asa lam tangkas tandaonta Debata huhut tangkas pamujionta tu Ibana.

III. Sipahusorhusoron.

1.       Mamuji Debata sian nasa gulmit ni ngolu ( Mateus 22: 37 ), nasa roha, ateate dohot gogo ( Psalm 150 ) merupakan parenta ni Debata ( Imverativus Dei ), na ingkon siulahononta, manang songon dia pe rumang ni masa na taadopi.

2.      Pamujionta di Debata, laos ido hapapatar ni panandaonta dohot posombaonta tu Debata na badia i, jala laos ido parhiteanta laho manghatindanghon goarNa tu na humaliang hita. Marhite i gabe partonaan ni Debata jala  tiruan ma hita tu angka sundut dohot tu sandok jadijadian ni Debata. Sude na marhosa inghon mamuji goar ni Debata ( Psalm 150: 6 ).

3.      Puji ma Debata di behen sude asi ni rohaNa dohot di sude denggan ni basaNa, ai ido hagogoonta laho mananda, mangantusi, manghangoluhon dohot mangulahon hataNa, asa sian saluhutna i ma na tuk gabe las ni roha, olopolop dohot haluaonta.

4.      Manang aha pe na masa, las ni roha arsak pe… ( BE No. 149: 3 ), alai anggo hita, sai pujionta do Jahowa olat ni on sahat ro di saleleng  ni lelengna ( Psalm 115: 18 ).  A m e n   !