JAMITA-KHOTBAH


Jamita Minggu TRINITATIS, 19 Juni 2010
EV: JESAYA 6:1-13                                                             EP: PSALMEN 111:1-10
MANGOLU DI BAGASAN HABADIAON
Hamu angka dongan sahaporseaon na nihaholongan dibagasan Tuhan i
Panandaon ni diri, I ma sada sikap manang pangalaho na mansai arga situtu di ngolu ni jolma. Ai marhite panandaon ni diri (kesadaran-pengenalan diri), I do boi jolma I paserephon rohana,ndang ginjangrohana, ndang dipintori dirina,  mamboto jala mangarimangrimang I sude pambahenanna ni saluhut gulmit ni ngoluna. Halak na mananda dirina, tontu diboto I do aha do hagaleon dohot hahuranganna, maradophon donganna jolma lumobi ma i maradophon Debata.
            Mansai arga do sikap sisongon I, naeng mian di ngolu ni jolma, laho mangalehon haimbaruon ditongantongan ni situasi na gok parungkilon,  lumobi ma molo lam mangibukbuk dosa alani halumlamon (krisis iman, moral, ekonomi, sosial, politik, dna). Hira disituasi na songon I ma pengalaman bangso Juda, tarjou panuriranag Jesaya (742 sM), marhite sada parnidaan di ida si Jesaya do “hamuliaoan ni Debata” dohot “habadiaonNa”, marhite na jongjong do angka Serafim, jala laos mangendehon “Nabadia, Nabadia, Nabadia do Jahowa Zebaot”.
Hamu angka doangan sahaporseaon dibagasan Tuhan Jesus Kristus
            Habadiaon ni Debata, hamuliaoan ni Debata, dohot huaso ni Debata, I do na gabe ondolon, unok/manang inti ni turpuk jamita dibagasan turpuk on. Marhite turpuk on idaonta ma mutiha na arga na gabe jamita I ma:
Parjolo, Mananda diri songon jolma pardosa di adopan ni Debata. Sikap na songon I mamboan jolma tu pangokuon “ndang adong hape jolma on na singkop/sempurna”, ai saluhut do jolma I mardosa manang pardosa (Rm 3:23). Di turpuk on dipataridahon jala diauhon si Jesaya do dirina jolma pardosa marhite pandohan “Marjea ma ahu nungga mago ahu…..”. Tarjolma si Jesaya, adong panandaon diri di ibana na jolma pardosa do ibana.
            Namansai arga taida sian barita ni turpuk on, I ma, ndung sadar si Jesaya, jala diauhon dirina jolma pardosa, laos disi do taida holong ni roha dohot huaso ni Debata mangula (karya dan prakarsa) laho “manguras” si Jesaya sian haramunon ala ni Dosa. Marhite Serafim (surusuruan ni Debata) diparbadia I Debata ibana.
Paduahon, Idaonta do diturpuk on boha do panjouon ni Debata jala ise do na rade gabe naposo ni Debata? Didok “Ise do suruonku…Jala ise pardalanan nami? Taida ma di turpuk on haradeon ni Jesaya laho mamelehon dirina didok “dison do au suru ma ahu”, rade ibana laho pangkeon ni Debata laho pasahathon hata ni Debata tu bangsoNa dohot pabotohon uhum ni Debata di angka na tangkang marroha. Alus ni si Jesaya I ndada patuduhon hatauon ni ibana, ndanda patuduhon ginjang ni roha I, ndang sian roha dohot pingkiranna sandri I, alai parbue ni huaso ni Debata do I naung dipaias Debata Ibana gabe tau ibana di jolo ni Debata, laos marhite I ma dipatuduhon “haunduhon” ni Jesaya di panjouon ni Debata naung manjalo asiniroha sian Debabata.
Sipahusorhusoron:
1.      Mian dibagasan ngolu namarhabadiaon I do parbue, hataridaan ni ngolu naporsea naung manjalo hasesaan ni Dosa marhite hamamate ni Jesus Kristus. Tutu ndang adong sian hita na singkop. Na so pardosa, jala dohononta ma ndada sian hadirionta umbahen na boi hita pintor di adopan ni Tuhan I, saluhutna I ala ni Asiniroha ni Debata sambing do i.
2.      Halak Kristen tarjou laho manjamothon habadiaon ni ngoluna, marhite roha, pingkiran nang pangulaon, baik ditongantongan ni rumah tangga, parkarejoan, parsaoran, dohot angka pangkobasion na asing pe. Didok Paulus ”Pasahat hamu hamu ma daging muna bahen pelean na mangolu, na badia, na hinalomohon ni Debata, I ma hadaulaton ni na marroha. Jala unang gabe sarombang hamu dohot portibon, alai gabe imbaru ma hamu ndung muba pingkiranmuna”. (Rom 12:1-2).
JAMITA MINGGU, 10 JULI 2011
MINGGU, III DUNG TRINITATIS
Ev: Psalmen 33:1-9                                                                  Ep: Lukas 4:18-19
“MAROLOPOLOP MAMUJI DEBATA”
Hamu angka dongan sahaporseaon na nihaholongan dibagasan Tuhan i
Dingolu on sai margantipasoring do lasniroha dohot arsakniroha, jala boi ma dohononta ia na dua pengalaman I, ndang tarsirang I siang ngolu ni hajolmaon, jala bagian sian ngolunta do i. Maragam do sikap ni jolma laho patuduhon molo jumpa lasniroha, adong do napatuduhon marhite parendeon, adong na mengkel, alai adong do jolma tangis ala ni lasrohana. Molo jumpang pe arsakniroha adong do na patuduhon marhite na marende, mangandung, dna, lajo papuashon nadibagasan rohana i. Sian pengalaman laho mangdopi na dua hal I,  maragam do tutu sikap ni jolma na dipataridahon dingoluna.
            Diturpuk on dipaandar do panindangion ni par Psalmen na marisihon ende pujipujian, alai ndada ala lasniroha sambing, alai nang di tingki marungkil pe par Psalmen I, di na mangadopi ragam angka hamaolon. Dipapuas do pengalaman ni ngolu na sian nasa roha dibagasan  bentuk syair manang ende. Dipangkilalahon par Psalmen I do hagogoon, pangaramotion, pandonganion dohot panarihonon ni Debata, gabe margogo ibana mangadopi saluhut angka na masa di ngoluna.
            Adong dua hal na taida dibagasan turpuk on:
-          Joujou laho mamuji Debata (ay 1-3)
-          Bonsir/alasan, boasa ingkon mamuji Debata (ay 4-9)
Hamu angka dongan sahaporseaon na nihaholongan dibagasan Tuhan i
1.      Tarjou do halak na porsea laho mamuji Debata
Sikap laho mamuji Debata didok: “Marolopolop ma hamu/bersoraksorailah, ale angka partigor (orang benar), angka na unjurmaroha..” lapatanna, halak partigor, angka na unjur marroha, ido nataruli jala margogo marolopolop, ala memang mamuji Debata ingkon tutu situtu sian nasa roha parbagason, jala bulus, ai roha si songon I do na manghorhon lasniroha dohot olopolop diangka na porsea.
Didok di turpuk on “Puji hamu ma Jahowa mardongan hasapi…” Alat musik mansai ringkot do I laho pahehehon semangat laho mamuji Debata, marpanghorhon do alat musik di parsaoran mamuji Debata. Dilehon Debata do dihita talenta laho mamangke alat-alat musik, ala ni, boha ma hita mamangke I asa gabe pelean pamujion I di adopan ni Tuhan i. Jala asa anggiat marhite joujou ni turpuk on, naeng tapatuduhon “ende na imbaru tu Ibana”, ia ende na imbaru I ma, roha na ias, pingkirana na denggan, parohaon na denggan, parsaoran na denggan. Molo jumpang si songon I, I do na manghorhon lasniroha, gabe boi jolma I marolopolop. Alai ende naimbaru ima,  roha, pangalaho, nang pambahenanta I, I do na tarida songon ende na imbaru, pamujion na mangolu di adopan ni Tuhan I.
2.      Aho umbahen asa mamuji Debata na porsea i?
Sintong do hata ni Debata, holan hata ni Debata do jaminan, ndang adong gabus di Debata. Molo tahaporsea I, jala tahangoluhon hata ni Debata, pasti do ndang tarhirim hita tung maol pe siadopanta. (Psalmen 119:105)
Tama pujion Debata, ala Ibana do manompa saluhut, ngolu ni jolma disarihon Debata. Ala ni tama jolma I patuduhon sikap namarhabasaron, dohot marsomba tu Ibana, jala mangihuthon lomonirohaNa. Sikap sisongon I ma patuduhon parsaoran di Debata dohot di jolma i. ( 1 Kor 10:31)
            Tama mamuji Debata, ala saluhut na adong di portibion, nang saluhut natinompaNa, I ma papatarhon huaso ni Debata. Marhite I tama situtu jolma I mamuji Debata. Nang haluaon na pinatupa ni Debata tu bangsoNa, I ma patuduhon na sintong do hata dohot padan ni Debata. Habalgaon pambahenan ni Debata I do Dasor olopolop dohot Mamuji Ibana”.
Sipahusorhusoron:
1.      Tama do hita marolopolop mamuji Debata di ari sadarion, ala tongon ma Hurianta 71 taon naung manjujung baringinna. Jala 150 tahun HKBP. Godang angka namasa na dibolus Hurianta, jala malua do hita sian ragam ni hamaolon I, jala dohononta ma I saluhut na ala dengganbasa dohot asiniroha ni Debata.
2.      Ngolu na marolopolop ido hataridaan ni jolma na porsea. Sian Debata do lasniroha I, jala halak na mian dibagasan Tuhan I do na margogo taruli lasniroha. (Pilipi 4:4)






JAMITA MINGGU, 24 JULI 2011
MINGGU V, DUNG TRINITATIS
DIBAGASAN KRISTUS, NA TINOMPA NA IMBARU
Ev: 2 Korint 5:17                                                                                Ep: Pilipi 1:1-6
Hamu angka dongan sahaporseaon na nihaholongan dibagasan Tuhan i
Saluhut do jolma adong be “masa laluna”, jala adong do pengalaman di partingkian na salpu I na hurang denggan, jala sipata angka na hurang denggan I, sai jumotjot do di bahen jolma laho menilai sasahalak. Disaluhutna pardalanan ni ngolu on, dohononta ma sude do jolma mengalami “proses”, jala dibagasan proses I, sada hal naeng taida I ma boha do jolma I “mengalami perubahan” jala perubahan na manghorhon tu na denggan. Dipatuduhon do marhite ngolu ni si Paulus “sada perubahan” na positif, sian sikap na so mananda Kristus gabe mananda Kristus, sian silele halak Kristen gabe siihuthon Kristus. Adong proses “hamubaon niroha/pertobatan”. Jala sian pengalaman ni ngolu ni Paulus, dijouhon ibana huria Korint, asa mangolu dibagasan Kristus. Diuji ibana do mangalusi angka sungkunsungkun ni Huria I, na meraguhon hadirion na songon Apostel ni Kristus. Marhite I ma Paulus paposhon roha ni Huria “Ai nungga dipadomu Debata diriNa dohot jolma I marhite Kristus”.
Hamu angka dongan sahaporseaon na nihaholongan dibagasan Tuhan i
Boha do halak naung dipadame Debata marhite Kristus?
1.      Mangolu dibagasan Kristus-tinompa naimbaru (hidup baru). Patuduhon ngolu ni halak Kristen na sai tongtong marojahan sian Kristus, boi patuduhon HAIMBARUON (pengalaman Paulus)-ngolu na robi-tu ngolu naimbaru.
2.      Debata sandiri padamehon hita dohot IbaNa, marhite Kristus jala tarjou jolma  gabe siula “tohonan pardenggan”.
-          Persoalan nuaeng I ma olo do hita mardame dohot Debata? Olo do hita mardame dohot donganta? mardame dohot dongan saulaon, satohonan, dongan sabagas, ianangkonta? Molo olo hita mardame dohot donganta jolma, hataridaan ni jolma naung tangkas mangkangoluhon pardamean sian Debata.
-          Lumobi tanggungjawab ni Parhalado, mansai borat (ay 20) didok “partonaan ni Kristus (utusan, duta: tugasna I ma mambahen dame di angka na rundut, na gaor, I do tugas ni “duta” na dipaborhat Kaisar laho manggomgomi luat/propinsi, I ma luat na mardame). Songon I ma tohonnan ni angka Parlado laho mamboan hadameon. Alani ni ingkon roha pardame do parlado ni Debata
3.      Ndang mungkin jumpa hita “hadameon, pardamean” molo so adong “pengorbanan”. Ido na dipatuduhon Debata dibagasan Kristus, dihonghop jolma pardosa asa pintor jolma I di jolo ni Debata:
-          I do lasnirohanta dipintori Debata hita
-          Ndang boi usaha ni jolma I sambing laho “mardame”, alai molo soadong usaha/ roha ni jolma I laho mardame, ndang adong dalan ni Debata laho padamehon jolma i.
Sipahusorhusoron:
1.      Huria na mangolu I ma na sai tongtong rade paimbaruhon dirina dibagasan Kristus. Marhite asiniroha ni Kristus do jolma I gabe na tinompa na imbaru. Halak na tinompa naimbaru I ma halak na mian dibagasan lomoniroha ni Debata. Ndang sarombang dohot portibion (Rom 12:2)
2.      Sian hamubaonniroha do ro haimbaruon-pertobatan, perubahan sian parbagason (hati, pingkiran), sahat tu pambahenan/tindakan. Nungga dipaimbaru Debata hita marhite barita nauli, jala 150 tahun ma HKBP. Boha do hita patuduhon haimbaruon ni roha, pingkiran nang pambahenanta.
3.      Molo taida di turpuk Epistel Pilipi 1:1-6, naeng tarida parbue ni halak natinompa naimbaru marhite: Tongtong manghamauliatehon asiniroha ni Debata dihaluaoan napinatipanaNa, manangianghon dongan sahaporseaon, mangolu dibagasan hasadaon (Joh 17:21), I do ngolu na porsea.





JAMITA MINGGU, 07 AGUSTUS 2011
MINGGU, VII DUNG TRINITATIS
Ev: Johanes 6:30-35                                                      Ep: Psalmen 119:9-16
JESUS DO ROTI HANGOLUAN
Hamu angka dongan sahaporseaon
Laho mangalapati ngoluon ndang holan sebatas aha na boi di ida simalolong, ai ndang tuk simalolongta laho mangantusi parngoluan on molo holan mangasahon hadirionta sambing, mangasahon pingkiranta, mangasahon aha na boi taida. Ai molo holan mangasahon parnidaan do, boha ma jolma naso boi mamereng (tuna netra) laho mangantusi lapatan ni ngoluon. Ai holan mangasahon haporseaon do boi antusanta hahomion, huaso dohot pambahenan ni Debata di ngolunta.
            Sian sudut hajolmaon, maol do jolma porsea, molo holan mangasahon tanda, bukti na boi idaon simalolong. Hape sasintongna godang do pambahenan ni Debata na so tuk pingkiranta laho mangatusi i. Alai sasintong halak na porsea boi do dihilala, jala patar do di ngoluna angka pangurupion dohot pambahenan ni Deebata.
Hamu angka dongan sahaporseaon
            Angka nabisuk (ilmuan), na mangasahon pingkiran,  mandok “ apa yang tidak bisa dilihat oleh mata, sulit untuk dipercayai” ido cara berpikir ni angka naso martuhan. Jala boi do madabu hita tu sikap si songon i. Jala laos I do na tarida di turpuk on, di na mangigil tanda halak Farise sian Jesus laho membuktihon, toho do Jesus anak ni Debata manang na ndang? Sasintongna na manguji Jesus do nasida disi, ai nungga godang angka tanda halongangan na pinatupa ni Jesus, alai tong do ndang porsea nasida.
            Halak na mangihuthon Jesus ndang holan mangasahon tuntutan hapuasan secara pardagingon sambing, manang tanda na boi berengon ni simalolong. Nang pe bangko ni jolma jotjot do dipangsahon hadirionna. Halak naporsea, ndang boi holan mangasahon ruhut parduru sambing. Ai didok do di Heber 11:1 “ Alai anggo haporseaon I, pos ni roha do I di angka sihirimon, jala pamotoan na tontu taringot tu na so niida.
Hamu angka dongan sahaporseaon………
            Aha do tujuan, manang motivasi ni jolma laho mangihuthon Jesus. Ai mamparhorhon do sikap, motivasi ni jolma tu roha nang pangulaonna. Contohna ia sikap ni ngolunta I ma “ Mangan asa mangolu, ndada ngolunta holan na mangan. Diturpuk on, dipaadar do boha do motivasi ni jolma hatiha i laho mangihuthon Jesus, ai godang do holan na mangharinghothon sian pardagingon sambing. Sasintongna ingkon sadalan do pardagingon dohot partondion. Ai Jesus mandok Debata do na paradehon saluhut na ringkot di jolma , nang “manna” di tingki si Musa, alai ndang sahat manna I mamboan nasida tu tujuan (Kanaan). Di turpuk on, Jesus do roti hangoluan I, na mamboan jola sahat tu tujuan, ngolu na salelenglenang, I ma ngolu na mian dibagasan Tuhan i.
            Hata ni Debata do roti hangoluan I nueang di hita, na mamboan hita sahat tu hasintongan, hangoluan. Ai hata ni Debata do na patubuhon haporseaonta (Rom 10:17).
Hamu dongan sahaporseaon………
            Molo tahaporsea I Debata roti hangoluan dibagasan Kristus, namarlapatann ma I sian Ibana do saluhut pasupasu na tajalo, jala marsigantung tu Ibana do ngolunta. Na ummarga I ma: Dipasingkop Tuhan Jesus ngolunta, Ibana dalan tu hangoluan I (Yoh 14:6)
            Dipesta gotilon sadarion di hurianta, I ma hataridaan mandok mauliate hita tu Debata silehon hangoluan i. Saluhut silua na tapasahat ima “tanda: na mangauhon nunggga tajalo pasupasu sian Debata, jala patuduhon na olo hita gabe habaoran pasupasu.




JAMITA PARTANGIANGAN
RABU, 27 JULI 2011
Ev: 1 Petrus 2:9-10 Ep: 5 Musa 7:1-12
Hangoluhon, patuduhon hajongjongan hadirion na pinillit ni Debata
Hamu dongan sahaporseaon………
Parjolo: Ditongos do Surat on tu halak Kristen na di tano parserahan (Asia na metmet, Bitinia, Pontus, Galatian, Kapodosia). Tujuanna I ma laho mangapoi, margogoihon, manungkoli halak Kristen, asa Manahan nasida di haporsuhon ala ni pangaleleon ni parhuaso Roma. Jala mansai bernit do sitaonon na ni adop nasida, mardomu muse songon halak paisolat nasida di tano parserahan.
Hamu dongan sahaporseaon………
Paduahon: Disituasi na songon I, ma ringkot patuduhon sikap, hadirion ni halak Kristen: Taida ma sian ayat 1: asa mambolonghon nasa hajahaton, songon poso-poso (ay 3), olo gabe batu na mangolu (ay 5), jala ro tu Debata (ay 4). Diturpuk on, di sungguli boha do patuduhon, hajongjongon dohot hadirion, status na imbaru di halak na porsea: Songon marga na pinillit-Hamalimon na raja-Bangso na badia-Houm na ginonggoman.
            Ingkon patar sian status I tarida parange angka naung pinillit ni Debata:
-          Huria, I ma bangso na pinillit ni Debata, na dipapulik laho mamuji Debata. Songon I do nang hajongjongan ni hurinta HKBP, na dipillit Debata jala dipadiri asa marparbue songon bangso na pinillitNa (Joh 15:16)
-          Hamalimon na raja, lapatanna sude do hita diloas jala ingkon mamelehon pelean partondion tu Debata, saluhutna do hita ruas ni Kristus songon parsaoran ni malim, gabe parhobas na mamelehon ngoluna.
-          Bangso  na badia, lapatanna, asa mangolu hita dibagasan parsaoran dohot Tuhan I, asa unang sarombang hita dohot portibion
-          Houm na ginonggoman, halaka Kristen I  halak naung ditobus Jesus marhite mudarNa na badia i. Ala ni ndang adong be huaso na asing na tuk mangarampas hita sian Asiniroha ni Tuhan I, ndang adong be na tuk mangarampas huria I, sian nampunasa ni huria I, jala naso tupa be talu dibaen huaso ni portibi on (Jes 43:21, 1 Pet 1:19, Mat 16:18)