RENUNGAN BULAN MEI (BIK) 26 s/d 31 Mei

Minggu: 26 Mei  i 2013

Ev: Johaanes 16:12-15                                                         Ep: Rom 5:1-5

1. Marende No: B.E No. 22:5 NUNGGA RO DIPARGURUAN  

Ø  Jesus ndang diparsineang RohaMi hata ni Na ro martangiang

                I do pos ni rohanami Mida Ho, na dung ro Paluahon hami.

Tondi ni DEbata Mangajari Hita Martangiang

HATORANGAN

Molo kapal mansai ringkot do adong “Kompas“ songon sada alat petunjuk asa boi denggan mardalan jala sahat tu tujuan na tiniju ni kapal i, ai molo so adong kompas, boi do gabe lilu pardalan ni kapal i. Songon ni gombaran ni turpuk on, Tondi ni Debata gabe „kompas di ngolunta. Dipaandar do marhite turpuk on pandonganion, pangurupion, pangajarion,  ni Tuhan ni di ngolunta marhite TondiNa. Tondi ni Tuhan i do mangalehon huaso tu jolma asa margogo mangulahon ulaon na pinasahat ni Tuhan i. Didok Tuhan Jesus do di turpuk on „Alai dung ro Tondi hasintongan na nidok ondeng, togihonon ni I do hamu tubagasan nasa hasintongan“. Marhite pandohan ni dohononna ma tu hita ndang mansohot Debata mangula di portibion, marhite Tondi na i do ibana mangajari jolma asa marhamubaon, manadinghon saluhut dosa, Tondi Parbadia do mangjari hita taringot tu jorbut ni dosa. Halakn na olo marhamubaon ni roha, jala manopoti dosana, i ma patuduhon na dijanghon ibana Tondi porbadia dibagasan ngoluna. Gabe anak ni Debata ma hita molo olo hita ditogihon Tondi ni Tuhan i (Rom 8:13-16). Tondi ni Tuhan i do mangajari hita mangulahon hasintongan. Di tingki ni Tuhan Jesus nungga mapitung jolma i mananda hasintongan, jolma na sintong gabe jolma na sala, jala jolma na mangulahon na sala gabe didok sintong. I do patuduhon hina jorbut ni dosa i. Dipartingkian nuaeng pe ta hilala do pangalaho i, ai nungga gumodang jolma merekayasa ‘uhum’ ala ni marnida bohi, ala ni sisip, dna. Mapitung jolma marnida hasintongan, ujungna gabe masa ma ‘hukum rimba’ mangasahon gogo dohot papudi uhum. Di togihon turpuk on do hita asa unang hita di rajai hagiothagiot ni daging, alai margugu ma tu panggora ni roha, marguru ma tu pangajarion ni Tondi, taloas ma Tondi i mangajari hita, manjari hita mangido angka na patutu sipangidoonta di tangianta, ta pangido ma pangajarion ni Tondi angka patut  siulaohononta. Amen

4. Marende B.E No. 28:4   HATA NI JAHOWA 

Ø  Hata hangoluan do nuaeng diboan  Parjamita i.

                Na lambok begeon i nuaeng dilehon  tu rohanta i.

                Hita on dijamita i,  ai didokkon be do hita paubahon roha.

5. TANGIANG ALE AMANAMI

Senin; 27 Mei  2013

Sijahaon:

Manogot  Nehemia 7:57-73                                 Bodari; 1 Korint 10:1-5

1. Marende BE. 356: 2                           NA MALUNGUN DO RAHANGKU

Ø  Pabotohon ma dalanmu Dohot bogasMi di au

Asa i ihuthononku Ale Tuhan togu au

Sian dalan na ture Dohot tu hasintonganMu

Ho do hatuaonki TolongMi do paimaonku

2Johaanes 17:17 Parbadiai ma nasida di bagasan hasintongan; hatami do hasintongan i

DIPARBADIA DO HITA ASA MARHABADIAON NGOLUNTA

Hatorangan

Tangiang ni Tuhan Jesus do turpuk on mangido tu Ama i asa dibagasan hasadaon na porseai asa porsea portibion na na porseai do nasida tu Amai. Ngoluna na marhabadiaon dohot marhasitongan i do kunci ni hasadaon i, jala sian Debata do habadiaon dohot hasintongan i. Di ondolhon turpuk on do adong dua hal sihangoluhononhon: parjolo; Ngolu na marhabadiaon, badia (hidup dalam kekudusan), ido lapatan dohot hadirion ni huria (gereja), na dipapulik sian portibion, asa unang sarombang dohot portibion, lapataan asa unang sai mangulhaon angka dosa jolma i di adopan ni Tuhan i. Otik do perbedaan hata “badia” dohot hata “bada”, Ingkon adong do huruf I (I=Iesous lapatanna Jesus), ido na pasadahon hita tu Amai, ido na padamehon hita. Ndang boi marsada molo adong bada (pertengkaran, perselisihan). Dipartingkian nuaeng on, nga muramura jolma mamungka bada ujungna gabe tubu angka hamaolon, hagaoron. Jala jotjot do di tongatonga ni hurianta ndang badia pe ulaon ni huria i tabahen, ai ndang Tuhana Jesus be na gabe raja ni huria i, gabe hita nama na gabe raja di huria i. Ringkot do halak Kristen mangorom dirina sian angka ulaon haramunon na lam mangimbukbuk di zaman on, na manegai habadion ni rumah tangga/parsaripeon, habadiaon ni parsaoran,habadiaon ni pangkataion, ala sai manghatahata dongan nama ta ula, dohot lan angka na asing.

Na paduahon sian turpuk i ma: mangolu dibagasan hasintongan, lapatanna manghangoluhon hata ni Debata ojahan ni hasintongan i.

3. Tangiang Pangondianon

4. Marende B.E. No.28:6

.                 I do  haojahan  na tongtong manahan salelengna i

                 I hajongjonganku  I do haposanku Hangoluanki

                 Gogongki  tongtong ma i Mangihuthon  tu hataNa Lao mambaen lomoNa.

5. TANGIANG ALE AMANAMI

Selasa; 28 Mei  2013

Sijahaon:

Manogot  Nehamia 8:1-18                                   Bodari; 1 Korint 10: 6-10

1. Marende BE. 467: 1                           Asi ni rohaM hupuji.

Ø  Asi ni rohaM hupu ji ala Ho manobus au. Di paIas Ho rohangku, ga-be soranganMu Au. IngananMu rohanami. TondiMi manggohi i. Pangke dohot ngolunami gabe ulaulaMi.

2.Psalmen 26:3 Ai sai solpa do di matangku denggan basam, jala * marparange ahu di bagasan hasintonganmi.

Marparange dibagaan hasintonganmi

Hatorangan

Sai jotjot do tabage didok angka siboto uhum di negarantaon “Hukum harus menjadi Panglima tertinggi”, namarlapatan do pandohan i, ndang adong manang ise pe warga Negara di indonesiaon na so unduk tu uhum, manang na “kebal’Hukum. Nasa na marsalah ingkon dipasahat do uhum na patut tu ibana marhite pengadilan. Alai na gabe sungkunsungkun, nungga tutu tangkas, jala tingkos mardalan uhum di negerantaon ? Di tingki na parpudion las do rohanta ala nungga mansai godang angka, pejabat, politisi (Anggota Dewan), na tangkup KPK (Komisi Pemberantasan Korupsi), mulai sian Nazarudin, Angelina, Andi Malaranggeng, Preside PKS (Lufti Hasan Ishaq), Joko Susi (korupsi Simulator SIM), jala naparpudion i ma gabe tersangka Anas Urbaninggrum (mantan Ketum Demokrat) jala mansai godang angka na asing.  Sude sahit na mambahen nasida ditangkupm i ma ala ni KORUPSI na mansai godang (milliar), molo korupsi sarupa doi na MANANGKO (diorai di patik 8), alai molo taida sian sikap nasida na tersangkai, adong do na mintor mengaku marsala ibana, alai adong do mandok ndang marsala ibana. Memang di zaman on nungga bangkol jolma jujur, sintong, dihata dohot dipambahenan, godang nama na bermain sandiwara, berengon do sian duru uli, alai roha parbagason gok angka hajahaton. Diturpuk on dihatindanghon parpsalmen i do di jolo ni Debata na mangolu do ibana dibagasan hasintongan, atik pe godang angka hamaolon na so mangalehon keadilan di ngoluna. Ala ni marhite turpuk on disunggulhon do tu rohanta, atik pe diportibion ndang jumpang hita keadilan, alai unang ala ni gabe sumurut hita mangulahon na denggan. Taingot ma Debata Ibana do paruhum na tigor, na mamaloshon hombar tu pangulaonta.

3. Tangiang Pangondianon

4. Marende B.E. No.187:1

      Denggan do panoguM ale Jahowa Diangka na pinarmahananMi

 Tagamon baheononMu ma na roa So tarbunihon Ho do burjuMi ?

 Jotjot suhar do pambahenanMi Di roha ni na so tumanda Ho

 Alai marhite sian i do ro Tu hatiuron na tinoguMi.

5. TANGIANG ALE AMANAMI

Rabu; 29 Mei  i 2013

Sijahaon:

Manogot: Nehamia 9:1-15                                                                                   Bodari:   1 Korint 10: 11-13

1. Marende BE No 272.3 SAI TOLE,TOLE RO SUDE 

Solukkon hatigoranmi Baen partahananmi

Nang pe haporseaon i Baen lombulombu i

Nang patta sai ringgas Rohanta pe hiras

Mamaritahon dame i Baen halolomo i

2. Poda 23:23 3 Tuhori ma hasintongan, jala unang gadishon nang hapistaran, pangajaran dohot roha hapantason

Roha Hapantason

HATORANGAN

3. Tangiang Pangondinon

Molo di “swalayan, di toko, dipusat pebelanjaan diparade do disi ragam ni angka si tuhoron, jala bebas do hita mamillit angka dia ma na ringkot situhoronta, songon na laho tu “swalayan” i do gombaran ni ngolunta. Diportibion sai dipaandar do tu hita  dua pilihan dingolunta siganup ari, ima mamiliit na denggan manang mamillit na roa. Molo mamillit na denggan hita tudos doi songon manuhor na arga hita, alai molo tapillit na roa tudos doi songon na mambolongkon na denggan hita sian ngoluntaon.

Didok umpama batak do Pantun hangoluan tois hamagoan, lapatanna halak na burju, na sepe marroha, pasti do dapotan ngolu na denggan, alai angka jolma si ginjang roha, na tongkar sai marujung tu hasusahaan do ngoluna. Mansai arga do umpama i di ngolu siganup ari, sihangoluhonon ni saluhut jolma lumobi ma tu sundut na umposo. Dipartingkian nuaeng on lam bangkol do jolma marroha hapantunon, umpamana molo dipasingot, dipodai, diajari sahalak dakdanak mintor tubu do tois ni roha dibagaan rohana. Didok do diturpuk on tuhori ma hasintongan, lapatanna asa marsigulut jolmai mangharinghothon ngolu na denggan, i ma rade manjalo pangajarion, dohot marroha habisuhon. Mangihuthon Poda on, halak na olo manuhori hasintongan i ma halak na marbisuk, i ma halak na marhabiaran tu Debata. Halak na porsea i ma halak na marroha, na tongtong dungo, jala marsihohhot manghaposi Tuha i. Halak na bisuk i ma halak na sai tongtong optimis, komitmen, konsisten di ngoluna. Halak na pantas marroha i ma halak na umboto manirang na roa dohot na denggan. Amen

4. Marende B.E No.30:2

      Ganup ari ma ajari Hami na di haotoon i dope

      Asa lam porsea hami Ho sambing do hangoluannami i

      Lam lumeleng lam pasolhot Tu rohaM ma rohanami

     Hombar tu HataM ma pangalahonami

5. TANGIANG ALE AMA NAMI

Kamis, 30 Mei  2013

Sijahaon:

Manogot: Nehamia 9 :16-37                                                                Bodari: 1 Korint 10: 14-26

1. Marende No: BE. No. 14:2+3     PUJI HAMU JAHOWA TUTU        

Ø  Ingot tongtong, ale tondingkon, Sude na denggan na dipasonggop Debata tu ho.

Denggan basaNa do na pangoluhon ho.

Ø  Nda tung adong, pargogo tongon, Na martudosan, tu Tuhan Debata di surgo i.

Sun hinagogo, sun hinagogo i.

2. 1 Johannes 3:7 Hamu angka anaha, unang dipaotooto halak hamu! Siulahon hatigoran, i do na tigor, songon Ibana na tigor i

Siulahon Hatigoran ma hita

HATORANGAN

Didok umpama batak “ijuk diparapa, hotang diparlabian, na bisuk nampuna hata na oto tu panggadisan” lapatan ni umpama i martudutudu do tu bisuk na di portibion, boi doi bisuk na mangahut tu diri, jala gabe harugian tu na asing. Aha do haotoon mangihuthon turpuk on? Haotoon mangihuthon turpuk on i ma pangaliluon na binahen ni angka poda na lipe na maralo tu hata ni Debata, manjalo angka parbinotoan na marojahan tu filsafat ni hajolmaon. Halak na oto mangihuthon turpuk on, i ma halak na mian dibagasan haholomom, na manghaholongi portibon dohot na pinarhagiotna, i ma angka elaela ni si Bolis, na so manjanghon manang mansoadahon Jesus Kristus Sipalua jala si hophop saluhut jolma. Ala ni di togihon do hita asa mangolu dibagasan hatigoran, i ma na tiur, ngolu na mian dibagasan pangajarion na sintong taringot tu hata ni Debata. Ndang boi saor na holom dohot na tiur, na roa dohot na denggan, alai ngolunta ingkon do manaluhon haholomon i, ai gabe panondang do hita dohot sira di portibion, na mangalehon haimbaruon, ndanda asa ditaluhon hita, alai sebalikna ingkon monang do hita manaluhon na pinarhagiot ni portibion, ai tu hamatean do ujung ni. Poda 11:18-19 Marpangomoan sipaotooto do halak parjahat; alai manang ise na manaburhon hatigoran, maruli upa haburjuon. Manang ise na marsihohot di hatigoran, sahat do tu hangoluan; alai manang ise na mangeahi hajahaton, patibu hamamatena.do.Halak na porsea i do hatigoraan di adopan ni Debata marhite asi ni rohaNA.  Ala ni tagangoluhon ma na, nidok di Titus 3:7 asa gabe tigor hita, binahen ni asi ni rohana, jala sitean hangoluan salelenglelengna, mangihuthon pangkirimon i. Filipi 4:8 Angkup ni i, ale angka dongan, pingkiri hamu ma nasa parange na sintong, na daulat, na tigor, na bontor, na uli, na denggan begeon ro di sude na targoar haburjuon, na tau pujipujian!

3. Tangiang Pangondianon

4. Marende No 268:1

1.  Debatangku do donganku Ganup ari ganup taon

TumpahanNa do langkangku urupanNa  au manaon

Pos do rohangki disi Debata do donganki Salelenglelengna i.

5. TANGIANG ALE AMANAMI

Jumat, 31 Mei  i 2013

Sijahaon:

Manogot  Nehamia 10:1-39                                                                 Bodari : 1 Korint 10:27-33

1. Marende No: 261:1                           Bintang Siparogi

Ø  Bintang sipartogi  Batu mamak i

Tungkot sitiopan Di na landit i

Roti hangoluan Mual na uli

Pandang situjuon I ma Jesus i, Pandang situjuon I ma Jesus i

2. Johannes 6:33 Ai na tuat sian banua ginjang do silehon hangoluan tu portibi on; i do roti na sian Debata

Roti Hangoluan do HATA NI TUAHAN NI

HATORANGAN

Sada kebutuhan pangan do roti di halak Jahudi, ala ni do digombarhon Jesus dirina songon “songon roti” ai marhite i do boi jolma margogo jala mangolu. Didok Tuhan Jesus do diriNa “roti hangoluan” lapatanna Ibana do sumber hangoluan, jala na pangoluhon hita sian hamatean ala ni dosa i, Ibana do na padamehon hita tu Amai asa parjambar hita di hangoluan sogot. Jesus do Anak ni Debata na ro sia banuaginjang na mamemlehon diri humonghop hita. Ibana do na gabe singkatta laho manaon naporsuk ala ni dosanta.

Molo adong roti hangoluan, tontu adong ma “roti hamatean”  na mamboan jolma tu hamagoan. Ia roti hangoluan i i ma “hata ni Debata” na gabe bohal partondionta, holan marhite hata ni Debata do hita margogo, mangadopi angka hamaolon di portibion. Didok di Psalmen 119:105 “Hatami do sulusulu ni pathu jala hatiuron di dalanku”. Roti na manontong do hata ni Debata, ndang adong batasna, limidna, manang kadarluarsa hinorhon ni partingkian, dohot parhusor ni zaman on. Alai anggo roti na sian portibion martingki doi, adong do limidnai, pangke pengawet doi, berengon do songon na uli. Aha ma roti ni zaman on nueang, i ma sikap materialisme hedonisme, konsumerisme, egosime, i ma na mabahen roha ni jolma ndang hea sonang rohana, sai tong mauas, male. Antong tahangoluhin ma hata ni Debata di ngolunta, tabahen ma hata ni Debata gabe “kebutuhan na paling utama” di ngolunta, Amen.

4. Marende   BE.No 28:6

.   I do  haojahan  na tongtong manahan salelengna i

      I hajongjonganku  I do haposanku Hangoluanki

      Gogongki  tongtong ma i Mangihuthon  tu hataNa Lao mambaen lomoNa

5. TANGIANG ALE AMANAMI