MARLAS NI ROHA MA HAMU DIBAGASAN TUHAN I

Bahan  sermon Jamita tu Minggu 15  Okotober   2017

Ev: Pilipi 4:1-9                                   Ep: Jesaya 25:1-9

Topik: MARLAS NI ROHA MA HAMU DIBAGASAN TUHAN I

Di tongos apostel Paulus surat on tu huria Pilippi, laho pahothon dohot paulihon parsaoran naung uli hian dipungka ibana di tingki pardalananna na parjolo tu huta i sekitar taon 52 BC (Pat. Ulaonn 16: 11-40). Berhasil do apostel Paulus membangun sada parsaoran na denggan jala na harmonis. Tung pe ditadingkon ibana huria Pilippi, ala ni desakan ni alona angka ajaran naso manghalomohon poda/barita na uli na binoanna. Alai lam berkembang do huria i, jala ditumpaki huria i do ulaon ni apostel Paulus marhite na lam tubu jala hot ngolu na masihaholongan, masiurupan, lumobi andorang di hurungan apostel Paulus, di tongos huria i do silehon-lehon tu ibana, sian i tarida tangkas do tarida parbue ni Barita Na Uli di tonga ni huria i nang maradophon apostel i (Pat. Pilippi 2: 12; 4: 1).

Tujuan utama ni surat on, ima laho manogunogu huhut mendorong dohot paingothon huria i, asa tongtong tubu  ngolu na marlas ni roha nang pe di hurungan apostel i, jala bagian ni las ni roha ni apostel Paulus do turpuk on, ima hamauliateonna dohot tangiangna, siala naung lam denggan mangolu barita nauli i di huria Pilippi. Aha do lasiroha i, jala sian dia jumpang i, ido naueng naeng taida sian turpuk on:

1.      Lasniroha do parbue ni holong na mardongan  dibagasan Tuhan i. Pandohan ni Paulus  diturpuk on didok do tu huria Pilipi angka “dongan” hinaholongan (kukasihi), hinasiholan (kurindukan),halasan nirohangku jala tumpalhu (Sukacitaku dan mahkotaku).  Pandohan i patuduhon mansai balga holong ni si Paulus tu huria i. Mansai gok las niroha jala  songon sahalak “atlet” Ibana dapotan hamonangan ala ni lasnirohana.  Didok do tu huria asa marsihohot hamu di bagasan Tuhan i, lapatanna asa tongtong satia nang pe mangadopi hamaolon, songon soldadu na satia mangadopi parporangan. Habengeton dibagasan Tuhan i do na margogoihon nasida boi marsihohot mangadopi hamaolon i.

2.      Hasadaon ni do patubuhon lasniroha  molo marsada ni roha di bagasan Tuhan i, lapatanna asa taharingkon ma hasadaon: ido soso si Paulus tu Euodia dohot Sintike (ima dua parompuan na mangurupi pangkobasion ni si Paulus), ido kata kunci keharmonisan  parsaoran ni angka na porsea dohot Tuhan i.  Sai tubu do angka masalah diinternal di huria, alai  holong ni anagka na porsea tu Debata ingkon tarida doi holong tu maradophon donganna jolma. Mansai ringkot hian dp hasadaoan ni roha i i dipadimundimun, ala dang jumpang hasadaoan ssega do ngolu ni keluarga, huria dohot masyarakat. Jala molo tubu angka parsalisian ndang daonta angka las niroha. Mansai ringkot do urupan molo jumpang angka hamaolon ditongatonga ni huria, lumobi angka dongan na mangkobasi pararathon barita nauli. Ai saluhutdo angka na mamelehon dirina di ulaon ni Tuha i tarsurat goarna di buku hangoluan i. Saluhut  do dapotan “upah” hombar tu angka na niulana (Mat 25:31-46; Wah 20:11-15).

3.      Manontong ma las ni rohai molo  tongtong di bagasan Tuhan i. Lasniroha na nidokna ndang marojaha tu situasi/keadaan ngolu sian ruhut pardangingon (hasangapon, hamoraon, hagabeaon). Ojahan manang hinsu ni lasniroha i ma hubungan/parsaoran ni angka naporsea i do dohot Tuhan i (mian dibagasanTuhan i). Halak na porsea ingkon mangolu dibagasan habasaron, tu saluhut jolma asa marhite parange i gabe manait roha ni jolma naso mananda Tuhan i asa olo paubahon rohana manjanghon Tuhan i. Hadiron ni angka na marlasniroha ndang olo holsaoan, ai ndang  adong laba ni holsoan, ala kata kunci ni holsoan ima tangiang dohot mandok mauliate. Diboto Debata do na ringkot di ngolunta, ala ni ringkot jugulhononhon martangiang (Yak 4:2)

4.      Mian ma dame molo mian dibagasan Tuhan i. Tuhan i do na mangalehon dame na sumurung sian saluhut roha, na mangaramoti angka ateate dohot pingkiran di bagasan Kristus Jesus! Dang dapot hita dame na sumurung anggo so sian Debata, holan dame ni Tuhan i do na tuk mangaramoti ateate dohot pingkiranta, laos dame ni Tuhan i do na mangarorot dohot mangaramoti ngolu angka na porsea i. Alani holan angka na mian dibagasan Tuhann i do na mangkilalahon dame na sumurung i.

5.      Ndang tarsirang lasniorha sian parange na sintong (yang benar), na daulat(yang mulia), na tigor(yang adil), na bontor(yang suci), na uli(yang manis), na denggan begeon (yang sedap didengar) ro di sude na targoar haburjuon (kabajikan), na tau pujipujian(patut dipuji). Karakter ni halak kristen igkon mian dibagasan spirituliatas, moral, sikap etis, jala ngoluna boi dijanghon angka dongan jolma lahomanait nasida manda Debata ( I Tim 3:2,7,10; 5). Las niroha i ndada holan dipamgkilaan alai tarlumobi naeng marhapataran dingolu siganub ari. Jolma na marlasniroha doi boi patubuhon las niroha di dongan.