Kamis, 28 Februari 2013

Renungan; BIK APRIL 2013



Jumat; 26 April 2013
Sijahaon:
Manogot  2 Rajaraja 25:1-21                                                                Bodari; 1 Korint 1:18-31
1. Marende BE. No 206  NA DISON DO AU TUHANKU      
Ø  Na dison do au Tuhanku Na marsomba au tu Ho
Iluilu ni matangku Husombahon do tu Ho
RohaMi  ma tu rohangku Na masihol au di Ho.
Ø  Ndang adong  pangidoanku Dungkon asi ni rohaM
Na dilehon  Ho, Tuhanku Tu na unduk di hataM
Rohami  ma tu rohangku  Sai pasauthon  ma hataM

2.1 Musa  24:26 Jadi dipaunduk bajoi ma ibana, huhut marsomba tu Jahowa

MANDOK MAULIATE: PAUNDUK ROHAM MARSOMBA TU DEBATA
Hatorangan
Mansai hebat do barita di Media (TV,Koran) taringot tu pernikahan siri Bupati GARUT (Aceng) ala hirahira holan 4 ari do umur ni parsaripeon/perkawinan siri nasida dung i di siranghon ma muse ala mangihuthon ibana ndang sesuai hombar tu rohana ripe na i. Pola do borat persoalan i jala ujungna gabe sepakat do anggota Dewan laho melegserhon si Aceng sian tugasna songon Bupati. Taida ma sian na masai, jala mangihuthon hakristenonta ndang tarjalo hita i, ala ndang boi mardiduadua anggo halak Kristen, ai nungga maralo i anggo di ajaran manang hakristenonta, ai ndang adong be habadiaon ni pardongasaripeon ni dohot habadiaon i parsaripeon i.
Hamu angka dongan sahaposeaon, badia do pardongan saripeon di halak Kristen, holong do ojahanna, jala halak naung pinadomu ni Debata ndang jadi sirangon ni jolma. Holan sada do na boi manirang parsaripeon i i ma hamatean. Molo tajaha di bindu 1 Musa 24 on dicaritahon do boha do si Abraham marsuru naposona (Eliezer) tu tano Kanaan tu huta ni si Nahor laho mangaririt jolma ni si Isak, jala di turpuk on taida ma lasniroha ni naposo na si nuru ni Ambraham i mandok mauliate tu Debata ala ditumpak Debata do pardalanan dohot ulaonna laho mangiririt jolma ni si Ishak. Adong dua sikap na dipatuduhon ni naposo ni si Abraham di turpuok on, parjolo dipauduk dirina, na paduahon : marsomba tu Jahowa, sikap na dua i sasintongna na boi sirang sian ngolu ni halak laho mamuji dodot pasangaphon Debata. Patutoru diri jala marsomba tu Jahowa i do hataridaan ni jolma na marningot denggan denggan basa ni Debata.
Taida ma jamita na arga sian turpuk on: Parjolo, Sukses do naposo ni si Abraham mangula ulaoanna (tugasna) alai dung sukses ndang ginjang rohana, alai dipaserer do rohana mandok mauliate tu Debata. Molo denggan ulaonta ingkon dohononta do mauliate tu Debata jala ala Ibana do saluhutna i umbahen na boi tarula hita. Paduahon: Molo adong na dihirim rohanta (rongkap, dna) tapangido ma tu Debata dibagasan tangiang dibagasan hauduhon huhut marsomba tu Debata.  

3. Tangiang Pangondianon
4. Marende B.E. No.140:4   GIRGIR MA HAMU 
Ø  Asi ma rohaM Ale Debata Pasaut ma hataM Tumpahi  nama
     Sude na niula Ni naposoM Sai baen ma martua Sude jolma pe.

5. TANGIANG ALE AMANAMI





Sabtu; 27 April i 2013
Sijahaon:
Manogot: 2 Rajaraja 25:22-30                                                                                             Bodari:   1 Korint 2:1-5
1. Marende BE No B.E No.36 PASU PASU HAMI 
1.   Pasu pasu hami O Debata nami
      Sai sondangkon bohiMi Tu na pungu on sude
2.   Lehon ma di hami Dame ganup ari
      Sai pasaor ma  TondiMi Tu na pungu on sude

2. Jeremia 17:14 Sai ho ma pamalum ahu, ale Jahowa, asa tung malum huhilala; sai ho ma mangurupi ahu, asa tung dapotan pangurupion ahu, ai ho do pujipujionku

PANGSAHON MA JAHOWA DI NGOLUM
HATORANGAN

Jotjot do hita merasa ndang margogo, ndang mampu, lomos, alai sasintongna ndang ala na so tolap hita, alai ala sai jotjot do hita mangasahon holan hadirionta ndang mangasahon Tuhan i. Ndang dihalomohon Tuhan i hita mangasahon hadirionta (17:5). Mandao sian Debata ala habis tingkina holan mamingkiri dohot manarihon angka na ringkot di pardangingon, loja mula ulaon holan mamingkiri angka na ringkon di ekonomi, laos so di hangoluhon be ngolu na marparsoran dohot Debata, isara ni partangingan dohot parmingguon (Yer 17:19-27). Ngolu ni Yeremia patuduhon boha do halak na mangasahon hagogon ni Debata, holan tu Debata do Ibana mangkirim, holan Debata do partanobatoanna (17:13-14).
Songon na taboto mansai borat do hamaolon na niadopan si Yeremia laho manghatindanghon hasintongan ni Jahowa, godang do na manghasogohon ibana, godang do na marmusu dompak ibana alai mansai koras do ibana maminsang angka mangalaosi Debata, angka panurirang pargakgap. Ndang tarambat hita ndang marungkil hita, ndang mangadopi sitaonon, hamaolon, parsahiton, alai na ringkot sijamothononhon i ma unang ala ni saluhut parungkilon i mambahen hita gabe ndao, marsirang sian Debata gabe madabu tu bagasan dosa. Parsahiton dohot hamaolon na boi songgop doi tu pamatang dohot ngolunta alai unang ala hinorhon ni i gabe lam dao hita sian Debata, alai sebalikna gabe dalan doi laho pasolhothon diri tu Jahowa, mangido hamamalum, dohot pangurupion sian Ibana. Habengeton manaon na hansit dohot parsorion i do hataridaan ni jolma nai manghirim tu Debata. Dipartingkion nuaeng on lam godang do jolma mandao sian Debata ala ni hariburon dohot hagiot ni portibion. Alai marhite turpuk on dijouhon do tu hita asa tapangsahon Debata di ngolunta, holan Ibana do pangkirimonta, holan Ibana do sipujion jala sisombaonta. Musuh na umbalga di ngolunta nueang i ma: sai jotjot do tapangasahon jolma na gabe jaminan di ngolunta

3. Tangiang Pangondinon
4. Marende B.E No.792:1,2 Pasu-pasu hami O Tuhan
1.                    Pasu-pasu sai usehon dameMi,
Sai ampehon tanganMi Tuhan,
Lehon tu au gogoMi di portibion
Baen ma au Tuhan habaoran ni las ni roha
Tu na marsak I tu na dangol I gabe pangapuli i.
2.                    Diportibion, baen ma au Tuhan,
Monang maralohon dosa dibahen gogoMi,
Talu musu I sibolis pangago i.
Pasu-pasu hami O Tuhan ………

5. TANGIANG ALE AMA NAMI


Minggu;  28 April 2013
KANTATE
Ev : Ulaon Ap 11 :15-18                                                       Ep : Psalmen 148 :1-14
1. Marende No: BE. No. 14:2+3     PUJI HAMU JAHOWA TUTU        
Ø  Ingot tongtong, ale tondingkon, Sude na denggan na dipasonggop Debata tu ho.
Denggan basaNa do na pangoluhon ho.
Ø  Nda tung adong, pargogo tongon, Na martudosan, tu Tuhan Debata di surgo i.
Sun hinagogo, sun hinagogo i.
HAMULIAON NI JAHOWA
HATORANGAN
1.        Boi godang do dalan dipatupa jolma laho patuduhon pamujion dohot haporseaon tu Jahowa, isara ni napasahat pelean tu Jahowa, marhite ende puji-pujian, dohot lan angka na asing. Mamuji Jahowa tontu naeng ma adong parbuena; marhite pambahenan manang pangulaon, ndang holan hata sambing. Molo holan marhite hata sambing tudosmai songon halak namansoadahon dirina. Di angka pangalaho parendeon na masa boi idaonta di ngolu ni parende i sandiri. Molo nirajuman hape, jumotjotan do ndang sarupa angka hata mutiha na ni dok ni parende di endena dohot pangalaho ni parende i. Ai holan manghatahon sambing do dipatuduhon di parngoluonna. Ndang saurdot hata ni ende dohot pangalaho ni parende. Jotjot do pangalaho sisongonon masa di ngolu ni jolma. Tu angka jolma sisongonon manghonaima tu pandohan “nadila parende.”
2.        Dijouhon Minggu sadarion do hita asa mangolu dibagasan ngolu na marKantate: ngolu na marende dohot mamuji goar ni Jahowa. Boasa ingko marende hita? Ala i do patuduhon las ni rohanta tu Debata ala,Parjolo: Asi ni roha ni Debata do ngolunta, ndang adong na boi tapangasahon sian hadirionta gabe pintor hita holan mangasahon asi ni rohaNa sambing. Paduahon: ala adong pangkirimon hangoluan na salelengleng di angka na porsea, i do bagabaga ni Debata di angka na marholong ni rohana di Ibana. Patoluhon: Marende hita ala di ramoti Debata do ngolunta, i do pos ni rohanta atik pe godang angka musuhta naeng mamolgak hita.
3.        Markantate ma hita: Tapuji ma Debata ala lam martamba bilangan angka na porsea tu Ibana, ndang holan tu kelompok, geografis, etnis be haluaon i, alai tu saluhut angka naporsea do haluaon dohot holong ni Debata. Markantate ma hita ala di adopan ni Tuhan i sarupa do hita, ndang adong halak Yahudi dohot na so Yahudi, halak batak dohot nas so batak. Marlas ni roha do hita ala sahat barita nauli tu bangso batak, hinorhon ni i do gabe boi hita maju, lam torop halak Kristen si ihuthon Tuhan i. Ingkon rajumanta doi saluhut ala ni pangulaon ni Tondu Porbadia. Sai margogo ma parhaladona dohot ruas pe manghatindanghon pambahenan ni Tuhan i di ngolunta. Unang lupa hita mangendehon pujipujian ai gok hamuliaon ni jahowa do sandok tano on. Antong tapatuduhon ma ngolunta ngolu na marparbuehon hamuliaon ni Jahowa.  

3. Tangiang Pangondianon
4. Marende No 124:1,2
5. TANGIANG ALE AMANAMI



Senin, 29 April i 2013
Manogot: Esra 1:1-11                                                               Bodari 1 Korint 2:6-16
1. Marende No: B.E No. 117  JAHOWA DEBATANTA DO  
Ø  Gogonta ndang haposan i, Tibu do mago hita;
Pinillit ni Jahowa i, Na tuk pamonang hita
Ai ise goar ni ? I ma AnakNa i Tuhanta Jesus i 
Sigomgom sasude Na so tarbahen so monang

      2. Psalmen 144:9-10 Ale Debata, ende na imbaru ma endehononku di Ho, mardongan hasapi sisampulutali mamuji Ho.Ho do na mangalehon tua tu angka raja, paluahon naposom si Daud sian goluk hamagoan
Ende Naimbaru:Haporseaon dohot Pangkirimon tu Debata
HATORANGAN
1.        Arsak dohot las ni roha nungga bagian sian ngolunta; persoalanna boha do hita bersikap molo jumpang angka hamaolon di ngolunta, tagamon dope margogo hita mamuji Debata? Sassintongna halak na porsea, ndada mamereng partikian holan di tingki une, lar rohana asa dipuji Debata, alai disaluhut partingkian ingkon tongtong do pujionna Debata, ala holong dohot asi ni roha ni Debata. Parasiroha do Debata jala holan Ibana do na gabe partanobatoan. Ai ndang adong na boi tapangasahon sian gogo ni jolma, ai tudos do ngolu songon halinu, na laho salpu jala na olo suda do anggo jolma i sian portibion.
2.        Diarahan turpuk on do hita, asa marhaposan tu Debata, Ibana gabe partanobatoan di hita lumobi molo ta adopi angka parungkilon di pardalanan ni ngolunta. Ngolu si songon i do na dipatuduhon par Psalmen (si Daud) di turpuk, di tingki mangadopi hamaoloo ibana sian raja Saul. Atik mansai borat hamaolon na ni adopan si Daud, alai mampu do ibana manatap jala mangaranap dompak jolo (masa depan), berkat sian Debata (ay 12-13).
3.        Ala ni marende ma hita dibagasan ende pangkirimon, pos ni roha tu Tuhan i, taparbuehon ma marhite ngolu na denggan, pangulaon na denggan dibagasan pangkirimon na mangolu tu Tuhan i. Pos ma rohanta Debata do si lehon “tua” di hita, martua ma hita molo manaon hita dipangujunan, ai dung tau hita lehononna do tumpal hangoluan i. Antong marlas ni roha ma hita mangkirim, marbenget ni roha ma hita dihaporsuhon, jugulhon ma tangiang, ido ende naimbaru mardongan pos niroha dohot pangkirimon tu Debata. Amen

4. Marende B.E No.  11    AHA MA ENDEHONONKU        
1. Aha ma endehonongku, asa pujionku Ho,
      ale Tuhan Debatangku, sai urupi au gogo.
      Ai ndang tarpajojor ahu, asi ni rohaM di ahu.
      Ala ni hupuji Ho, tung marribu hali do.
2.   Sai sungguli ma rohangku, mangendehon gogoMi,
      dohot asi ni rohaMu, ro di habasaronMi.
        Ai i do dihatindangkon tondi dohot pamatangku.
        Ala ni hupuji Ho, tung marribu hali do.

5. TANGIANG ALE AMANAMI


 
Selasa, 30 April i 2013
Sijahaon:
Manogot  Esra 2:1-42                                                                                           Bodari : 1 Korint 3:1-23
1. Marende No: 476:1                           NDADA AU GURU DI AU
Ø  Ndada au guru di au be, Jesus do nampuna au.
Las rohangku dung hubege, Jesus sipangol au.
Ndang  be au guru di au. Jesus na humophop au,
Nampuna au. Tung saleleng au mangolu, Jesus do nampuan au.

2. Rom 5: 3-4 :  Alai lumobi sian i dope, ai itahalashon do nang angka haporsuhon, ala taboto, dihorhon haporsuhon i do habengeton ni roha.Jala dihorhon habengeton ni roha i do hatauon, jala hatauon i do mangkorhon pangkirimon

HAPORSUHON,HABENGETON, HATAUON= PANGKIRIMON
HATORANGAN
Adong sahalak dolidoli nabajar mangidohon tu donganna na tumua sian ibana asa ditangiangkon ibana asa marhabengeton. Dungi ditangianghon ma ibana, jala didok ma ditangiangna i “ Ale Tuhan sai tongos ma tu donganhon haporsuhon tu donganhon ganup manogot dohot ganup botari” Dung di bege si baoa isi ni tangiang i, didok ma” Unang songon ni tangiangmu, ndang hupangido asa ditangianghon ho ahu asa ro haporsuhon, ai na hupangido i ma habengeton do ninna ibana” Dungi di alusi dongannai ma “ai marhite haporsuhon do asa boi hita marhabengeton” ninna ibana mangalusi.
Di halak na porsea ingkon bahenonna do haporsuhon i gabe sada dalan asa lam mangaranap dompak jahowa, gabe sada ujian isarana ni parsingkola laho naik kelas, haporsuhon bahenon sada dalan asa lam tang jala polin hatorason ni haporseaon na manghorhon habengeton dohot pangkirimon na mangolu tu Debata. Ingkon saiihot do HAPORSUHON manghorhon HABENGETON tu HATAUON jala manghorhon HAPORSEAON. Marhite turpuk on taida ma adong 3H1P (Haporsuhon+HABENGETON+HATAUON = PANGKIRIMON) Molo didok habengeton lapatanna, Manahan, ketabahan, kemampuan untuk bertahan dalam kesulitan tanpa kenal menyerah." Ngolu si songon ni do na dihangoluhon si Paulus, ai hea do ibana di linsingi, di dangguri, jotjot do ibana marmara alai tontong do ibana benget manaon saluhut haporsuhon i ( 2 Kor 11 :13-33). Halak na sai marpingkirimon tu Debata do na boi benget manaon angka haporsuhon. Halak na marnapunaho Debata di ngoluna sai di pangkilalahon do ndang adong na hurang dibagasan ngoluna, jala dihilala ibana ma haporsuhon i do gabe dalan mambahen matoras haporseaonna. Karakter kristiani bagaikan permata indah yang dibentuk oleh tekanan dan dipoles oleh kesukaran. Amen.
4. Marende   B.E No. 218  TONG DO TAU HAPOSAN BL.
1. Tong do tau haposan Tuhan Jesus iAla naung diporsan Do dosanta i
 Hata nang dameNa Hangoluan ni Angka na porsea Di hataNa i.
 Hata nang dameNa Hangoluan ni Angka na porsea Di hataNa i.
2. Sai tong didongani Na porsea iJala ganup ari Ro basaNa i
 Tu na so marganggu Di gogoNa i Na mandok Tuhanku  Na sun denggan i
 Tu na so marganggu Di gogoNa i Na mandok Tuhanku 
5. TANGIANG ALE AMANAMI








Tidak ada komentar:

Posting Komentar