Debata Pandaoni Na Gok Asi niroha

Bahan Sermon Jamita tu  Minggu 20 Agustus 2017

Ev. Mateus 15:21-28                  EP; Psalmen 67:1-17

Topik: Debata Pandaoni Na Gok Asi niroha

1.       Hapataron ni ulaon ni Kristus, tung tangkas do tarida di bagasan Jesus marhite angka pambahenanNa. Tung tangkas do haroro ni Jesus tu portibi on patuduhon ulaon asi ni roha ni Debata ( Pat. Joh 3:16 ), jala tung tangkas do hataridaanna marhite haluaon na binoanNa. Marhite haroro ni Jesus tu portibi on, laos dipapatar i do naung tangkas marsaor Debata tu portibi on, parsaoran i  boi do di hilala portibi on marhite kepedulian ni Jesus tu portibi on, tu lingkungan sekitar dohot parsaoranna maradophon angka jolma. Jala Haroro ni Jesus tu portibi on ndang mamboan goarNa sandiri, alai mamboan goar ni Debata na manrusu Ibana do, jala saluhtu ulaonNa di pangke Ibana laho pasangaphon Debata.Ulaon i do na tangkas tarida nang di turpuk on, di na mardalani Jesus patuduhon kepedulianna tu portibi on, jala dipatuduhon Ibana do asi ni roha ni Debata ima haluaon marhite na pamalumhon na marsahit

2.       Topik ni Minggunta i ma: Debata Pandaoni Na Gok Asi niroha

a.       Joujou ma hita tu Tuhan i mangido asi ni roha. Mansai bagas do joujou ni sada boru Kanaan di turpuk on, ndang pe halak sipelebegu ibana, alai tangkas do dihaporsea Ibana Tuhan Jesus na gok huaso na boi pamalumhon angka sahit. Didok di joujou nai “Asi ma roham mida ahu, Tuhan, Anak ni si Daud! Posi do diae borungku dipaporsukporsuk sibolis”. Hata asi roham dia ahu, patuduhon haserepon ni roha dohot elekelek tu Tuhan i, dibotohon ibana siholnirohana dohot  holso nang parungkilon na diae boruna na dipaporsukporsuk si bolis. Usaha ni ibana asa malum sahit ni borunai patuduhon holong nirohana.

b.       Tongtong ma mangkirim tu Tuhan i nang pe so maralus dope pangiadoanta. Ndang mintor dialusi Jesus joujou ni boru Kanaan i, nang pe songon i torus do diihuthon jala  sai manjojou ibana tu Tuhan i.Ndang olo ibana putus asa. Marnida i  pola sampe dielekelek siseannanai Jesus ,mandok asa di pamuli ibana.  Alai asiang do alus ni Jesus, nina Jesus ma mangalusi: Holan tu angka birubiru na mago na sian pinompar ni halak Israel do Ahu disuru. Alus i sasintongna na songon “ujian ni haporseaon doi” ai diadopan ni Tuhan i saluhutna do jolma na mardosa i songon birubiru na mago.

c.    Paserep ma roham marhite marsitutu marsomba tu Tuhan i. Nang pe asing alus ni Tuhan Jesus tu tu boruboru i, namambahen alus  songon pangarajumion ni halak Jahudi marnida bangso sileban songon anak ni biang.  alai ndang sumurut ibana, gariada lam dipatuduhon ibana do parsitutuonna marhite na marsomba tu Jesus huhut mandok : Tuhan, tolong ahu, alai asing do alus ni Jesus tu ibana “Ndang tama buaton sipanganon ni angka dakdanak laho mandabuhon tu angka biang. Alai nang pe songon na koras alus ni Jesus, sungka begeon sipareon, ndang mintor tersinggung boruboru Kanaan i, gariada lam dipatuduhon do haserepon ni rohana mandok “I do nian, Tuhan; alai diallang biang i do angka na pisik na mardekdehan sian panganan ni ompuna. Halak na mananda diri do boruboru Kanaan i, dipaserep do rohana, mangido asiasi tu Tuhan i.

d.       Tahaporsea ma Tuhan i ai gok do asi nirohana. Longang do Tuhan Jesus marnida balga ni haporseaon ni boruboru Kanaan i, alai umbalga do asiniroha ni Tuhan i marnidasa, dungi didok Tuhan Jesus ma: inang! Saut ma na pinangidomi! Jadi hisar ma boruna i olat ni na sangombas i. Posnirohanta laho mangkaporseai Tuhan i, ido dalanta manjalo pasupasu sian Tuhan i. Parsihohoton dohot serep ni roha ni boruboru Kanaan i gabe maralus pangidoannai (Tangiangna).Parsihohotan ni haporseaon ni boruboru Kanaan i patuduhon posnirohana tu Tuhan i, mansai balga do haporseaonna, jala boi do ibana sian “ujian” ni haporseaonna. Songon Soldadu na porsea di Tuhan Jesus, naso jumpangsa haporseaon ni Soldadu di halak Israel (Mat 7:10).  Ndang marisuang hape halak na porsea di Tuhan i, sai dialusi Tuhan i do joujou ni angka na porsea. Balga ni haporseaonnai gabe dapotan asi niroha Kanaan i gabe hisar ma boruna i.