Marius 14:13-21

Bahan Sermon Jamita tu  Minggu 06 Agustus 2017

Ev: Marius 14:13-21                  Ep: Jesaya 55:1-5

Topik: Diparade Debata do na ringkot di Hita

1.       Taihutma jala tadapothon ma Tuhan i. Mandapothon Tuhan i namarlapatan doi pajonokhon diri tu Tuhan i. Ido na taida diturpuk on, di lao ujui Jesus punjung sasadasa mintor ro do angka na torop i mandapothon Ibana. Ndang marisuang saluhut angka na ro mandapothon Tuhan i. Ai dung diida Tuhan Jesus angka na torop i, mintor asi do rohana mida nasida, mintor dipamalum ma angka na marsahit sian angka na torop i. Lapatanna haroro ni Jesus ro tu portibion paneanghon auga na tinuhuk ni jolma i. Lumobi paluahon jolma sian ihotihot ni dosa. Ido umbahena na didok Tuhan Jesus: Ro ma hamu tu Ahu, hamu angka na loja jala na sorat, asa hupasonang hamu! Jangkon hamu ma augangku, marguru ma hamu tu Ahu, ai na lambok do Ahu jala na serep marroha, asa dapotan hasonangan tondimuna.(Mat 11:28-29). Dapotan olopolop jala lasniroha do halak na mangalului Jahowa (Psalmen 40:17). Sai jumpangan do halak na mangalului (Mat 7:7). Ingkon adong do relasi dohot parsaoran dohot Tuhan i. Mangihuthon Tuhan i adong do konsekeunsina: Rade mansoadahon diri, manuhuk silang jala satia mangihuthon Ibana. Motivasi mangihuthon Tuhan i ndanda marojahan tu hagiot ni pardangingon sambing.

2.       Ndang tagamon hurangan hita ai disarihon Tuhan i do hita. Marhite lima roti dohot dua dengke boi gabe lam ganda pasupasu Tuhan i, gabe mangan lobi lima ribu halak.Lapatanna sian na saotik i pe molo dipasupasu Tuhan i boi do gabe lam ganda, dang hurangan. Halak na sai tongtong mandok mauliate nang pe metmet pasupasu dijalo, alai gabe dalan doi laho manjalo pasupasu na umbalga muse. Garida dung sun nasida mangan lobi dope sampulu dua ampang nari. Ndang holan sahit dipamalun Jesus, alai disarihon do sipangananon pardagingon. Alai umbagal sian i dilehon do ngoluna laho manobus dosa ni jolmai.  Ibana mangalehon sipanganon partondion asa mangolu jolmai dibagasan haporseaon jala marparbue. Anggo sipanganon na sian portibion holan parsatongkinan doi, ndang tuk i mangalehon hasonangan na manontong. Holan tu Ibana ma hita marpangunsandean asa mian hita dibagasan dame na sian Tuhan i saleleng hita mangolu. Pos ma rohanta sai pabosuron ni Tuhan i do tondinta dohot asinirohaNa i.  

3.       Haporsea, tangihon jala ulahon ma hata ni Tuhan i. Dung diida siseanni angka na torop i jala mareak bot ari didapothon do Tuhan Jesus mandok asa dipamuli angka natorop i, alai didok Jesus Ndang pola laho nasida, lehon hamu ma mangan nasida. Alai didok siseannai ma holan lima roti dohot dua dengke do adong dipeop nasida. Jala didok Jesus ma asa diboan tu ibana na adong i. Dung ditangianghon Jesus, dibagi jala diparlehon siseanNai mai tu angka na torop i. Haunduhon nasida mangoloi hata ni Tuhan i patuduhon haradeon  niroha mangoloi dohot porsea dihata ni Tuhan i. Ai ndang adong naso tarpatupa Debata, ai ndang hapingkiran pambahenan ni Debata.  

4.       Rade ma hita mamelehon dirinta jala dipangke Debata. Ndang marnida sadia godang sipanganon, alai ise ma na rade mangalehon. Lima roti dohot dua dengke i sian dakdanak doi (Jaha Johannes). Sian na metmet i boi dipangke Debata gabe mangalehon mangan lobi lima ribu halak, suang songon ni ma hita molo rade mamelehon diri boi dipangke Debata gabe ulauulaNa mambahen ulaon na mansai balga.  Halak na rade mamelehon dohot mangalehon tu Tuhan i, ingkon idoanna pasupasu sian Tuhan i. Antong unang tapangasahon pingkiranta (perhitungan matematika), tahaporseai ma Tuhan i ai ndang adong naso tarpatupa Debata. Kita sering mengukur masalah dengan kemampuan kita, tetapi ditangan Tuhan ada kuasa untuk mengubahnya.  Tapelehon ma ngolunta songon Lima roti (lima jari), dohot dua dengke (dua mata, dua tangan, dua pat, dua pinggol) gabe ulaulaNa.