Rom 14:1-12

Bahan  sermon Jamita tu Minggu 17 Septembe 2017

Ev: Rom 14:1-12                                        Ep: 1 Musa 50:15-20

Topik: MARSIANJUAN DI ANGKA HAGALEON

I. Patujolo.

Ia hasahatan  i surat Rom on, ima sian halak Kristen na sian hasipelebeguon, sian halak Romawi, Yahudi doho angka hatoban naung gabe halak Kristen. Ima angka halak Kristen naso olo tarihot tu patik-patik ni ha-Yahudi-on, alai na marojahan tu haporseaon di Tuhan Yesus Kristus. Isi dohot tujuan ni surat Rom on, ima mangajarhon asa marhaporseaon na sintong, jala marhatigoran situtu. Naeng jumpang hasintongan na pita jala na polin dohot marholong ni roha naso marpangansi (mapambuat)

Songon sahalak Apostel ni Kristus si Paulus tangkas diajari Tondi Parbadia ibana, asa paingothon jala mangajarhon tu nasida ruhut-ruhut ni pangalaho (etika hidup) na denggan di jolo ni jolma lumobi ma di jolo ni Debata.

II. Hatorangan ni Turpuk.

1.      Ngolu na masijanghonan unang masiuhuman (1-4). Secara pardagingon dohot latarbelakang sosial sai jumpang do parasingan ni jolma, isarana diruhut sipanganon adong parsubang adong naso parsubang. Ido konteks ni huria di Rom hatiha adong sian horong Gorik (Yunani) dohot sian horong Jahudi, horong na gogo dohot gale haporseaonna. Di halak jahudi godang do ruhut taringot laho manganhon sipanganon (adong halal dan haram/ boi dohot naso boi), alai anggo sian Gorik dang apala adong subang taringot sipanganon. Alai harajaon ni Debata ndanda ala ni sipanganon, alai hatigoran dame dohot lasniroha do (Rom 14:17). Nuaeng pe di halak kristen masa do songon ni, adong na manggalang na margota adong naso manggallang na margota, suang songon  ni na di ruhut paradaton pe boi do marasing asing pangantusion dohot teknisna.Adong do na manghangoluhon adat laos adong muse do na menolak ada. Alai saluhutnai unang gabe patubu partuktuhan lumobi parbolatbolaton. Sikap na ingkon tajagahon ima unang mangarajumi dirina sumintong jala manguhumi halak na asing. Ai ndang adong holong ni roha di angka na sai manguhumi donganna. Holong ni roha tarida molo jumpang sikap masijanghonan, menerima kelebihan ni dongan, sopola manguhumi na marasing latar belakang sosial nang budayanpe. Kata kunci i ma kata “SALING”

2.      Mangolu manang na mate  di Tuhan i do hita (5-9). On do ojahan na membangun sikap dohot hadirion ni halak Kristen, ndang mangolu hita ala ni hadirionta sambing, alai mangolu manang mate pe hita di Tuhan i do. Lapanta ndang molo tung adong na berbeda pendapat taringot tu ruhut, taringot sipanganon, saluhutnai ndang laho mamintori diri, alai saluhutna tujuan ni ngolunta ima laho mangulahon lomoniroha ni Tuhan i do dibagasan haporseaon nasintong. Ndang mangolu hita holan mangolu tu hagiotta sandiri, alai tujun ni golunta ima mangolu hita gabe”hatoban/naposo ni Tuhan i” do. Ala ni ndang boi hamatean i manirang hita sian Tuhan i, ai Debata do nampuna Tondinta, nampuna ni Debata do hita.

3.      Ayat 10. Sipaingot/teguran do on tu halak Kristen, asa unang jumpang pangalaho na sai masiuhuman huhut masihosoman. Dang hak dohot wewenang ni jolma laho manguhumi donganna jolma. Tuhan Jesus mandok: “Unang hamu manguhumi asa unang hona uhum hamu.” (Mat. 7:1). Holan di tangan ni Debata do jumpang hita uhum dohot hatigoran.  Hatiha i, halak Kristen na ro sian Jahudi sai olo do manguhumi halak Kristen na ro sian hasipelebeguon. Tubu do ginjang ni roha di nasida ala songon  bangso Jahudi na pinillit ni Debata gabe bangsoNa jala hasahatan ni angka PattikNa, gabe olo do nsida mandok; Holan tu ompunami dohot tu bangso nami do hasahatan haluaon na binoan  ni Kristus, alani dang talup bangso na asing laho manjalo i.” Dipaingot Apostel Paulus do nasida, paboa na sada do hita di jolo ni Debata. Rap do hita sijalo uhum molo pardosa jala si tean hangoluan na saleleng ni lelengna molo porsea. Ai sasude hita (Yahudi/ non Yahudi) pajongjongonNa do di jolo ni habangsa paruhuman i, laho manjalo sian hita pertanggungjawaban taringot di angka naung ta ula (II Kor 5:10).

4.      Ayat 11. Marhite turpuk on dipaingot Apostel Paulus do nasida,mandok: Ia Debata, Ibana do Tuhan ni angka na mate dohot Tuhan ni angka na mangolu (Rom 14:8-9). Mangolu do Ibana paida-ida ganup na ni ula ni angka na tinompaNa, Dang dung lupa tu angka na tinompaNa. Patar do saluhut na di ida Jala ditatap Ibana sian habangsa paruhumanna. Na marlapatan tetap do aktif jala hadir Debata tongtong tu ngolu ni Jolma, laho marnida parulaon ni hita Jolma. Saluhut do hita marsinggang sogot di adopan ni Debata mangido haluaon sian paruhumanNa, na naeng boanon na tu angka halak Pardosa (Pat. Pilipi 2:10-11). Sude angka parsoara na gogo andorang dingoluna, ingkon marsinggang sogot dijolo ni Debata, na patuduhon metmet do hita dijolo ni Debata.

5.      Ayat 12. Sude do hita mangalehon alus manang pertanggungjawaban di angka naung taula andorang dingolunta. Na marlapatan molo dung dipapatar Debata HarajaonNa sogot gabe Ibana do donganta mardabu-dabu taringot tu sude angka naung taula i. Dang jumpang be disi angka alus na marbelit-belit songon alusta andorang mangolu hita di prtibion, alai ingkon dohononta do “olo” manang “dang” mangalusi sungkun-sungkun ni Debata. (Pat. Mat 5: 37). Alani do laos dipatangkas Apostel Paulus do muse anggiat tangkas hita marpingkir di ngolu parsaoran asa unang masiuhum-uhuman, unang sai manguhumi donganna jolma, na manghosomi, ai dang parbue ni haporeaon i (Ayat 13), alai naeng tangkas taparbuehon haporseaonta ima hataridaan ni parbue ni Tondi Parbadia di ngolunta (Gal 5:22-23). Asa kehadiranta songon halak Kristen diportibion sotung ma gabe mambahen partuktuhan (batu sandungan), alai naeng ma gabe motivasi, laho manungguli ngolu na masihaholongan jala na dame. Ingkon gabe hasahatan ni pasupasu ni Debata do halak Kristen di prtibi on (saluran berkat) unang ma laos gabe mengundang murka/rimas ni Debata.

III.Sipahusorhusoron

1.       Dang adong jolma i na singkop, sude adong do hasurungan dohot hahuranganna. Tapadao ma sikap mamintori diri jala manguhumi, alai ta hangoluhon sikap masianjuan, masijanghonan songon Krustus naung majanghon hita.

2.      Torop do jolma nuaeng on, sai holan na naeng manguhumi, saling menyalahkan, jala sai berusaha do anggiat nean boi ibana malua sian hasalaanna, lumobi mansai maol do jolma nuaeng merasa bersalah manang mengakui kesalahanna, baliksa holan hasalaan ni dongaanna do diboto. Silbak-silbak di simalolong ni donganna di ida, alai tiang di simaloongna sandiri dang di dia i (Mat 7:1-5).

3.      Manang beha parulaonta sude do pertanggungjawabhononta di jolo ni Debata, alani tatanda ma dirinta; aha naung ta ula jala na patut siulahononta, molo naung mardosa do tatopoti ma tu adopan ni Debata jala tapauli, molo na denggan do, tahangoluhon mai gabe pasupasu tu na humaliang. Amen.