RENUNGAN BIK

Kamis, 26 Juli 2012

Sijahaon:

Manogot  Psalmen 89:9-18                                                                  Bodari Lukas 11:37-54

1. Marende BE. No. 15:4  Aut Na Saribu Hali Ganda 

Ø  Mauliate ma rohangku di Ho o Debata tongtong

dibaen sude denggan basamu naung nilehonmu di au on

ai dipatongon ho tongtong sude na ringkot di au on    

1 Korint 10:31 Onpe, na mangan manang na minum hamu, manang dia pe diula hamu: Bahen hamu ma saluhutna i, pasangaphon Debata!

PASANGAP MA DEBATA DI SALUHUTNA I

HATORANGAN

Mangan dohot minum sada kebutuhan na mansai ringkot (primer) do I di ngolu ni angka jolma, lapatanna ndang boi mangolu jolma molo so  mangan dohot minum. Sian segi kesehatan di ondolhon do I asa sehat jolma I, ingkon diparohahon ma “empat sehat lima sempurna”, jala nungga taboto I dia do maksud ni pandohan i. Alai di ari na parpudi on, hombar tu penelitian ni ilmu kesehatan, nungga hurang ampit be pandohan I, ala mangihuthon penelitian ndang sungkup be prinsip I mambahen jolma sehat. Ala ni ni didok ma tamba ni empat sehat lima sempurna, ingkon godang do jolma “minum aek”, ala mansai ringkot situtu do unsure ni aek di pamatang ni jolma asa hipas jala hirang pamatangna, ido umbahen na didok “di dalam tubuh yang sehat terdapat jiwa yang sehat”, lapatanna adong do hubungan ni hahipason dohot parohaon ni jolma. Hahipason ni partondion tarida ma I di sikap na mandok mauliate dohot pasangaphon Debata.

Mandok mauliate (Yunani: eucharisteo) I do sada prinsip ngolu sihangoluhononhon halak na porsea di Tuhan i. Prinsip mandok mauliate I ma gabe hataridaan ni ngolu laho pasangaphon Debata (Yunani:Doxa,doxologi). Molo didok Pasangaphon, mamuji (Doxa), pandohan I holan tu Debata sambing do I, ndanda tu “begu”.  Diturpuk on dijamothon si Paulus do Huria na di Korint boha do sikap ni naporsea taringot tu sipanganon dohot si inumon, lumobi ma molo di tuhor juhut naung pinelehon tu begu, alai digadis muse.Sungkunsungkun , boi doi panganon ni angka na porsea? Alus ni si Paulus I ma, na boi do panganon saluhut na ginadis ni parjagal I, ai gok di Tuhan I do sandok tano on. Didok Paulus do “Ai na denggan do nasa na tinompa ni Debata jala ndang sisubanghononhon nasa na jinalo mardongan roha mauliate (1 Tim 4:4). Ia prinsip ngolu ni na porsea sasintonang I ma “dia do na marguna jala dia do na patoguhon” (Segala sesuatu diperbolehkan, jika itu berguna dan segala sesuatu diperbolehkan jika itu membangun”. Marhite prinsip si songon ni do tong angka na porsea naeng tangkas manghangoluhon ngolu “na mangan manang na minum hamu, manang dia pe diula: Naeng saluhutna i, pasangaphon Debata!. Parange, pangalahon si songon I do boi pauliulihon partondion na sintong di Tuhan I, jala tarbahen hita mandok mauliate di saluhutna (Ef 5:20). Disungguli turpuk on do hita molo mangan manang minum pe hataridaan asiniroha dohot holong ni roha ni Debata na manarihon ngolunta. Alai tujuan ni ngolunta “Makan untuk hidup bukan hidup untuk makan”. Tapadao ma pangalaho na denggan na sai jotjot hita marsoal ala ni si panganon dohot siinuman, isara ni di ulaon ada/Pesta.Unang mamongkus hu hita, ta sarihon dongan, unang sude naeng di hita, di hita do lompan ni parsubang, alai lompan ni na so parsubang pe to do ta allang. Taingot ma "Ai ndada sipanganon manang siinumon harajaon ni Debata; hatigoran do dohot hadameon dohot las ni roha di bagasan Tondi Parbadia (Roma  14:17). Amen

3. Tangiang Pangondianon

4. Marende  B.E No. 312  PUJI JAHOWA NA SANGAP  BL.

Ø  Nunga dilehon Ho Tuhan sipanganonnami

Tau hasangapon di Ho ma nuaeng hubaen hami

Pamatang i Ro di gogona sude Tanda na las rohanami

5. TANGIANG ALE AMANAMI

Jumat, 27 Juli 2012

Sijahaon:

Psalmen 89:19-29                                                                                                 Bodari Lukas 12:1-12

1. Marende  No. B.E . 467:1    Asi ni rohaM hupuji.

1.        Asi ni rohaM hupu ji ala Ho manobus au. Di paIas Ho rohangku, ga-be soranganMu

Au. IngananMu rohanami. TondiMi manggohi i. Pangke dohot ngolunami gabe ulaulaMi.

Hesekiel16:8 Dung i mamolus muse ahu sian lambungmu, jala huida ho, gabe ida ma, nunga jumpang tingkim, tingki partandangonmu. Jadi * hupaherbang ma habongku mangulosi ho, jala huhungkupi parsaemaraonmu, pola marmangmang ahu tu ho, jala * marpadan ahu tu ho, ninna Tuhan Jahowa, gabe ahu nampuna ho.

ASI NI ROHA NI TUHAN I

HATORANGAN

                Mansai ngeri do parngoluan ni sahalak jolma molo so marama so marina (yatim), jala molo adong muse sorang dakdanak alai di tingki partubu ndang apala dihalomohon natorasna, ujungna ditingki sorang ibana ndang apala dianturehon natorasna, tali ni pusokna pe ndang diseat, ndang di paias (ay 1-4), alai adong ma na marasini roha tu ibana, disarihon na ringkot di ibana, alai dung magodang tong ndang adong sitiruon pangalahona. Songon ni ma dipatudos hadirion ni bangso Israel di adopan ni Debata, ditodo, dipillit Debata do Israel/Yerusalem gabe oroan na so satia tu Debata, na so manghaporsea I Debata. Diturpuk on taida ma boha do Debata patuduhon holong dohot asinirohana tu bangso Israel, marhite: a). Rade Debata paherbang habongNa mangulosi, namarlapatan do I Debata do mangaramoti asa unang marmara, b). Rade Debata manghuhupi parsaemaraon ni bangso I, lapatanna rade Debata manesa dosa ni bangso I, gabe marpamuati roha ni Debata. c) Debata patupahon padanNa tu bangso I, lapatanna Debata tongtong satia laho marmahani bangso i. Debata tongtong mian di tongatonga ni bangso I. Jala molo hata “padan” berhubungan do I tu panarihonon ni Debata, jaminan hidup sian Debata.

                Mansai arga do turpuk on manungguli rohanta, lumobi molo tongon taadopi hamaolon, songon parniahapan na ni alaman bangso ni Debata hatiha I ditingki habuangan babel, sahat dung mulak nasida tu Yerusalem. Marhite Turpuk on, disungguli tu rohanta, ia rahasia laho mangadopi angka hamaolon I boi do mangurupi hita molo tauji manaili tu pudi, boha sejarah ni ngolunta di angka partikian na salpu. Ai sorang pe hita tu portibion ndang adong manang aha na taboan. Ndang na boi tapangasahon, lumobi di adopan ni Tuhan I, ai ise ma hita umbahen na di honghop Tuhan I hita ala ni dosanta marhite Tuhan Jesus Kristus. Alai molo nungga songon ni tangkas ni Asi ni roha ni Tuhan I, naeng ma tapatuduhon sikap mandok mauliate tu Tuhan ni marhite ngolu na olo paubahon rohanta, manopoti angka dosanata, laos songon ni manjanghon hahurangan ni donganta, molo tung adong na humurang, songon Tuhan ni na rade manjanghon hita. Taingot ma holong ni roha ni Tuhanta I, naung manobus hita, jala diain hita gabe anakonna. Amen.

3. Tangiang Pangondianon

4. Marende B.E No.441: 1                                    Di au Tuhan Jesus

Ø  Di  au  Tuhan Jesus,  na salpu do sudena, na dok dok, nang uhum tu au.

Ringkot do rohangku mar ha to pothon, Jesus ku,  Tuhanku, di tobus Ho au,

Disesa Tuhanku, do ang ka do sang-ku. Nang ho, ale dongan, di tobus nang ho.

5. TANGIANG ALE AMANAMI

Sabtu, 28 Juli 2012

Psalmen 89:30-37                                                                 Bodari Lukas 12:31-21

1. Marende  B.E. No. No. 9  HUPUJI HOLONG NI                               

1.   Hupuji holong ni rohaMu, o Tuhan Jesus, Rajangki.

      tu Ho hulehon ma tondingku, ai i do  pinangidoMi.

     Huhalupahon ma diringku, mamingkir holong ni rohaMu.

Galatia 2:20 Ndada ahu be na mangolu i nuaeng; Kristus do mangolu di bagasan ahu. Ia mangolu pe ahu nuaeng di bagasan daging, mangolu marhitehite, haporseaon di Anak ni Debata, na mangkaholongi ahu jala na mangalehon dirina humongkop ahu

NGULU NA DIBAGASAN KRISTUS I MA NGOLU NA TRANSFORMASI

HATORANGAN

Sikap na maol nuaeng dipatuduhon jolma I ma “komitment, konsekwen dohot konsisten”. Pandohan I boi doi tapudun tu sada pandohan I ma “setia/kesetiaan, Ia do ngolu na porsea (Yun: pistis). Halak na na porsea, I ma halak naung dipaimbaru jala patuduhon ngolu na imbaru (mengalami perubahan hidup dalam sikap dan perbuatan/transformasi roha parbagason). I do umbahen didok si Paulus “Asa molo di bagasan Kristus halak, na tinompa na imbaru ma i. Nunga salpu pangalaho na robi, gabe na imbaru” ( 2 Korint 5:17). Panindangion Apostel Paulus di turpuk on I ma patuduhon hadirion naimbaru dibagasan parsihohoton na dibagasan Kristus. Dirajumi Paulus do anggo ngoluna ndang mangasahon hadirion na be, lapatanna ndanda mangihuthon lomonirohana be ojahan ni angka ulaonna, alai mangasahon lomo ni rohan ni Tuhan I nama, ai nungga sangkambona Ibana dohot Tuhan i. Sauhutna ngoluna holan dibagasan Tuhan i. I do umbahen didok Paulus tu Huria Filipi “Songon parrohaon ni Kristus Jesus ma parrohaonmuna!(Pil 2:5). Dihaporseai si Paulus do ndang namarlapatan ngoluna molo so ala ni Tuhan Jesus naung manghaholongi jala na manghophop ibana. Marhite turpuk on diarahon do hita, parjolo. Ia ngolunta ndang egosentris, lapatanna mangolu hita holan mangasahon hagiot, manang lomo nirohanta sambing, alai songon halak Kristen hita naeng ma ngolunta ingkon Kristosentris, lapatanna igkon marparange hita mangihuthon tiruan na binahen ni Tuhan Jesus, mian dibagasan Tuhan I, mangulahon ulaon na denggan hombar tu lomo ni roha ni Tuhan i. Paduahon, ngolunta ndanda holan mangihuthon hagiot ni daging, alai mangolu dibagasan haporseaon tu Debata. Ngolu dohot sikap sisongon I do patuduhon naung tajanghon holong ni rohan ni Tuhan I naung mangahaholongi jala manghophop hita marhite hamamate ni Tuhan Jesus. Marhie I ma naeng dohononta songon na ni dok ni BE 150:2 “ Ndang au nampuna ahu Dung mate Jesus I, Dihophop do tondingku disesa dosangki, tongtong ma hupasat au, mangunduk tu Tuhanku, na lambok roha I”. Antong tapasahat ma ngolunta dohot ulaonta hombar tu lomo ni roha ni Tuhan i. Amen

3. Tangiang Pangondianon

4. Marende BE No 471:2       Hupilit Jesus donganki

1.                    Arga ditobus tondingki, na mate do Ibana,

Ngolungku hubaen upa nii, lao mangoloi hataNa

:,:Di Ho ngolungku…

5. TANGIANG ALE AMANAMI

Minggu VIII DUNGTRINITATIS, 29 Juli 2012

Sijahaon:

Ev: 2 Rajaraja 4:42-44                                                           Ep. Psalmen 145:14-17

1. Marende No: B.E. No.17:1     RAJA NA TUMIMBUL 

1.   Raja na tumimbul Sigomgomi hami Jalo ma pujiannami

      Denggan ni basaM do Pangoluhon hami Atik pe mardosa hami

      Sai apoi pargogoi hami mangendehon SangapMi o Tuhan

DISARIHON DEBATA NA RINGKOT DI BANGSONA

HATORANGAN

                Dipartingkian on nuaeng nungga lam tarela hita mangasahon utohutok (pingkiran), jala diangka na so manghaporseai Debata (atheis), prinsip ni ngoluna, ndang tarjalo roha nasida hasintongan molo so boi tarjalo ni utokhutok. Sikap si songon ni do na ni dok na rasionalisme; segala sesuatu yang tidak logis tidak bias dianggap sebuah kebenaran. Sasintongna anggo di prinsip social ekonomi, politik  dohot hokum, boi do prinsip I pangkeon. Alai anggo di ngolu partondion, manang haporseaon, ndang marojahan tu pingkiran haporseaon ni, alai ndang na mandok maralo pingkiran (logika) tu ngolu ni hanporseaon. Molo pingkiran ni jolma adong do batasan ni I, alai molo haporseaon ndang dibatasi logika ni jolma ibana. Taida ma di turpuk on parbue ni logika ni jolma dohot haporseaon. Sahalak na ro sian Baal-Salisa, mamboan 20 sagusagu patumonaan sian na ni ulana, diboan tu si Elisa, dung I mamintor didok si Elisa do tu naposona asa diparlehon tu situan natorop, ia torop ni jolma I adong saratus halak. Alai marpingkir ma naposona I, dia do mungkin sungkup sagusagu I tu saratus halak (Logika), marduaroha ibana, laho mangoloi parsuruon ni si Elisa. Alai taida marhite barita ni turpuk on, laho paboahon boha do Debata patuduhon huasona, tanda halongangan marhite naposa, gabe tangkas ma naeng dohononna ndang adong na so tarpatupa Debata (haporseaon), marhite 20 sagusagu I, boi do mangan saratus halak (naposo ni Debata), jala adong dope na teba. Taida ma tanda halonganngan di turpuk on, adong hasarupaanna songon tanda halongangan na binahen Tuhan Jesus marhite 5 roti dohot 2 dengke, jala lobi dope sampulu ampang. Marhite turpuk on dibohali do ngolunta, lumobi dipartingkian on, namansai godang hamaolon taadopi laho mamingkiri angka na ringkot di ngolu pardagingonta, angka na ringkot tu haporluon ni angka dakdanak diparsingkolaan, manang kebutuhan melanjutkan pendidikan, sai marhusari rohanta, boha do on? Aha do tusi, sian dia ma hepeng? Disaluhut angka sangkap dohot sipingkiran I, naeng ma gomos hita marhaporseaon tu Debata, marhite turpuk on tangkas taida ndang tuk pingkiran ni jolma laho mamingkiri angka na ringkot dibagasan ngoluna, alai marhite na olo hita mangulahon hombar tu lomo ni roha ni Debata, disi ma idaonta, jala tapangkilalahon na tongtong do disarihon Debata angka na ringkot di pardagingon dohot dipartondionna. Unang tapangasahon pingkiranta laho mangasta hagogoon ni Tuhan I, alai molo nungga taula angka ulaoanta dohot “denggan” marposniroha ma hita tu Debata na mamasumasu, pos ma rohanta ndang hurangan hita dibagasan Tuhan i.

4. Marende No B.E. No. 256:3    JESUS KRISTUS I DO RAJA          

Ø  Debata do sasadasa Holan Jesus do tudosna

                Anak tu Amana i, Anak tu Amana i

                 Na so meret habangsana So marujung do ngoluna

                Tongtong gomgomanNa i Tongtong gomgomanNa i.

5. TANGIANG ALE AMANAMI

Senin, 30Juli 2012

Sijahaon:

Manogot  Jusua 8:1-29                                                        Bodari Lukas 12:35-48

1. Marende No:  BE. No. 14:2-3    PUJI HAMU JAHOWA TUTU         

2.   Ingot tongtong, ale tondingkon,

      Sude na denggan na dipasonggop Debata tu ho.

      Denggan basaNa do na pangoluhon ho.

3.   Nda tung adong, pargogo tongon,

      Na martudosan, tu Tuhan Debata di surgo i.

      Sun hinagogo, sun hinagogo i.

2 Kronika 20:17 Sandok ndada hamu marporang sahalion, ingkon hohom be hamu jongjong disi, huhut paidaidahon tua sibahenon ni Jahowa tu hamu, ale halak Juda dohot Jerusalem! Unang hamu mabiar, jala unang godoron hamu! Manogot ma hamu borhat mandapothon nasida, sai na donganan ni Jahowa do hamu!

HOLAN DEBATA DO PARTANOBATOANTA

HATORANGAN

Molo didok marporang di turpuk on, ndanda na mandok na dihalomohon Debata do parporangan songon angka na masa di portibion, Isara ni Amerika mamorangi Irak, Afganistan, dohot angka porang di luat na asing. Ni tutu di sejarah ni pardalanan ni bangso Israel/Juda hatihai jotjot do halak I mangadopi angka parporangan, alai marhite pengalaman sejarah I gabe adong ma panindangion haporseaon taringot tu hagogoon ni Debata. Didok tu bangsoNa 2 Musa 14:14 “Jahowa do marporang humongkop hamu, asal hohom hamu” Lapatanna, unang pangasahon gogom laho mangalaho hagogoon di portibion. Mangasahon gogo ni Debata do bangso Israel manaluhon huaso ni bangso sileban hatiha i. Dingoluta siganup ari, songon na marporang do hita mangalaho hagogoon ni Sibolis, na boi mangela hita asa tartait tu ibana. Alai marhite I ma naeng tangkas pangaradeonta dohot haporseaonta marsihohot mangasahon Tuhan Debata. Marhite I didok si Paulus tu Huria Efesus “Solukkon hamu ma pangkean sinjata na sian Debata, asa taralo hamu utiutian ni sibolis i. Dibahen i, jalo hamu ma pangkean sinjata na sian Debata, asa tarbahen hamu mangalo di ari na jahat i, jala hot jongjong, dung dipatunduk hamu sasude. (Ef 6:11,13). Marragam do nuaeng hamaolon, “parporangan” na taadopi di ngolunta (krisis iman, krisisi moral,krisisi social, dll) na mambahen lam maol jumping hatigoran diportion, ala ni tarjou do hita laho mangalo, jala manaluhon nasa ulaon na maralo tu lomo ni roha ni Debata. Taingot ma “molo Debata donganta ise be alonta? Lapatannta tongdo si Bolis I alonta, alai raphon Debata ndang margogo musunta i. Molo marungkil hita, godang parsorion, ponjot pingkiranta, ingot “padan” bagabaga ni Tuhan I na tongtong manarihon, mangaramoti hita. Molo Debata tongtong adong di hita, hilalaonta ma saluhut na ringkot I nungga adong di hita. Antong tabahen ma Debata gabe partobatoanta, Ibana ma pangondianonta. Amen

3. Tangiang Pangondianon

4. Marende B.E No. 117  JAHOWA DEBATANTA DO   BL. 205 

1.     Jahowa Debatanta do Partanobatoanta

    Musunta ingkon talu do  Dibaen pangondinganta

    Ianggo musu i, I ma  sibolis i,

    Jorbut do tahi ni Mangago jolma i; Ndang dapot na mangatup

2.     Gogonta ndang haposan i, Tibu do mago hita;

    Pinillit ni Jahowa i, Na tuk pamonang hita

    Ai ise goar ni ? I ma AnakNa i Tuhanta Jesus i 

    Sigomgom sasude Na so tarbahen so monang

5. TANGIANG ALE AMANAMI

Selasa, 31Juli 2012

Sijahaon:

Manogot  Jusua 8:1-29                                                        Bodari Lukas 12:35-48

1. Marende No:  B.E. No. 248  SALELENG HO DI TANO ON 

1.  Saleleng ho di tano on Patigor ma roham

     Paingotingot ma tongtong Nidok ni Debatam

2.  Sai songon hau na denggan do Ramos parbue ni

     Bulungna pe na uli do Antong sai tiru i.

Jesaya 61:11 Ai songon tano na manubuhon suansuanan, jala songon porlak na pasimbur tubu boni na sinaburhon tusi ingkon songon i do patubuon ni Jahowa hatigoran dohot pujipujian di adopan ni sandok angka parbegu.

SIAN DEBATA DO NGOLU DOHOT HALUAON

HATORANGAN

                Ngoalu I gabe marlapatan molo mangolu do haporseaon dohot pangkirimon. Ngolu na marpangkirimon do mambahen ngolunta gabe mangolu. Prinsip ngolu si songon I do mambahen hita asa unang mura mandate, mandele. Sebalikina molo so adong pangkirimon di jolma mura do jolma mandele jala putus asa. Diturpuk on dipaandar si Jesaya do bagabaga haluaon tu banagsona na tongon mangadopi hamaolon hatiha i. Alai marhite hamaolon ni dijouhon do tu bangso I asa unang putus asa. Digombaehon do masa depan ni angka na porsea I songon “tano” dohot songon “ porlak” na manubuhon suansuanan, jala tubu boni na sinaburhon. Lapatana, ingkon adong hangoluon, haluaon di angka  na porsea. Ia ngolu na diigil Debata I ma anglu na dibagasan hatigoran dohot pujipujian. Marhite huaso ni Debata, ingkon dipajongjong Debata do “hatigoran” tu saluhut bangso, jala marhite I naeng saluhut bangso mamuji pambahenan ni Debata. Marhite turpuk on dijouhon do tu hita, parjolo, asa mangolu dibagasan pangkirimon tu Debata, paduahon, dijouhon do tu hita asa mangolu hita dibagasan hatigoran (keadilan), ai ndang dihalomohon Tuhan I angka jolma na mangulahon na so uhum, na so patut tu angka donganna jolma. Lumobi dipartingkian nuaeng on, lam maol do hita mangulahon hatigoran hombar tu lomo ni roha ni Debata. Godang angka siula uhum (eksekutif) na so mangulahon uhum na sasisntongna, ujungna godang angka na metmet (na so margogo) na manarita, ala boi do jolma na marsala gabe malua alai boi di tuhor ibana uhum i. Alai atik pe songon I angka na masa I, diarahaon turpuk on do hita asa gabe jolma na patubuhon angka hatigoran ma ngolunta, sai songon hau na denggan ma hita, ramos parbuena, I ma parbue angka nauli, parbue na gabe pujipujian hasangapon di Tuhan i. Amen

3. Tangiang Pangondianon

4. Marende B.E. No.361:7   NA DENGGAN SITUTU DO   

7.  Martumbur do partigor Tudoshon bagot i

     Martunas do nasida Songon hau ares i

     Nasida na sinuan Di bagasjoro i

     Do na marbungabunga Di alamanna i

5. TANGIANG ALE AMANAMI