BIK , 26-31 OKTOBER 2012

Jumat 26 Oktober 2012

Sijahaon:

Manogot  2 Samuel 18:1-30                                                                 Johannes 10:1-10

1. Marende BE. 467: 1                           Asi ni rohaM hupuji.

Ø  Asi ni rohaM hupu ji ala Ho manobus au. Di paIas Ho rohangku, ga-be soranganMu Au. IngananMu rohanami. TondiMi manggohi i. Pangke dohot ngolunami gabe ulaulaMi.

2.Titus  2:11 Ai nunga tarida asi ni roha ni Debata, sibahen haluaon ni saluhut jolma

NUNGGA TARIDA ASI NIROHA NI DEBATA

Disada tingki di sungkun sahalak pandita ma ruas na, didokma “ diboto ho do lapatani asi ni roha ni Debata ?dung i di alusi ruas I ma, ndang huboto lapatanna amang?Dung i ro ma pandita I mandok, asi ni roha ni Debata, I ma Debata marasiniroha tu angka pardosa na mangalehon hasesaan ni dosa dohot ngolu na imbaru tu angka na porsea dibagasan Jesus Kristus.  Silehonlehon ni Debata sambing do I sopola mangasahon hadirion ni jolma, silehonlehon na so patut tu jolma I alai marhite asi ni roha ni Debata gabe dipatau jolma i manjalo basabasa ni Tuhan i. Sasintongna ndang talup jolma I manjalo ala ni dosana, alai gabe ala asi niroha ni Tuhan I gabe di patau jolma i. Pandohan asi ni roha ni Debata I do dasor ni ngolunta di adopan ni Tuhan i. Mangasahon asi ni roha ni Tuhan ni do marhite haporseaon gabe di patau hita manjalaho tohap haluaon i. Nungga patar jala tarida asi ni roha ni Tuhan i marhitehite panghophopon ni Tuhan Jesus Kristus naung mamboan haluaon tu saluhut na tinompa (Keselamatan universal). Dilehon Debata do asi ni rohana tu saluhut jolma, silehonlehon sambing doi, ndanda mangasahon hadirionta, alai marhite haporseaon di Tuhan ni do naung patupahon haluaon tu hita. Ala ni nungga tarida asi ni roha ni Tuhan I di ngolunta, marhite I dohononta ma ndang adong jolma na boi mangasahon hadirion, ala ni pangulaonna umbahen na malua ibana, jala dibagasan hagaleonta na gok dosa i gabe dipatau do hita manjalo haluaon na sian Tuhan i. Antong tangkas ma ingotonta “ Ai dohot do Kristus mate sahali ala ni angka dosa, na tigor i humongkop angka pargeduk, asa ditogihon hita tu Debata; na tarbunu do ia dagingna, alai dipangolu do anggo tondina (1 Pet 3:18). AMen

3. Tangiang Pangondianon

4. Marende B.E. No.140:4   GIRGIR MA HAMU 

Ø  Asi ma rohaM Ale Debata Pasaut ma hataM Tumpahi  nama

     Sude na niula Ni naposoM Sai baen ma martua Sude jolma pe.

5. TANGIANG ALE AMANAMI

Sabtu, 27 Oktober i 2012

Sijahaon:

Ulaon 8:14-25                                                                                                        Andung 5:19-22

1. Marende BE No 363:14 Hamu Saluhut Harajaon

Ø  Ho, Debatangku, pujionku Patimbulonku  sai tongtong

Mauliate ma rohangku Di Ho dibaen basaM inon

Hamu sude pe, ale dongan Dok ma mauliate i

Ai ndang he marpansohotan Do denggan ni basaNa i.

2. Jeremia 17:13 Ale Jahowa, ho do pangkirimon ni Israel! Saluhut angka na tumadingkon ho gabe tarurak; angka na marbalik sian ahu, ingkon tarsurat goarna tu tano, ala * tinadingkonnasida mual ni aek hangoluan, i ma Jahowa

JAHOWA DO AEK HANGOLUAN

HATORANGAN

Adong dua hal naeng taida sian turpuk on, parjolo pangkirimon ni angka na porsea tu Debata. Sasintongna ndang tarsirang haporseaon dohot pangkirimon. Halak na marpangkirimon I ma halak togu, jala hot hadirion na tu Tuhan I,ndang meoleol haporseaonna. Ndang songon “layanglayang” ndang boi hot, sae meoleol molo diullus alogo. Pangkirimon ni mamboan hita ndang holan manggulut arta di portibion hita (Heb 13:14), pangkirimon ni do na mangonjar rohanta asa manjamothon ngolu namarhabadiaon (1 Yoh 3:2,3), jala pangkirimon ni na margogoihoon hita mampu marlasniroha mangadopi angka sitaonon di portibion. Ndang tarsirang pangkirimon sian habengeton, I do umbahen didok si Paulus “Marlas ni roha ma hamu mangkirim! Marbenget ni roha ma di haporsuhon! Jugulhon hamu ma tangiang ( Rom 12:12). Pangkirimon ni do ojahan ni na porsea mangkirim haluaon sian Debata, haporseaon ni do dasor asa margogo hita manghaholongi donganta. Ala ni do didok si Paulus “Asa tolu do na hot: I ma haporseaon, pangkirimon dohot haholongon; alai haholongon do na umbalga I” (1 Kor 13:13).

Paduahon na taida sian turpuk on I ma, uhum ni Debata tu angka siula dosa. Molo mardosa jolma berarti  marsahit ma roha parbagasonna (sakit batin: perasaan, keinginan dan tindakan, akal, pikiran), molo mardosa jolma sega ma roha parbagasonna. Dohonontama halak na mangulahon dosa, I ma halak na manadingkon Debata, manimbil sian lomo ni roha ni Debata. Mangihuthon haporseaon ni Israel, diuhum Debata do nasa jolma na mangulahon dosa. Digombarhon do diturpuk on halak na manadinghon Debata, I ma halak na na manadinghon aek hangoluan, manadingkon pasupasu ni Debata. Songon hinaringkot ni aek tu sude mahklu, songon ni nang di halak Israel, aek do sumber kehidupan na mansai ringkot situtu, na menopang kehidupan ekonomi nasida. Ala ni marhite turpuk on disosohon do tu hita asa marpangkirimon tu Debata, ai Ibana do aek hangoluan na boi margogoihon hita, na pasonang rohanta uju marungkil hita, dohot na mangapuli rohanta uju marsak hita. Amen

3. Tangiang Pangondinon

4. Marende B.E No.188:2    JAHOWA SIPARMAHAN AU  BL. 131

Ø  Ditogu au tu na tio Aek mata hangoluan

                Dibaen do tondingki sio Di dalan hasonangan

                Sabam rohangku do tongtong Saleleng au di tano on

                Baen sangap di goarNa.

5. TANGIANG ALE AMA NAMI

Minggu, 28 Oktober 2012

Sijahaon:

Ev: Jeremia 31:7-9                                                                                                                Ep:Psalmen 126:1-6

XII Dung Trinitatis

1. Marende No: BE. No. 14:2+3     PUJI HAMU JAHOWA TUTU        

Ø  Ingot tongtong, ale tondingkon, Sude na denggan na dipasonggop Debata tu ho.

Denggan basaNa do na pangoluhon ho.

Ø  Nda tung adong, pargogo tongon, Na martudosan, tu Tuhan Debata di surgo i.

Sun hinagogo, sun hinagogo i.

DEBATA PAPUNGUHON DOHOT PAULAKHON BANGSONA TU IBANA

HATORANGAN

1. Bagabaga haluaon do turpuk on tu bangso Israel na tarbuang uju i, alai nang pe sai mardosa I bangso I, dipangkuli Debata do bangso i marhite naposo na tongon mangadopi parungkilon ala tarbuang nasida. Molo didok marhinsa ni roha, marsuraksurak, marolopolop, I do patuduhon hadirion ni angka na porsea tu Debata, I do patuduhon ciri khas huria na hinonghop Tuhan I, ala ni ngolu namarolopolp ndanda holan las niroha ateate, manang pingkirin (emosional) sambing alai las niroha dibagasan Tuhan ni do (Psalmen 16:11, Pil 4:4; Rom 15:13), ndang las niroha pardagingon sambing na ni dokna. Isara ni songon lasniroha molo monang ujian, molo dapotan karejo, molo juara di perlombaan, dll.  Marhinsa niroha, marsuraksurak dohot marolopolop I do hatandian ni angka na porsea di Tuhan ni. Ngolu na marolopolop I do ngolu naung manghilalahon pasupasu ni Debata. Martudutudu  do ngolu namaroloolp tu haluaon dohot pangkirimon (Yes 49:13; 61:10).

2. Ojahan olopolop I, I ma ala ni pambahenan ni Debata, na papunguhon dohot paulakhon bangsoNa tu Ibana, namarlapatan do I Debata sandiri do napatupa haluaon tu bangsoNa, ndang adong manang ise pe na boi mangarajuni dirina boi paluahon ngoluna. Molo Debata “pangunguhon” berarti ndang lomo roha ni Debata manimbil jolma I, ndang lomorohaNa mago jolma I, dipapatar do I marhite Tuhan Jesus parmahan na denggan i. Debata do na paulakhon bangsoNa mulak sian habuangan tu Jerusalem (tanah perjanjian). Namarlapatan do I Debata sandiri mangalehon asi ni rohana tu bangso I marhite na olo marhamubaon niroha mulak tu Debata. Haluan sian habuangan, ndang holan haluaon secara pardangingon (social, politik, ekonomi, agama) sambing I, alai gombaran haluaon sian gomgoman ni dosa do i. Boi do ala ni dosa I mambahen hita ndang boi marolopolop, ala ni unang taloas dosa I mangarajai ngolunta, alai tongtong hita mian dibagasan Tuhan I (Rom 6:8), dipaingot do hita marhite turpuk, molo marungkil hita, molo marsitaonon hita, molo taadopi arsakniroha, dijouhon do tu hita asa unang mandele, jala unang mandate, alai tongtong marpangkirimon na mangolu tu Debata. Ndang tarsirang haporsuhon sian habengeton, lasniroha dohot pangkirimon. Ala ni ma didok si Paulus “Marlas ni roha ma hamu mangkirim! Marbenget ni roha ma di haporsuhon! Jugulhon hamu ma tangiang! (Rom 12:12). Antong tahangoluhon ma di ngolunta siganup ari ngolu “namarolopolop”(bersoraksorai dan bersukacita) mananda Tuhan ni dohot haluaon napisahatNa tu hita, ai  didok do “Tongtong ma hamu marlas ni roha” (1 Tes 5:16), Angkup ni i, ale angka donganku, las ma rohamuna di bagasan Tuhan i! (Pil 3:1). Atik pe so dung diida hamu Ibana, dihaholongi hamu do Ibana, na hinaporseaanmuna, nang so diida hamu Ibana nuaeng, gabe mariaia do hamu, di bagasan halalas ni roha na so tarhatahon jala na tongam (1 Pet 1:8). AMen

3. Tangiang Pangondianon

4. Marende No 363:3+8 HAMU SALUHUT HARAJAON

Ø  Ai uju au di hagogotan Joujou do au tu Debata

                Tang iangki do ditangihon  Dibaen do hosangki  arga

                Jahowa do tongtong donganku Beasa ma mabiar au ?

                Tung aha baenon ni alongku Nang manang ise dompak au ?

Ø  Timbul do tangan ni  Jahowa Sibahen hamonangan i

                Na tunduk do na jungkat roha Hot jongjong do partigor i

                Ndang mate au, sai na mangolu Do au marhite Tuhanki

                Pajojoronku, o Pangolu Ma saluhut pambaenanMi.

5. TANGIANG ALE AMANAMI

Senin, 29 Oktober i 2012

Sijahaon:

Manogot  Psalmen 119:97-104                                                                            Johannes 10:22-33

1. Marende No: B.E No. 117  JAHOWA DEBATANTA DO  

Ø  Gogonta ndang haposan i, Tibu do mago hita;

Pinillit ni Jahowa i, Na tuk pamonang hita

Ai ise goar ni ? I ma AnakNa i Tuhanta Jesus i 

Sigomgom sasude Na so tarbahen so monang

2. II Timoteus 4:17 Alai Tuhan i do mandongani jala margogoihon ahu, asa tulus parjamitaon i marhite sian ahu, gabe saluhut sipelebegu umbegesa; laos malua do ahu sian baba ni babiat i

MALUA SIAN “BABIAT” ALA TUHAN I DO MANDONGANI JALA MARGOGOIHON

HATORANGAN

Molok didok Tuhan ni mandongani (Yunani: paristano), berarti jonok do Tuhan i, mansai jonok hian jongjong dilambungta, jala molo didok Tuhan ni margogoihon (Yunani:endunamoo), berarti Tuhan i sandiri na mangalehon hagogoon asa margogo jolma i, ndang ala ni hadirionna. Tahilala do pandonganion dohot pangurupion ni Debata di angka pardalanan ni ngolunta sian ari na salpu sahat di tingkion. I do umbahen sai jotjot do tabege di hurianta angka ruas ni huria napasahathon hamauliateon ni rohana laho mandok mauliate tu Debata ala malua sian parmaraan, ala malum sian parsahiton, ala dapot parkarejoan, ala lulus sian parsingkolaan, ala monang masuk tu perguruan tinggi, dohot lan na asing. Sude na I patuduhon las ni roha di pandonganion ni Debata dibagasan ngoluna. Laos I do na dihatindanghon si Paulus di turpuk on di na tangkas dipangkilalahon ibana pandonganion dohot pangurupion ni Debata ala boi ibana malua sian “baba ni babiat”, I ma angka parhuaso na martahi na jat tu si Paulus, laho mangambati langka ni Ibana songon naposo ni Debata laho mamaritahon barita nauli. Alai ala ni pangurupion ni Tuhan I, ndang tarambat angka parjahati barita nauli I, gariada lam rarat do halak na porsea na sian sipelebegu hian manjanghon hata ni Tuhan I, dohonontama hajongjongan ni halak na porsea i “dibabat semakin merambat”. Nian mansai borat do tantangan gabe halak na porsea laho manghatindanghon na hinaporseaonna, molo didok di turpuk on “babiat”, gombaran do i na martudutudu tu hagogon ni sibolis, hagogoon ni portibion, hagogoon ni angka parjahat (Yes 5:29; Yer 49:19; 51:38), laho mangambat hata ni Debata. Ala ni tapangasahon ma Tuhan ni di ngolunta asa malua hita sian “baba ni babiat ni portibion”,  I ma angka hagogoon naeng ma mangaliluhon hita.  Antong “Torang ma rohamuna, dungo ma hamu; na maotaot do alomuna, sibolis i, songon babiat na marauang, mangalului sibondutonna” (1 Pet 5:8), Amen

4. Marende B.E No. 28:4   HATA NI JAHOWA 

Ø  Hata hangoluan do nuaeng diboan  Parjamita i.

                Na lambok begeon i nuaeng dilehon  tu rohanta i.

                Hita on dijamita i,  ai didokkon be do hita paubahon roha.

5. TANGIANG ALE AMANAMI

Selasa, 30 Oktober i 2012

Sijahaon:

Manogot  Psalmen 119:105-112                                                                                          Johannes 10:34-42

1. Marende No: 476:1                           NDADA AU GURU DI AU

Ø  Ndada au guru di au be, Jesus do nampuna au.

Las rohangku dung hubege, Jesus sipangol au.

Ndang  be au guru di au. Jesus na humophop au,

Nampuna au. Tung saleleng au mangolu, Jesus do nampuan au.

2. I Petrus 1:20 Naung ditodo do Ibana hian, tagan so ojak dope portibi on; alai dipapatar do di ujung ni angka tingki, ala ni hamu

NAUNG DITODO DEBATA

HATORANGAN

Sada rahasia kesuksesan di ngoluon I ma molo adong “perencanaan” dohot “tujuan”. Sian perencanaan dohot tujuan do sasintongna tarida aha do na tinodo. Sian perencanaan ni gabe botoonma gombaran siulaonni. Molo naeng marhasil halak disadasada ulaon ingkon adong ma perencanaan dohot tujuanna, baik di parsingkolaan, diparkarejoan, laho pajongjohon parbagason, dna. I do umbahen di ganup organisasi, instansi, perusahaan, pemerintahan, sai diparungkilhon do aha do “rencana” jala aha do “tujuanna” na ingkon sieahan (aha do visi dan misi, aha do targel na ingkon dicapai). Alai jotjot laho mambahen perencanaa I ndang diperhitunghon angka hal-hal na “metmet” hape di ujungna angka naso diperhitungkon I do na gabe penentu. Memang terbatas do kemampuan ni jolma, sangkap ni jolma, ala ndang siboto roha jolma ,ndang siboto saluhut jolma. Boi do na ditodo ni jolma pilit sian na sinangkapan ni rohana, isarana jojot do natoras manodo sasahalak gabe hela manang gabe parumaenna, hape anggo dibagasan rohana nungga denggan na tidodo na I, alai diujungna tarhirim ibana. Diturpuk on idaonta ma hasimoon, habalgaon ni pambahenan ni Debata, nungga di todo Debata hian Tuhan Jesus tagan so ojak dope portibion, asa marhite Ibana dipapatar Debata holong ni rohana tu portibion laho paulihon joma I dohot Debata. Ibana do “batu” parsuhi na ni ambolonghon, na so dijanghon portibion, alai Ibana do ojahan ni huria, Ibana do dalan haluaon I di hita marhite haporseaon, Ibana do na padamehon hita tu Ama i. Ala ni tama ma hita mandok mauliate tu Debata, ai nungga di papatar holongNa tu hita marhite Tuhan Jesus Kristus, na mangalehon hosanna humonghop hita. Antong taingot ma “Ai arga do hamu ditobus: Dibahen i pasangap hamu ma Debata marhitehite dagingmuna dohot marhitehite tondimuna; ai Debata do nampuna I (1 Kor 6:20), Amen.

3. Tangiang Pangondianon

4. Marende   BE.657:2                                           Uli na I HuriaMi

Ø  Huria ni Tuhanta I, hinophop ni mudarNa I,

        Pahot tongtong pingkiranmi,

        Maniop Tuhanmi parholong i.

        Sai unang olo talu ho, bahenon ni Sibolis I,

        Sai pangidohon ma gogo tu Raja ni Huria i.

        Tumpahi ma HuriaMi, Tumpahi ma HuriaMi.

5. TANGIANG ALE AMANAMI

 

Rabu, 31  Oktober i 2012

Sijahaon:

Manogot  Psalmen 119:113-120                                                                                          Johannes 11:1-6

1. Marende B. E No. 247:3-4                  SAI HEHE MA HAMUNA, HAMU, 

Ø  Ndang jadi haposanmu Gogom sandiri, da

                Ai tung na so hasea Do i di Debata

                Sai naeng basahononNa Di ho sinjatami

                Ai ndang tarbaen so talu Musuna baenon ni.

Ø  Manaon ma ho satongkin Di paraloan i

                Tibu do i marujung Dibaen Tuhanta i

                Dung i partumpalanna Ma ho di surgo

                Donganna ho manggomgom HarajaonNa i.

1.        I Petrus 1:5 Ai diramoti do hamu hinorhon ni gogo ni Debata marhitehite haporseaon, asa sahat tu haluaon, naung rade sipapataron di tingki na parpudi i

HINORHON NI GOGO NI DEBATA

HATORANGAN                                               

Molo laho hita tu penjara manang rumah tahanan polisi, manang lembaga pemasarakatan, mansai godangdo angka aparat na manjaga angka  tahanan (narapidana) di dihurungan I, jala ketat do pengawalan dipatupa tu nasida, jala sai diawasi do i 24 jom sadari, asa unang adong na melarikan diri, atik pe pengawalan I laho manjamothon asa unang adong terjadi angka hal-hal na bersifat negatif. Molo didok di turpuk on “diramoti” (Yunani: Phroureo, lapatanna:menjaga, melindungi, memelihara, mengawal), namarlapatan do I Debata do marhite gogona namanjaga hita, namangaramoti hita, ganup ari dohot diganup tingki. Boi ma tabayangkon isara ni pengawalan keamanan presiden na sai tongtong manjaga keselamatan ni sahalak presiden asa unang marmara ibana. Lobi sian I ma anggo pangantusion taringot tu pangaramotiaon ni Debata tu angka naporsea. Marhite turpuk on, dipapir jala dipapos ma rohanta hinorhon ni gogo ni Debata ndang tarhahua manang ise pe ngolu ni angka naporsea I ala ni pangkirimonna disiteanon na manontong marhite asi ni roha ni Tuhan i. Nungga patar haluaon I di ngolunta jala sipapataron ni Tuhan I di ari parpudi na marsihohot di Ibana. Ala ni pos ma rohanta di Tuhan ni molo pe taadopi angka parungkilon di ngolunta, tabahen ma I saluhutna laho papitahon asa lam polin haposeonta di Tuhan ni. Antong  taingot jala tahangoluhon hata ni Debata namandok “I do dihalashon hamu, nang pe marsak hamu satongkin nuaeng, di bagasan ragam ni pangunjunan, molo tung ingkon i. Ai naeng jumpang do hatauon ni haporseaonmuna, na andul ummarga sian sere na so manahan, nang pe diuji api i, bahen pujipujian dohot hamuliaon dohot hasangapon, di hapapatar ni Jesus Kristus I” (1 Pet 1:6-7). Debata do na mangaramoti huriaNa sian mulana sahat ro di ujungna, Ibana do margogoihon angak napsona tokoh-tokoh reformasi asa mulak huria I tu hasintongan,  selamat hari reformasi, Tuhan memberkatin, Amen.

3. Tangiang Pangondianon

4. Marende No BE.485:1                       Dongani ma au Tuhan.

Ø  Dongani au Tuhan sondangi rohangki,

              Pangiring ni mataM patongon langkangki.

             Sandok sude gogongku padohot pingkiranku,

             Huboan peleanku mangalu ulaonMu.

          Ai hinalomohonMi, urupi rohangki.

5. TANGIANG ALE AMANAMI