PAJONGJONG PARSAORAN NA MASIHAHOLONGAN

 PAJONGJONG PARSAORAN NA MASIHAHOLONGAN

Epistel: Poda raja Salomo 17:17-20 

Patujolo

Paralealeon ido arta naumarga di ngolu hajolmaon na pinasahat ni Tuhan i. Paralealeon i do mambahen uli jala boi mangarahut jolmai gabe patupa hasadaon, dosniroha, saroha sapingkiran dibagasan parsihohoton na polin. Dibagasan ngolu paralealeon i do tarida holong niroha nabulus maradophon angka dongan jala lam togu hadirionna marhite parhusoron ni tingki. Sian Poda Raja Salomo dipaandar do hinauli ni halak na maraleale marningot paralelaleon ni Raja Daud dohot Jonatan na tangkas nasida masihaholongan sian nasa roha.

Hatorangan ni turpuk:

Ayat 17-18: Manang ise na tongtong marholong ni roha, i ma aleale. Pandohan aleale (dihata heber didok re’eh: melihat, memperhatikan,bona ni hata re’eh: resh-ayin, ima simbol makna ulu  dohot simalolong). Jadi prinsip ni halak na maraleale ima sai tongtong mamparohahon, songon ulu ndang tarsirang sian simalolong. Songon parmahanan dohot birubiruna, na marmahani birubiruna, jala birubirunai ditanda parmahanna. Lapatanna halak namaraleale ima natongtong marholongniroha jala gabe dongan situtu diganub tingki lumobi uju mangadapi hagogotan. Aleale na sintong ima halak na mian dibagasan holong gabe dongan uju marlasniroha lumobi mangadopi arsakniroha, jala gabe dongan situtu uju mangadopi hagogotan. Ala ni ma hamoraon naumarga molo mangolu dibagasan paralealeon. Ai halak na maraleale i ma namangolu dibagasan hasatioan, bulusniroha, kejujujuran. Hinaarga ni aleela dihalak Batak pola didok marhite umpama “ Manuk ni pea langge hotehotek lao marpira, sirang maraleale lobion matean ina” pandohan i mangodolhon hinarga, hinatabo, jala hinauli ni angka na maraleale. Alani ma molo marsirang sian aleale mansai lungun pangkilalaan. Tutu situtu ingkon dibagasan holong do paralealeon i, masitumpahan jala marsiurupan uju mangadopi na dokdok.  Aleale dohot dongan na sintong ndang girgir  martopat tangan laho mangkangkung dongganna. Lapatanna ingkon manat do mardongan, unang digabusi dongan, unang pinatorbang diri hera mangangkupi dongan hape sotuk gogo niba. Nang pe holong do rahutrahut paralealeon i ndang boi hita sandiri mandok hera boi gabe jaminan taringot tu ngolu ni dongan niba hape lao mangahut tudiri. Holan Tuhan i do aleale na sumurung na sumeahon diriNa humonghop jolma pardosa. Dibagasan Tuhan Jesus na gabe jolma dipapatar do paboa Ibana do aleale nasumurung i tu saluhut jolma.  Dibagasan Jesus lam tangkas do didok lapatan ni paralealeon i : Na sumeahon hosana humongkop angka alealena, i do parholong ni roha na so halompoan. (Yoh 15:13). Lapatanna holong paralealeoni dibagasan Tuhani ingkon holong na rade berkorban (holong Agave).

 

Ayat 19: Daoa sian ginjang niroha asa unang tubu pargulutan. Ai ginjang niroha do bonsir ni parbadaan, jala ndang mian holong disi. Molo mian jolma dibagasan pargulutan dihorhon i do dosa, ai dosa i do manegai ngolu pardonganon. Ala ni ma didok “Matua ginjang ni roha do patujolo ni hajepolon, jala hatimboon diri patujolo ni hatinggangon. (Poda 16:18). Ai hamagoan do ujung di ginjangniroha, jala haserepon do anggo patujolo ni hamuliaon. Hombar tusima umbahen na didok Tuhan Jesus “Martua ma angka sibahen dame, ai goaron do nasida anak ni Debata! (Mat 5:9). Dom tusi ma muse didok si Paulus “Dao ma sian hamu nasa riting ni roha dohot muruk dohot rimas, nang hata songgaksonggak dohot insahinsak, songon i nasa hajahaton! Alai gabe na basar ma hamu sama hamu, angka parasiroha; masisesaan dosa ma hamu, songon panesa ni Debata di dosamuna di bagasan Kristus.(Efesus 4:31-32)

Ayat 20:Padao hageduhoon: Na geduk roha (hata heber: iqqesh: menyimpang, bengkok), ima halak na sai manimbil rohana dohot pangalahona sian lomo niroha ni Debata, ndang lomo rohana mangulahon na denggan baliksa sai mangulahon hageduhon. Ala ni nasa na manimbil sian lomoniroha ni Debata tardok doi hageduhon. Halak na geduk roha ima halak pardila getegete, mandok naso patut, mandok hata naso sintong. Hata na geduk ndang  holan pabotohon roha na geduk alai dohot do mamboan jolma marpangalaho hageduhon. Molo lam dao jolma sian Tuhan i, hatana pe nungga rumar ndang marimpola. Didok tuhan Jesus “Alai angka na ruar sian pamangan, sian roha do i hehe, laos i do mangaramuni jolma i.(Mat 15:18). Ala ni mansai ringkot manjamothon roha pargabason asa ruar hata na siniraan. Ido umbahen didok di poda i “Sian saluhut sijagaon i, gumodang ma jaga roham, ai sian i do ruar angka mual hangoluan” (Poda 4:23).

 

Sipahusorhusoron

Hombar tu topik: Pajongjong parsaoran Na Masihaholongan, ala ni:

1.      Tahangoluhon ma ngolu paralealeon dibagasan holong asa jumpang parsaoran na denggan ditongatonga ni rumahtangga, parsaoran siganub ari dohot disude gulmit ni ngolunta. Halak na bisuk mandok: Hidup tidak ada artinya tanpa persahabatan. Mansai arga situtu ma paralaleon i, ai marhitei ma jumpang ngolu na masijanghonan, masipasangapan, masiurupan uju mangadopi hamaolon songon na nidok si Paulus “Masiurupan ma hamu mamorsan angka na dokdok i; i ma dalan mangaradoti patik ni Kristus.(Gal 6:2)

2.      Asa jumpang parsaoran na denggan tapadao ma ngolunta sian ginjang niroha. Holan dibagasan haserepon niroha do boi jumpang parsaoran na denggan, jala halak na dibagasan haserepon do boi manghaholongi donganna.

Dao ma ngolunta sian hageduhon, alai mangolu ma hita dibagasan hasintongan. Holan dibagasan haporseaon dohot holong niroha do ojahan ngolu na maralealae. Ojahan ni haporseonta dohot holong nirohanta ima dibagasan Tuhan Jesus Kristus. Ala ni halak na lam jonok tu Tuhan i,  ingkon manghaholongi hasintongan dohot holong paralealeon