1 Samuel 10:6-13

 

I. Patujolo

Debata do raja na mangatasi saluhut na tinompaNa, ndang adong huaso na asing dungkon ni Debata. Dipillit jala diparmudumudu Debata do angka naposoNa gabe parhitean laho patulushon sangkapNa, isara ni si Samuel, si Daud nang si Saul pe, alai saluhutnai laho patulushon lomoniroha dohot sangkap ni Debata. Hababangkit si Saul gabe raja marhite na dimiahi si Samuel, ima patuduhon dijou Debata do saluhut angka jolma laho patimbulhon harajaonNa  marhite angka naposaNa. Dipangke Debata do si Samuel laho mamiahi si Saul gabe raja, laos diigohi Tondi ni Debata do roha ni si Saul (10:1), lapatanna molo dimiahi patuduhon hatandian, hasurungan, partalian na dimiahi asa gabe ulaula ni Debata laho mamelehon dirina songon angka panurirang, malim dohot raja. Dung miahi si Samuel di Saul dipatobohon do ruhutruhut dohot tanda sihangoluhonon si Saul hombar tu hata ni Debata.

II. Hatorangan Turpuk

1.      Tondi ni Jahowa marhuaso paubahon hadiron huhut mandongani (ay 6-7). Dipabotohon si Samuel do tu si Saul paboa songgopon ni Jahowa do ibana ido patuduhon posniroha tu si Saul paboa parhitean ni Debata do si Samuel. Dilehon Debata do angka tanda namasa dohot na naeng masa asa marbisuk si Saul laho patupahon lomoniroha hombar tu sangkap ni Debata. Songon pandonganion ni Debata tu si Saul suang songon ni do pandonganion ni Debata tu angka na porsea. Didongani Debata do angka naposoNa mangulahon parsuruaonNa molo mian dibagasan hadaulaton.(pat, Ulaon Apostel 1:8, Yohanes 14:15-17)

2.      Tondi ni Jahowa mangajari asa marhaunduhon (ay 8). Parsuruan si Samuel tu si Saul asa tuat tu Gilga laho patupahon pelean situtungon dohot hamauliateon, lapatanna patuduhon parsombaon dohot mandok mauliate tu Debata jala patuduhon haunduhon, jala saluhutna ingkon diulahon marhite parsuruon ni Debata. Somalna adong huaso (otoritas absolut ni raja), alai marhite tona ni si Samuel asa dipaima ibana, ido patuduhon ingkon marguru tu pandok ni Debata do siulahononhon. Nang pe si Saul nungga bangkit gabe raja, alai ingkon hombar tu lomoniroha ni Debata do siulahononna, ala ni ma didok si Samuael asa pitu ari lelengna ibana paimahon. Lapatanna Tondi ni Jahowa ima tondi namangajari jolmai asa marhaunduhon.

3.      Tondi ni Jahowa paimbaruhon roha dohot patupa halongangan (ay-9-13). Hataridaan mananda Debata ima jumpang hamubaon niroha, songon parjumpangan si Saulus dohot Tuhani gabe marhamubaon niroha. Marhite Tondi ni Tuhan i gabe margogo si Saul manurirangi, gabe torop do longang jala sungkunsungkun marnida jala umbege panurirangon si Saul (10-13). Ndang hea si Saul di jou gabe panurirang alai gabe boi ibana manurirangi, lapatanna manang ise pe boi do dipangke Debata gabe ulaulaNa, ido umbahen didok :Tudoshon aek ni angka sunge do roha ni raja di bagasan tangan ni Jahowa, tung tu sandok lomo ni rohana do ditogutogu.(Poda 21:1). Margogo do Tondi ni Debata margogoihon saluhut angka naposaNa laho patupahon ulaon na na dengan diportibion. Ala  ni ma ingkon pos rohanta dipanjouon ni Debata hombar tu parsuruonNa di ganub ulaonta.

III. Sipahusohusoron

Marhite topik Jamita: Jangkon ma Tondi Parbadia, alani:

1.      Hasasaor ni Tondi Porbadia paingothon hita dipandonganion, pangaramotion ni Debata namanontong marhite huriaNa. Uju tardidi hita talapati doi nungga diurasi hita gabe jolma naimbaru laho mamboan haimbaruon, jala tarjou do hita manghangoluhon hamalimon na raja.  Halak naung manjanghon Tondi parbadia i do na margogo mangulahon parbue ni Tondi.

2.      Saluhut angka na porsea naung tarpilit gabe hamalimon na raja (1 Tess 1:4, 1 Pet 2:9. Dibahen i, taharinggashon sian nasa gogo, manurdukkon denggan ni parange di bagasan haporseaon i, habisuhon di bagasan parange na denggan, ala ni rade ma hita tinogihon ni Tondi ni Debata, angka i do anak ni Debata.

3.      Lam tajamothon ma ngolunta sian elaela ni tondi ni zaman on asa unang tarela hita tu hagiot ni portibion. Torop do nueng jolma tarela tu ngolu self-interest (egosentris) ndang Theosentris, pangontak ni  “spritualitas postmodern” na mangasahon gogo dohot pingkiran ni jolam jala ndang marhaposan tu hasintongan dohot huaso ni Debata. Ingkon manongtong do huria paboahon barita haluaon huhut mamboan haimbaruon partondion (transformasi rohaniah) marhite huaso ni Tondi porbadia laho pauliulihon haulion parange dohot roha dohot mangalo nasa hajahaton na patubu parungkilon ni jolma. Holan huaso ni Tondi Porbadia do na tuk margogoihon hita tu hamubaon niroha, ala ni marhaunduhon ma hita asa margogo hita patupahon parsuruaon ni Tuhani.