Rom 6:15-23

Rom 6:15-23

Topik: Guruhon na denggan, Pasohot najat

I. Patujolo

Mahadma Gandhi sahalak na tarbarita, lobi hurang 30 taon lelengna humophop halak India asa malua sian parhatobanon di India. Diujung ni ngoluna didok ibana do: Sian saluhut perjuangan ni ngoluku, sai huhurim do tagan di ngoluku asa huida dompak bohi ahu dohot bohi ni Tuhan i, asa jumpang ahu “haluaon”, alai ndang jumpangku Tuhan i, jala sai hulului Ibana alai hera dao dope Ibana. Ndang hea huida Tuhan i jala ndang tangkas hutanda Tuhan i. Marasing do panindangion ni si Mahadma Gandhi sian haporseaon halak Kristen taringot tu haluaon: Sebab orang Kristen mengenal Allah dan secara rohani telah dibebaskan dari dosa, meskipun akibat dosa adalah maut, namun karunia Allah adalah hidup yang kekal dalam Yesus Kristus.  Dipangke Apostel Paulus  do konteks ni parhatobanon na masa di tongatonga ni bangso Jahudi na diparhatoban romawi secara sosial politik, dohot pangalapation sian ruhut partondion marhite manggombarhon hajongjongan ni jolma laho mangantusi paboa halak namangoloi dosa gabe hatoban ni dosa, jala halak na mangoloi hasintongan gabe taruli hangoluan marhite asiniroha ni Debata.

II. Hatorangan Turpuk

1.       Halak na porsea ndang mangolu be dibagasan gomgoman ni patik, alai ginonggoman ni asi nirohaNa (ay 15). Lapatanna halak na mangolu dibagasan asiniroha ni Debata margogo laho manjaga norma-norma moral sian patik. Ala ni unang be sai mandatdati mardosa asa unang gabe hatoban ni dosai. Mangolu dibagasan asiniroha ni Debata lapatanna ingkon diotapi dirina unang mangulaho dosa, jala mangolu dibagasan hasintongan patuduhon naung gabe sangkambona dibagasan Kristus naung mate humonghop jolma ala ni dosai jala haheheonNa mamboan ngolu naimbaru. Ala ni do didok si Paulus: Antong, beha nama? Mardosa(hamartesomen:sai didatdati mangulahon dosa) ma hita ala ginomgoman ni asi ni roha. Asiniroha ni Debata ndang mandok gabe boi jolmai marlomolomo mangulahon dosa, hot do patik i  gabe siparorot asa mangolu jolmai dihasintongan dibagasan Kristus laho patuduhon halak Kristen na polin ( Rom 13:8-10, 8:4,9)

2.       Halak na porsea naung malua sian parhatobanon ni dosa, unang be sai mandatdati mangulahon dosa. Hatoban ni dosa tu hamatean, alai hangoluan pangoloi tu hatigoran (ay 16-18). Halak na gabe hatoban pangoloi (doulos eis hapakoen:budak yang taat)  ni dosa jambarna ima hamatean (thanaton), alai pangoloion tu Tuhan ni gabe taruli hasintongan dohot ngolu na manongtong. Haluan na sian Tuhan i talapati mai pangoloi (diperbudak) tu hasintongan. Ala ni pangoloion tu Tuhan i tarida mai marhite parange dibagasan hasintongan. Mansai las do roha ni Debata molo adong hamubaon niroha maninggalhon ngolu dibagasan dosa jala gabe marpangoloion dibagasan Kristus di ruhut ni poda taringot tu haluaon dibagasan Kristus. Parbue pangoloion tu Tuhan i ima malua sian dosa jala gabe mangoloi hatigoran i, jala dao ma sian ngolu parmainanon, hahodaron, pargadombuson, hasipelebeguon, hadatuon, parmusumusuon, parbadabadaon, pangiburuon, rimasrimas, pargutugutuon, parsalisian, partahitahion, bunubunu, parmabuhon, haormuson jala angka na suman tusi.

3.       Sian hatoban ni dosa gabe pangoloi dihasintongan(ay 19). Halak naung porsea manjalo asiniroha ni Debata ingkon adong semangat haimbaruon di ngoluna, manadinghon bangko sian pangoloi di hahodaron dohot di na so uhum, mangulahon na so uhum; gabe  pangoloi dihatigoran ido dalan ni Tuhani laho pabadiahonsa. Ngolu habadiaon i taroda ma marhite haimbaruon partondion (Spiritual) dohot parange (etis-moral) dibagasan ngolu ni angka na porsea i do parbue ni Tondi namargogoihon naporsea asa marparange songon Kristus. Lapatanna ngolu namarhabadion i ma mangaradoti hasintongan (suatu proses, atau keadaan  “bentuk baru kehidupan sosial” yang berkenaan dihadirat Tuhan.

4.       Halak na mian dibagasan hagiot ni dosa ndang  taruli nauli (ay 20-22), baliksa lam holang sian Tuhan i,  ai dosa i hamatean do hapateanna, alai halak na mangoloi Debata  adong do parbuena tu habadiaon; jala hangoluan na salelenglelengna do hapateanna. Hangoluan na salelenglelengna (zoen aionion:hidup yang kekal), martudutudu doi mananda Debata, jala mangolu dibagasan habadiaonNa.

5.       Ai upa tinuhor ni dosa do hamatean; alai basabasa ni Debata do hangoluan salelenglelengna marhitehite Kristus Jesus Tuhanta (ay 23). Debata do hangoluan na manongtong dibagasan Jesus Kristus, marhite Ibana do ditaluhon sorot ni hamatean i, jala hamamateNa tobus ni dosa i. Ala ni ndang marhite pambahenan ni jolma taruli hangoluan namanongtong i, alai holan ala ni asiniroha ni Debata do.

III. Sipahusohusoron, Topik: Guruhon na denggan, Pasohot najat, ala ni:

1.       Halak na mangulahon na denggan i do na mananda Debata. Mananda Debata i ma Debata napaluahon sian dosa ala ni asinirohaNa marhite haporseaon gabe taruli hangoluan na manongtong dibagasan Jesus Kristus. Antong taulahon ma na denggan jala mansohot ma mangulahon najat. alak na mangulahon dosa gabe hatoban ni dosa, hamatean do jambar ni dosa i, alai haunduhon mamboan tu hasintongan dohot ngolu na manongtong marhite asinirohaNa.

2.       Mansohot ma nasa na jat, alai tahangoluhon ma haluaon naung pinatupa ni Debata marhite Jesus Kristus dibagasan mbiar mida Jahowa. Tataluhon ma na jat i marhite ulaon na denggan. Anggiat ma semangat ari Reformasi (31 Oktober) margogoihon hita patupa haimbaruon, jala Asiniroha ni Tuhan i manogihon hita asa mian dibagasan ngolu hasintongan, pangoloion, habadiaon.

3.       Taguruhon na denggan ai Debata do nampunasa ngolunta, nungga dipaimbaru hita, jala naeng tapatuduhon haimbaruon di  ngolunta. Ingkon tapelehon do ngoluta gabe pelean nahussus ganub ari tu Tuhan i. Dao ma sian hita bangko “parhatobanon” isara ni ngolu parmainanon, hahodaron, pargadombuson, hasipelebeguon, hadatuon, parmusumusuon, parbadabadaon, pangiburuon, rimasrimas, pargutugutuon, parsalisian, partahitahion, bunubunu, parmabuhon, haormuson jala angka na suman tusi. Tajamothon ma asa dao ngolunta sian rumang ni parhatobanon modern ala ni hamajuaon teknologi, Narkoba, eksploitasi, ketidakadilan, kekerasan, dohot saluhut ulaon na jat naso dihalomon Tuhan i.